1 TESALONICENSES 4 - Chatino Tataltepec

Cha' tso'o nu nti' ycui' Ndyosi cha' cua'ni na nde chalyuu

¹ Cu'ma̱ ngu' tya'a na, juani ndijña ya ji'i̱ ma̱ chacuayá' ji'i̱ Jesús nu Xu'na na, cha' ña'a̱ ti cua'ni ma̱ lcaa ña'a̱ cha' tso'o nu nti' ycui' Ndyosi cha' cua'ni ma̱ laja lo'o tyi'i̱ ma̱ chalyuu. Li' tso'o la caca cua'ni ma̱ cña ji'i̱ ycui' Ndyosi. Chañi cha' tso'o tsa ndyu'ni ma̱, pana cua nti' ya cha' ña'a̱ ti tya cua'ni la ma̱ la cui' cña nu cua ngulu'u ya ji'i̱ ma̱ tya tsubi' la cuentya ji'i̱ ycui' Ndyosi.

² Tyi'u ti' ma̱ ji'i̱ cña nu ngulo ya ji'i̱ ma̱ cuentya ji'i̱ Jesús nu Xu'na na,

³ cha' ndi'ya̱ nti' ycui' Ndyosi: caca lubii cresiya ji'i̱ ma̱, ná cua'ni suba' ma̱ lo'o ñati̱;

⁴ lcaa cu'ma̱, tso'o caja clyo'o ma̱, pana nga'aa ña'a̱ ma̱ ji'i̱ xa' nu cuna'a̱ li'. Lo'o jua'a̱ tso'o ti tyi'i̱ ma̱ lo'o clyo'o ma̱; tyu'u tyiquee ma̱ ña'a̱ ma̱ ji'i̱ clyo'o ma̱,

⁵ cha' ná nti' ycui' Ndyosi cha' cua'ni suba' ma̱ lo'o clyo'o ma̱, ñi'ya̱ nu ndu'ni ngu' nu ná ndaquiya' ji'i̱ ycui' Ni tsiya' ti.

⁶ Nga'aa xlyaá ma̱ ji'i̱ nu cuna'a̱ ji'i̱ ngu' tya'a ma̱, masi ji'i̱ clyo'o ngu', masi ji'i̱ sñi' ngu'. Cua nchcui' tsa ya lo'o ma̱ cha' lcaa cha' ña'a̱ ycui' nu Xu'na na; jlo ti' ycui' Ndyosi, lo'o jua'a̱ ntsu'u cha' xcube' Ni ji'i̱ lcaa ñati̱ nu ná taquiya' ji'i̱ cha' bi',

⁷ cha' cua ngusubi ycui' Ndyosi ji'na cha' caca na ñati̱ nu lubii cresiya ji'i̱, si'i cha' caca na ñati̱ nu ndyu'ni suba'.

⁸ Si'i sca cha' nu nchcui' ñati̱ chalyuu ti laca cha' nu nchcui' na' lo'o ma̱ juani, cha' liñi nu cua nda ycui' Ndyosi lo'o na laca cha' bi'; bi' cha' si ná taquiya' ma̱ ji'i̱ cha' bi', na cua nguxtyanu ma̱ ji'i̱ ycui' Ndyosi nu nda Xtyi'i ycui' Ni cha' tyanu Ni ne' cresiya ji'na.

⁹ Ná nga'a̱ cha' scua la na' lo quityi re cha' tso'o ti tyu'u tyiquee ma̱ ña'a̱ ma̱ ji'i̱ ñati̱ tya'a ngusñi ma̱ cha' ji'i̱ ycui' Ni; cua laca ntsu'u tsa tyiquee ma̱ ña'a̱ ma̱ ji'i̱ ngu' bi', xqui'ya cha' cua ngulu'u ycui' Ndyosi ji'i̱ ma̱ ñi'ya̱ nu cua'ni ma̱ lo'o tya'a ma̱.

¹⁰ Ni si'i sca ti ji'i̱ ngu' tya'a quichi̱ tyi ti ma̱ ntsu'u tyiquee ma̱, lo'o jua'a̱ ntsu'u tsa tyiquee ma̱ ña'a̱ ma̱ ji'i̱ lcaa ngu' tya'a ntsu'u cha' ji'i̱ ma̱ lo'o ycui' Ndyosi nde lcaa lo quichi̱ loyuu su cuentya Macedonia. Tya'a na laca ngu' bi', bi' cha' nchcui' ya lo'o ma̱ cha' tya cua'ni la ma̱ cha' tso'o bi'.

¹¹ Tso'o ti cua'ni ma̱ lo'o tya'a ma̱ cha' ti̱ ti tyi'i̱ tyiquee ma̱ li'. Ná tso'o si culo ma̱ cña ji'i̱ taju ñati̱ tya'a ma̱, lo'o li' taja ycui' ma̱; cua'ni ma̱ cña cha' caja xi na cacu ma̱ ñi'ya̱ nu cua nchcui' ya lo'o ma̱,

¹² cha' caca chcui' ngu' ji'i̱ ma̱ cha' tso'o tsa ndyu'ni ma̱ cña. Ná ntsu'u na laca nu lyiji ji'i̱ ma̱ li'.

Tya ca̱a̱ Jesús nu Xu'na na chaca quiya'

¹³ Cu'ma̱ tya'a ngusñi na cha' ji'i̱ Jesús, juani ta ya xi cha' lo'o ma̱ cuentya ji'i̱ ngu' tya'a na nu cua ngujuii, cha' ca cuayá' ti' ma̱ cha' ñi'ya̱ laca si na laja' ti ngu', jua'a̱ laca jyo'o bi'. Ná ca xñi'i̱ ti' ma̱ cuentya ji'i̱ jyo'o tya'a ma̱ lacua, cha' ná stu'ba laca na lo'o ñati̱ nu bilya xñi cha' ji'i̱ Jesucristo.

¹⁴ Jlo ti' na cha' ngujuii Jesús, lo'o li' ndyu'ú yu chaca quiya'; bi' cha' caca cuayá' ti' na cha' lo'o ca̱a̱ ycui' Jesús nde chalyuu chaca quiya', li' cua'ni ycui' Ndyosi cha' chaca quiya' tyu'ú lcaa jyo'o nu ngusñi cha' ji'i̱ Jesucristo tya clyo la, cha' stu'ba ti ca̱a̱ ngu' lo'o Jesús li'.

¹⁵ Cua nchcui' ycui' nu Xu'na na ñi'ya̱ caca ji'i̱ lcaa na tsa̱ bi', nu lo'o ca̱a̱ ycui' nu Xu'na na chaca quiya': Lcaa na nu tya lu'ú na ni, ná tyiji̱loo na ji'i̱ ngu' tya'a na nu cua ngujuii.

¹⁶ Ndi'ya̱ caca cha' lo'o tyalaa tsa̱ bi': Nde cua̱ ca̱a̱ ycui' nu Xu'na na, ca'ya Ni lo yuu; li' stu'ba ti cañi Xtyi'i ycui' Ni lo'o xtyi'i xca̱ ji'i̱ Ni nu laca loo, jua'a̱ cañi cui'chcua̱ ji'i̱ ycui' Ndyosi li'. Clyo tyacuí̱ lcaa jyo'o ñati̱ ji'i̱ Jesucristo tyaa ngu' nde cua̱;

¹⁷ li' tyacuí̱ lcaa ngu' tya'a na ña'a̱ lu'ú ti na, cha' tyalo'o ycui' Ni ji'na. Ca laja coo nde cua̱ tyacua tya'a na lo'o jyo'o tya'a na li', cha' lcaa na, stu'ba ti tyacua tya'a na lo'o ycui' nu Xu'na na ca bi'. Tsa cu' ti tyi'i̱ na lo'o ycui' Ndyosi li'.

¹⁸ Bi' cha' lacua, ta ma̱ cha' bi' lo'o ngu' tya'a ma̱, cha' tso'o ti caca tyiquee lcaa ma̱.