Salmos 42 - Chuj San Sebastian Bible

LIBRO 2 (Salmos 42—72 ) SALMO 42 A Dios tzwa'ch yipc in c'ojol

Sb'it eb' yin̈tl Coré jun tic tzc'an junc mach tzjucb'tzan b'it

¹ Ach in Diosal caw wal tzin nib'j to junn̈j in et'oc 'icha wal snib'n junc no c'ultquil chej yuc' a a yuj tacn̈ti'al, 'ixta waj et'oc.

² Nab'ilchn̈ej wu'uj, yol a c'ab' 'ay in q'uinal. ¿B'a'n̈ wal tzin c'ochx 'a ojltac jun 'ejm xo?

³ Sc'ual yac'wlil woq'ui, axn̈ej yal in sat 'aych yec'b'oc in wejel, yec'b'oc in tacn̈ti'al. Ya' sb'a cha, ax 'a junjn c'u tzc'anb'n eb' 'anma 'ayn 'ixtic: ¿'Aj wal til 'ay jun a Diosal cha? xchi eb'.

⁴ A wal yic tzin nan cot jun tzo'n̈ tic, caw tz'och pitzn syal 'a in c'ojol. Tzin nan cot yic 'ayn 'och 'a scal eb' 'anma', yic tzin jucb'tzan eb' 'a yic tzin c'och 'a atut yet' eb' 'a yic tz'och q'uin̈. Til wal 'aw yic tzaljc'ojlal yet' alj yuj diosal tz'och ta'.

⁵ ¿Tas wal yuj tzjaw in chab'c'ojlal? ¿Tas yuj tzsomchj chan̈ in nab'en? Ach in Diosal tzach wa'ch yipc in c'ojol. A 'aych 'oj wal wach' paxti'. In Colmal aji, in Diosal ach paxi.

⁶ Ach in Diosal caw wal 'ay in cusc'ojlal, yuj cha, til wal 'ejm tzach in na cot 'a lum lum 'ay 'a sti a Jordán yet' 'a lum switzl Hermón yet' lum Misar.

⁷ 'Icha wal a niwc pajew tz'elt 'a sat pac'an, 'ixta wal jun tzo'n̈ niwc yailal 'ix 'ec' 'a wib'n̈ o'oj.

⁸ A 'a c'ual tza ch'ox a chamc'ojlal 'ayin, ax 'a 'ac'wal tzin b'itni. Matz in 'och wan pax in leslwi 'ayach, yujto ach tzac' in q'uinal.

⁹ Tzwaln wal 'ixtc 'ayach: Ach in Diosal, in Colmal ach, ¿tas yuj in 'atcn 'a satc'ojlal o'oj? ¿Tas wal yuj cusc'ojlaln̈ej wec' yuj eb' 'ajc'ojl yajch 'ayin? xin chi 'ayach.

¹⁰ Caw wal tzwab' syal si'mb'il, 'icha to tzma'x poj in b'aquil, yujto tzlaj in yixtc eb' 'ajc'ojol. 'A junjn c'u tzlaj sc'anb'noc eb' 'ixtc 'ayin. ¿'Ajtil 'ay jun a Diosal cha? xchi eb'.

¹¹ ¿Tas wal yuj tzjaw in chab'c'ojlal? ¿Tas yuj tzsomchj chan̈ in nab'en? Ach in Diosal tzach wa'ch yipc in c'ojol, a 'aych 'oj wal wach' paxti'. In Colmal aji, in Diosal ach paxi.