1 TESALONICENSES 1 - Chatino Tataltepec

¹ Pablo laca na'. Lo'o Silvano lo'o Timoteo ndi'i̱ ngu' ca nde lo'o na'. Nscua ya quityi re cha' tsaa slo cu'ma̱, ña'a̱ taju ti ma̱ ngu' quichi̱ Tesalónica nu ntsu'u cha' ji'i̱ ma̱ lo'o ycui' Ndyosi Sti na, jua'a̱ ntsu'u cha' ji'i̱ ma̱ lo'o Jesucristo nu Xu'na na. Nti' tsa ya cha' ña'a̱ ti cua'ni ycui' Ndyosi cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱.

Tso'o tsa ngusñi ngu' bi' cha' ji'i̱ ycui' Ndyosi

² Lcaa quiya' lo'o nchcui' ya lo'o ycui' Ndyosi cuentya ji'i̱ cu'ma̱, ndya ya xlya'be ji'i̱ ycui' Ni li'.

³ Ntsu'u ti' ya cha' ntsu'u tsa cha' tso'o nu ndyu'ni ma̱, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱, xqui'ya cha' ngusñi ma̱ cha' ji'i̱ Jesucristo. Ndalo tsa tyiquee ma̱ xqui'ya cha' jlo ti' ma̱ cha' ntucua Jesucristo nu Xu'na na ca slo ycui' Ndyosi Sti na; bi' cha' xcui' cha' tso'o ndyu'ni ma̱, masi tlyu tsa cña.

⁴ Lo'o jua'a̱ ntsu'u tsa tyiquee ycui' Ndyosi ña'a̱ Ni ji'i̱ ma̱. Cu'ma̱ ngu' tya'a ngusñi na cha' ji'i̱ Jesús, jlo ti' ya cha' cua ngusubi Ni ji'i̱ ma̱,

⁵ xqui'ya cha' ngusñi ma̱ cha' tso'o nu cua nchcui' ya lo'o ma̱, la cui' cha' tlyu nu nda Xtyi'i ycui' Ni cha' chcui' ya lo'o ma̱; Xtyi'i ycui' Ndyosi ngua'ni cña laja lo'o nchcui' ya lo'o ma̱, bi' cha' ngusñi ma̱ cha' bi'. Lo'o jua'a̱ jlo ti' ma̱ ñi'ya̱ ngua cña nu ngua'ni ya lo'o nguti'i̱ ya ca slo cu'ma̱.

⁶ Bi' cha' juani ndyu'ni ma̱ cña nu ndyu'ni ya, la cui' tya'a cña nu ndyu'ni ycui' nu Xu'na na. Cua ngusñi ma̱ cha' ji'i̱ ycui' Ni, masi ti'í tsa ti' ngu' ña'a̱ ngu' ji'i̱ ma̱; pana tso'o tsa ntsu'u tyiquee ma̱ xqui'ya Xtyi'i ycui' Ndyosi.

⁷ Lo'o li' na'a̱ xa' la ñati̱ ji'i̱ Jesucristo ñi'ya̱ ndyu'ni ma̱; bi' cha' juani ndyu'ni ngu' ñi'ya̱ nu ndyu'ni cu'ma̱, masi ca ta'a ngu' Macedonia nu ngusñi cha' ji'i̱ ycui' nu Xu'na na, masi ca ta'a ngu' Acaya nu ngusñi cha' bi'.

⁸ Cua ngañi cha' ji'i̱ ycui' nu Xu'na na nde lcaa quichi̱ xqui'ya cu'ma̱. Si'i ngu' Macedonia ti, ni si'i ngu' Acaya ti, masi ca ta'a ñati̱ ji'i̱ Jesucristo, cua ndyuna ngu' cha' bi' tyucui ña'a̱ chalyuu; nga'aa ntsu'u cha' ta ya cha' lo'o ngu' bi' cuentya ji'i̱ ma̱, cha' ngusñi ma̱ cha' ji'i̱ ycui' Ndyosi, cha' cua jlo ti' ngu' cha' bi'.

⁹ La cui' ngu' bi' nda ngu' cha' lo'o ya ñi'ya̱ ngua lo'o ndyalaa ya slo ma̱ tya clyo, cha' li' nguxtyanu ma̱ ji'i̱ lcua ti lo jo'ó nu ntsu'u ji'i̱ ma̱ tya sa'ni la, cha' cua'ni ma̱ cña ji'i̱ ycui' Ndyosi nu lu'ú ca, nu sca ti Ndyosi nu chañi ca.

¹⁰ Lo'o jua'a̱ nchcui' ngu' cha' juani ndu̱ ti' ma̱ ni jacua' tya̱a̱ Jesús nu sca ti Sñi' ycui' Ndyosi, nu cua tyu'u ca su ntucua ycui' Ndyosi cha' ca̱a̱ nde chalyuu chaca quiya'. La cui' Jesús nu ngujuii, lo'o li' ngua'ni ycui' Ndyosi Sti yu cha' ndyu'ú yu chaca quiya', bi' laca nu ngua'ni lyaá ji'na cha' nga'aa xcube' ycui' Ndyosi ji'na, nga'aa caca ñasi̱' Ni ji'na lo'o tyalaa tsa̱ bi'.