1 TESALONICENSES 5 - Chatino Tataltepec

¹ Cu'ma̱ tya'a ngusñi na cha' ji'i̱ Jesús, ná ntsu'u cha' scua ya sca quityi cha' cacha' ya ji'i̱ ma̱ ni jacua' tyalaa tsa̱ lo'o ca̱a̱ Jesús chaca quiya', ni jacua' tyalaa tyempo bi';

² cua laca ngua cuayá' ti' ma̱ cha' ni sca ñati̱ chalyuu, ná jlo ti' ngu' ni tsa̱ ca̱a̱ ycui' nu Xu'na na. Ñi'ya̱ ndyalaa sca nu cuaana to' ni'i̱ ji'i̱ ngu' talya, jua'a̱ cuaana ti ca̱a̱ Jesús.

³ “Ti̱ ti ndi'i̱ chalyuu, tso'o ti ndi'i̱ na”, ñacui̱ ngu'; pana la cui' hora bi' tye cha' ji'i̱ lcaa ñati̱ chalyuu, nga'aa caja mala xna ngu' li'. Ñi'ya̱ laca sca nu cuna'a̱ tana, cha' ná jlo ti' ni hora caca nu cala sñi', ni hora ca̱a̱ nu ti'í ji'i̱; jua'a̱ caca lo'o cua tyalaa ti hora bi' li', cha' ná jlo ti' na ni tsa̱ caca.

⁴ Pana nu cu'ma̱ ni, ná ntsu'u cha' xcutsi̱i̱ tsa̱ bi' ji'i̱ ma̱, masi jlo ti' ma̱ cha' cuaana ca ti tyalaa tsa̱ bi'; si'i na ndya'a̱ ma̱ su talya ña'a̱ xqui'ya cha' cuxi, ñi'ya̱ ndya'a̱ xa' la ñati̱.

⁵ Cua ntsu'u xee nu nda ycui' Ndyosi ne' cresiya ji'i̱ ma̱; bi' cha' ñati̱ nu ndya'a̱ su xee laca ma̱, ñati̱ nu lubii cresiya ji'i̱ laca ma̱. Ná laca na ñati̱ nu ndya'a̱ su talya ña'a̱, cha' si'i ñati̱ nu nguna' chalyuu ji'i̱ xqui'ya cha' cuxi laca na.

⁶ Bi' cha' tii ti ti' na tyi'i̱ na chalyuu; si'i ñi'ya̱ nti' si xcui' na laja' ti na tyi'i̱ na chalyuu, masi jua'a̱ ndu'ni xa' la ñati̱ nu ná ndaquiya' ji'i̱ Jesucristo tsiya' ti. Lo'o jua'a̱ ña'a̱si̱i̱ na ji'i̱ ycui' ca na cha' ná caca cu'bi na.

⁷ Xcui' na ndyija' ti ñati̱ ñi'ya̱ si talya laca, xqui'ya cha' ná ndube ti' ngu'; xcui' na cu'bi ti ngu' bi', cha' ná ndube ti' ngu' tsiya' ti.

⁸ Pana nu na ni, ntsu'u xee ji'i̱ ycui' Ndyosi ne' cresiya' ji'na, bi' cha' tii ti ti' na tyi'i̱ na chalyuu; cua ngusñi na cha' ji'i̱ ycui' Ni, na cua ntsu'u tyiquee na ña'a̱ na ji'i̱ tya'a ñati̱ na xqui'ya Ni, lo'o jua'a̱ nga'a̱ cha' cua'a na ji'i̱ ycui' ca na cha' ná cua'ni na cha' cuxi nu nti' cua'ni ñu'u̱ ji'i̱ cresiya ji'na. Na ndu̱ ti' na ji'i̱ ycui' Ndyosi, ni jacua' tye cuityi̱ Ni ji'i̱ lcaa cha' cuxi nu ntsu'u ji'na, bi' cha' nga'a̱ cha' ña'a̱si̱i̱ na ji'i̱ ycui' ca na.

⁹ Ná ngusubi ycui' Ni ji'na cha' xcube' Ni ji'na; cua ngusubi Ni ji'na cha' cua'ni lyaá Ni ji'na xqui'ya Jesucristo nu Xu'na na,

¹⁰ la cui' nu ngujuii cha' cuityi̱ qui'ya nu ntsu'u ji'na. Bi' cha' taca tyi'i̱ na slo ycui' Ndyosi li', masi ña'a̱ ti tya lu'ú na chalyuu lo'o ca̱a̱ Jesús, masi cua ngujuii na li'; stu'ba ti tyi'i̱ na ca slo Ni li'.

¹¹ Laja lo'o ndu̱ ti' na ji'i̱ Jesús, tya culu'u ma̱ cha' bi' ji'i̱ nu xa' la ngu' tya'a ma̱, cha' caca tlyu la tyiquee ma̱ li'. Jlo ti' na' cha' jua'a̱ ndu'ni ma̱ tu'ni.

Xa' la cui̱i̱ nu nda Pablo lo'o ngu'

¹² Cu'ma̱ tya'a ngusñi na cha' ji'i̱ Jesús, ndijña ya ji'i̱ ma̱ cha' cui'ya ma̱ cuentya ji'i̱ lcaa ña'a̱ cha' tso'o nu ndyu'ni ngu' nu laca cña ji'i̱ ma̱. Cua nda ycui' nu Xu'na na cña ji'i̱ ngu' bi' cha' caca ngu' loo, cha' culu'u ngu' bi' ji'i̱ ma̱ cua ña'a̱ ca cha' tso'o nu caca cua'ni ma̱ cuentya ji'i̱ ycui' Ndyosi.

¹³ Tso'o ti cua'ni ma̱ lo'o ngu' bi' lacua, cha' tso'o tsa cña ndyu'ni ngu' bi' cuentya ji'i̱ ycui' Ndyosi; tso'o ti tyu'u tyiquee ma̱ ña'a̱ ma̱ ji'i̱ ngu' bi'. La cui' jua'a̱ tso'o ti tyu'u tyiquee ma̱ ña'a̱ ma̱ ji'i̱ lcaa tya'a ma̱, cha' nga'aa tyu'u cha' cusu̱u̱ ji'i̱ ma̱ lo'o tya'a ma̱ li'.

¹⁴ Cu'ma̱ tya'a ngusñi na cha' ji'i̱ Jesús, ndi'ya̱ chcui' ya lo'o ma̱: Culo ma̱ cña ji'i̱ ngu' tya'a ma̱ nu ná nti' cua'ni cña, nu xcui' na taja ti nti' ngu'; cua'ni ma̱ cha' caca tlyu la tyiquee ngu' tya'a ma̱ nu xñi'i̱ ti ti', cha' xñi tso'o la ngu' cha' ji'i̱ Jesús; xtyucua ma̱ ji'i̱ ngu' tya'a ma̱ nu ná ndyiji juersa ji'i̱ cha' xu̱u̱ tya'a ngu' lo'o nu cuxi, jua'a̱ talo tyiquee ma̱ ji'i̱ cua ña'a̱ ca ngu' tya'a ma̱.

¹⁵ Si cua'ni xña'a̱ ñati̱ lo'o ma̱, ná chcui' ma̱ cha' ti'í ji'i̱ ngu' bi' li'; xtyucua ma̱ ji'i̱ ngu' tya'a ma̱ cha' talo ma̱ ji'i̱ ngu' xña'a̱, cha' xcui' tso'o ti cua'ni ma̱ lo'o lcaa ñati̱, masi lo'o tya'a ma̱, masi lo'o xa' ñati̱.

¹⁶ Tso'o ti caca tyiquee ma̱ lcaa tsa̱.

¹⁷ Tyucui tyempo chcui' ma̱ lo'o ycui' Ndyosi.

¹⁸ Lo'o jua'a̱ tya ma̱ xlya'be ji'i̱ ycui' Ndyosi cuentya ji'i̱ cua ña'a̱ ca cha' nu ndyaca ji'i̱ ma̱. Nti' Ni cha' cua'ni ma̱ jua'a̱ si chañi cha' ngusñi ma̱ cha' ji'i̱ Jesucristo.

¹⁹ Ñi'ya̱ nti' sca xee, jua'a̱ laca Xtyi'i ycui' Ndyosi; ná xubi' ma̱ ji'i̱ xee bi'.

²⁰ Ná xtyí lo'o ma̱ ji'i̱ tya'a ma̱ lo'o chcui' ngu' sca cha' ji'i̱ ycui' Ndyosi lo'o ma̱;

²¹ pana cua'ni cuayá' ma̱ ji'i̱ cua ña'a̱ ca cha' nu nchcui' ngu' bi', si tso'o ndyu'u cha', si ná tso'o. Li' xñi ma̱ cha' tso'o bi',

²² pana culochu̱' ma̱ ji'i̱ lcaa cha' cuxi li'.

²³ Ndu'ni ycui' Ndyosi cha' ti̱ ti tyi'i̱ tyiquee na. Bi' cha' juani cua'ni Ni cha' caca ma̱ ñati̱ liñi tsiya' ti; caca tso'o tyiquee ma̱, caca lubii cresiya ji'i̱ ma̱, caca ma̱ ñati̱ nu tyucui tyiquee tsiya' ti. Si lubii cresiya ji'i̱ ma̱ lo'o ca̱a̱ ycui' Jesucristo nu Xu'na na chaca quiya', li' nga'aa ntsu'u cha' sta Ni qui'ya ji'i̱ ma̱;

²⁴ cua ngusubi ycui' Ndyosi ji'i̱ ma̱ cha' caca ma̱ ñati̱ ji'i̱ Ni tsiya' ti. Si'i sca cha' cuiñi nu nda Ni lo'o nchcui' Ni lo'o ma̱ jua'a̱, chañi cha' cua'ni Ni cha' caca ma̱ ñati̱ nu lubii cresiya ji'i̱ cuentya ji'i̱ ycui' Ndyosi.

Ngusalya' Pablo lo'o ngu'

²⁵ Cu'ma̱ ngu' tya'a na, ña'a̱ ti tya chcui' ma̱ lo'o ycui' Ndyosi cuentya ji'i̱ ya.

²⁶ Xlyo ni'i̱ ji'i̱ lcaa cu'ma̱ ngu' tya'a na.

²⁷ Nde cña nu culo na' ji'i̱ ma̱ cha' cua'ni ma̱ cuentya ji'i̱ ycui' nu Xu'na na, cha' chcui' ma̱ lcaa cha' nu nscua lo quityi re ña'a̱ cuayá' cuna lcaa ngu' tya'a na.

²⁸ Ndi'ya̱ nti' ya cha' ña'a̱ ti cua'ni ycui' Jesucristo nu Xu'na na cha' tso'o lo'o ma̱. Jua'a̱ caca cha' lacua.