Salmos 80 - Chuj San Sebastian Bible

SALMO 80 Lesl yuj sc'anx scolwal Dios

A jun tic sb'it win Asaf tzc'anlb'ej junc mach tzjucb'tzan b'it

¹ Ach quilmal an̈ israel on̈ tic, ach 'aych 'och yilmalc eb' yin̈tl José, eb' 'icha a calnelu yaji, 'aych 'ec' 'a a despacho 'a snan̈l eb' querubín, 'ab' wal tas tzwala.

² Checlj ach cab' 'el 'a eb' yin̈tl Efraín, 'a eb' yic Benjamín yet' 'a eb' yic Manasés. Cotn̈ muc'uc, wul coln̈ 'el yet' a poder.

³ Ach qui Diosal on̈, colwjan̈ quet' on̈, sec tzon̈ q'uex c'och 'icha xon caj on̈. 'O'ch cab' pax a c'ojl 'ayn̈ on̈, sec tzon̈ colchj pax on̈.

⁴ Mamin Jehová, qui Diosal ach on̈, tzta'n̈j oj smasnil, ¿b'a'n̈ to wal tzactj owx 'och 'ayn̈ an̈ a chon̈b' on̈ tic yic matz a chaj qui lesl on̈?

⁵ A qui cusc'ojlal on̈ yet' yal qui sat on̈, a 'ix ac' qui b'ut'jub'oc on̈.

⁶ On̈ ac' wal tzetzxoc yuj eb' 'anma 'ay 'a qui la'nil on̈, ax eb' 'ajc'ojl yajch 'ayn̈ on̈, caw wal tzon̈ sb'uch eb' on̈.

⁷ Ach qui Diosal on̈, caw tzta'n̈j oj smasnil, colwjan̈ quet' on̈, sec tzon̈ q'uex c'och 'icha xon caj on̈. 'O'ch cab' pax a c'ojl 'ayn̈ on̈, sec tzon̈ colchj pax on̈.

A yab'xil jun te snun uva,*r* ch'oxnb'il yaj yuj chon̈b' Israel

⁸ Mamin Jehová, a 'a Egipto 'ix 'ej cot jun te snun uva; 'ix a pechn 'el jun tzo'n̈ chuc nacion̈al 'a sat slu'um, ax 'a slum eb' chi 'ix awj can pax te uva cha.

⁹ 'Ix a'nej can 'aj 'ix awj te cha, caw wal yajn̈ej 'ix 'em sch'an̈l yib' te', xb'ut'j 'el sat lum lum chi yuj te'.

¹⁰ C'uxn xmacchj 'el lum niwc witz yuj yen̈l te', yet' pax eb' te te niwc ste'il, 'ix macchj 'el eb' te yuj sc'ab' te'.

¹¹ 'Ix c'och jen̈n sc'ab' te 'a sti a mar, ax te swol, 'ix c'och yen̈l 'a sti a niwn a Éufrates.

¹² ¿Tas pax yuj 'ix ej can 'el scol-lal te'? Ax tz'aji a eb' b'eymal 'anma tzlaj ch'inn sat te'.

¹³ Wan laj slipn no c'ultquil chitm yib' te'. Ax no calte'al noc', a no wan laj sc'uxn lajwc te'.

¹⁴ Ach qui Diosal on̈, caw tzta'n̈j oj smasnil. Meltzjan̈ cot q'ueln 'ayn̈ on̈; cotn̈ q'ueln 'a satcha'an̈, tza nani tas tzotj te snun uva tic,

¹⁵ atn te snun uva 'ix awj yet' a poder, ax eb' te swol, 'ix a'cn 'och yipnub' eb' te'.

¹⁶ A mach tzu'n 'el te', mto eb' tzn̈usn tz'a'oc, cham cab' eb' yuj yowl a c'ojol.

¹⁷ Cojn b'i'an, to tza b'achb't a c'ab' 'a yib'n̈ jun mach sic'b'il 'el o'oj, atn win rey to ach 'ix ac' yip.

¹⁸ Toto 'ixta', man̈x 'a cab' b'a'n̈ 'oj qui'l qui nab'en 'ayach. Tza'n pax qui q'uinl on̈, sec cojn 'aych 'oj cal qui b'a on̈.

¹⁹ Mamin Jehová qui Diosal ach on̈, caw tzta'n̈j oj smasnil. Colwjan̈ quet' on̈ sec tzon̈ q'uex c'och 'icha xon caj on̈. 'O'ch pax cab' a c'ojl 'ayn̈ on̈ sec tzon̈ colchj pax on̈.