Salmos 37 - Chuj San Sebastian Bible

SALMO 37 Ca'c 'och Jehová yipc qui c'ojol

Sb'it David jun tic

¹ Matz tac' scomn cot cowlec yuj eb' tzb'on maysch'olnil, matz on̈ comn chichnec yuj eb'.

² Yujto yajn̈ej ax satl eb' 'icha te c'ultc c'un stacji, 'icha pax te nichte c'un spucli.

³ Ca'c 'och Jehová yipc qui c'ojol. Qui b'oc tas wach', toto 'ixta', 'oj qui canc cajn 'a sat lum lum tic; 'oj 'ajxocn̈ej tas tzqui c'ux 'a junc'ojlal.

⁴ Tzalj coyc 'a Jehová, ax 'oj 'a'n 'el'choc tas tzqui nib'jec.

⁵ Ca'c 'ab'enal qui b'a 'a yol sc'ab', tzca'nec 'och wal yipc qui c'ojol, sec 'oj 'och quet'ec.

⁶ 'Oj ya' checljoc qui tojl b'eyb'alec yet' qui wach' nab'enalec, 'icha wal stzictznil yoc c'u 'a chimc'ual, 'ixta wal yilxi.

⁷ Sictac tzon̈ 'ajc 'a yojltac Jehová; tzqui tan̈wniec scolwj quet'ec. Man̈ ca'c somchjoc qui nab'enec yuj eb' tzq'ue'ch yuj tas maysch'olnil tzb'o'o.

⁸ Cactquec can owal, tzcactnec can chichnc'ojlal. Man̈ on̈ comn owxoc, yujto a jun tzo'n̈ cha, niwn tas tzjuw 'el yu'uj.

⁹ A eb' tzb'on maysch'olnil 'oj satxoc 'el eb' yuj Jehová. Palta ax eb' tzya'ch sc'ojl 'a 'a, 'oj can cajn eb' 'a sat lum lum tic.

¹⁰ Yic xoj jaye c'u, ax satchan̈ eb' maysch'olnil sb'eyb'al, wach'xam 'oj qui sayc 'ec' eb', toxn man̈x 'oj 'ilchjoc eb' cujec.

¹¹ A eb' 'emmquilal yeq'ui, 'oj scaj eb' lum lum tic; ax ya'n eb' snab'en yaj cajn 'a sat lum 'a junc'ojlal.

¹² A eb' tzb'on maysch'olnil, tzna eb' tas tzyutj yixtn eb' 'anma to wach' snab'en, tzjuch'ch'i ye eb' yiln can 'at yet' schichnc'ojlal.

¹³ Palta ax Jehová, ton̈j tzewj yuj eb', yujto yojtac to a eb' tzb'on maysch'olnil cha, jaye xoj c'u 'ayc' eb'.

¹⁴ A eb' tzb'on maysch'olnil, tzyij q'uet eb' yespada 'a yol yet'ul, tzb'on eb' sjul-lab', sec tz'ejm eb' meb'a yuj eb' yet' eb' 'emmquilal yeq'ui. 'Ixta tz'aj scham eb' wach' sb'eyb'al chi snan eb'.

¹⁵ Palta mun a yespada eb' chi 'oj tecxoc 'och 'a spixan, ax sjul-lab' eb' cha, 'oj wecchjoc cani.

¹⁶ Yel xo wach' jab' wal tas 'ay 'a eb' 'anma wach' snab'en, 'a yib'n̈ sricoal eb' maysch'olnil sb'eyb'al.

¹⁷ Yujto 'oj satxoc 'el eb' maysch'olnil yuj Jehová, palta ax eb' wach' sb'eyb'al, 'oj 'ajxoc ste'nal eb' yu'uj.

¹⁸ A Jehová a 'ojtnac jantc sq'uinl eb' tojl sb'eyb'al, ax tas smacl eb' yaji, 'ayc'n̈ej 'a jun 'ejmn̈ej.

¹⁹ Ax 'a yic maysch'olnil yib'n̈q'uinal, 'a yic 'ay wejel, ma'oj yac' eb' sq'uixwloc, palta 'ayn̈j tas 'oj sc'ux eb'.

²⁰ A eb' maysch'olnil sb'eyb'al, 'oj n̈ilchjoc sc'a'l eb' 'icha wal tacn̈ c'ultac. A eb' 'ajc'ojl yajch 'a Jehová, 'oj 'ulb'xoc 'ejm eb' 'icha tzyac' xepual calnelu, 'oj satcn 'ejm eb' 'icha tab'.

²¹ A eb' maysch'olnil snab'en, a yic tz'och eb' majan, man̈xtzac yac' meltzjoc eb' smajn cha; ax eb' wach' snab'en, caw tz'o'ch sc'ojl eb' 'a junc mach, 'ela pax tzyutj sb'a eb'.

²² A eb' 'aj tz'ajx yaxilal, a eb' 'oj cajnc lum lum tic, ax pax eb' tzcatb'tzax can 'eli, 'oj satxoc can 'el eb'.

²³ A Jehová a tz'i'n b'ey eb' wach' snab'en, tz'ajx can 'och eb' yuj 'a yol jun b'e caw tojol.

²⁴ Wach'xam tztelw 'ejm eb', palta man̈ ye'n̈joc stelw 'ejm eb' cha, yujto a Jehová a yamjnac eb'.

²⁵ An tic xwac' quelmal, ax ticnec 'ichm in xo, palta may 'aj xwil 'ec' sc'annc wa sb'a yunnal eb' wach' snab'en 'a stitc n̈a, yujto 'actb'il can eb' yuj Jehová.

²⁶ A eb' cha, smasnil tiempo tz'o'chn̈ej sc'ojl eb' 'a yit 'anma'il, tzyac' eb' majnil tas 'ay 'a 'a; ax yunnal eb', 'icha to yaxilal yaj eb' 'a scal eb' yit 'anma'il.

²⁷ Qui'c 'el qui b'a 'a scal maysch'olnil. A tas wach' a tzqui b'o'ec, sec 'oj najtxb'oc qui q'uinlec.

²⁸ A Jehová tzchamc'ojlej tas tojol, may 'aj tzyactj can eb' to yicn̈ej yaji, molb'iln̈ej eb' yu'uj. Ax pax eb' maysch'olnil, 'oj satxoc 'el eb' yu'uj, man̈x 'a yin̈tl eb' 'oj canoc.

²⁹ A eb' 'anma tojl snab'en, a eb' 'oj 'i'noc can lum lum tic smacloc, 'oj 'aj cajn eb' 'a sat lum 'a smasnil tiempo.

³⁰ A eb' tojl snab'en, tzpaxtin eb' yet' jelnal, an̈jtona', tzpaxtin eb' 'a stojlal.

³¹ 'Ayc'n̈ej sley Dios 'a snab'en eb', yuj cha, may xon b'a'n̈ 'oj telwc 'ejm eb'.

³² A eb' tzb'on maysch'olnil, q'uelnn̈ej 'och eb' 'a eb' wach' sb'eyb'al, 'aychn̈ej 'a snab'en eb' smiln eb'.

³³ Ma'oj yac' Jehová eb' chi 'a yol sc'ab' eb' tznib'j milnc eb' cha; ma'oj scha alxoc to 'ay smul eb'.

³⁴ Ca'c 'och Jehová yipc qui c'ojol, yiclum tzcutjec qui b'a 'a 'a, ax 'oj qui'nec cha'an̈, ax ya'n lum lum quicooquec. Q'ueln on̈c wal 'ochi, ax satx can 'el eb' maysch'olnil sb'eyb'al cha.

³⁵ 'Ix wil wal eb' 'anma man̈x jantcoc smaysch'olnilal, caw yelc'ojlal xyij chan̈ sb'a eb'. Niwquil xyutj sb'a eb' 'icha wal junc niwquil te yax xi'il,

³⁶ palta yajn̈ej 'ix satl eb', man̈x 'a eb' 'ayq'ui. 'Ix cob' in sayc' eb' palta man̈x 'ic 'ilchj eb' wu'uj.

³⁷ Tzcham wal cochc q'ueln 'a eb' wach' snab'en, caw wach' 'oj 'el'choc eb', yujto a junc'ojlal tzsayc' eb'.

³⁸ Palta ax pax eb' tenmtac, c'uxn 'oj satl eb' smasnil; c'uxn 'oj satxoc 'el pax yin̈tl eb'.

³⁹ A Jehová a tzcolwj yet' eb' 'anma tojl snab'en; a yic tzjaw yailal 'a yib'n̈ eb', a 'a tzcol sb'a eb'.

⁴⁰ A 'oj colnc 'el eb', 'oj colxoc can 'el eb' yuj 'a yol sc'ab' eb' maysch'olnil, yujto a 'aych yipc sc'ojl eb'.