Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Salmos 35 - Chuj San Sebastian Bible


SALMO 35 Tzc'anx scolwal Jehová
Sb'it David jun tic

1 Mamin Jehová, meltzjan̈ 'och 'a eb' tzcomn meltzj 'och 'ayin; 'ac' owl yet' eb' tzyac' owl wet'oc.

2 'Ij chan̈ a yamc'ab' yic owal, tzwul in a colni;

3 'ij chan̈ a lanza yet' a jul-lab' 'a eb' tzin pechn b'eyc'oc. Al 'ayin chajtlto in Colmal aji.

4 A eb' tzin nib'n milnc chamoc, somchj cab' 'el eb' yuj q'uixwc'ojlal, ax eb' tznib'n tas tzin yutej, meltzj cab' eb' 'a spatc yuj xiwc'ojlal.

5 Pechx cab' 'at eb' yuj jun a sat ángel. Lajn cab' tz'aj eb' 'icha solcal 'ixm trigo tz'ijx 'at yuj 'ic'.

6 Q'uic'q'uinl cab'i', n̈el-li cab' sb'e eb' 'aj tzb'eyi, ax cab' jun sat ángel chi tzpechn b'eyc'oc eb'.

7 Wach'xam may in mul, palta sb'ojnac 'ejm eb' sch'an̈ yal 'a wojltac; may xwutj eb', palta 'ix sb'o eb' jun jul sec tzin 'at 'a yojol.

8 Man̈ nanoc cab' yuj eb' yic tzjaw yailal 'a scal eb'. Can cab' eb' 'a jun tzo'n̈ syal 'ix yac' 'ejmi, 'at cab' can eb' 'a yol jun sjul 'ix sb'o cha.

9 Toto 'ixta', 'oj in can 'a tzaljc'ojlal o'oj, yujto ach tzin a colo.

10 Yet' wal smasnil in c'ojol 'oj wal 'ixtic: Caw may mach lajn et' Mamin Jehová. A eb' meb'a' yet' eb' may xon jac tas 'ay 'a 'a, tza colcn 'el eb' 'a yol sc'ab' eb' caw te'n yaji, yet' 'a eb' tz'i'n 'ec' jac tas 'ay 'a eb', 'oj in chioc.

11 Ax eb' testigo 'a'm 'es, a tas man̈ wojcoc, a xlaj ya'ch eb' 'a wib'an̈.

12 A eb' 'aj wach' xlaj wutc in b'a, 'ix meltzj 'och eb' 'ajc'ojlal 'ayin; yuj cha, caw tzyac' eb' cus in c'ojol.

13 Palta an xo pax tic, a yic ya'ay eb', tzwa'n 'och in b'a 'a cusc'ojlal yet' 'a c'ajb'c'ojlal yuj eb'. Tzin cusi, caw matz in 'och wan in leslwi yuj eb'.

14 Caw cusltac in sat tzin 'eq'ui, 'icha wal to a 'in nun, mto junc in wach'c'ojol, mto junc caw wu'tac tzin cus yuj schamlil.

15 Palta ax yic in telw 'ejm yuj in yailal, 'ix q'ue somnjoc eb' in stzetzn smasnil; 'icha to chuc 'anmal eb', coynto man̈ in yojcoc eb', toc tzyactj eb' in sb'ajni.

16 Caw ya in 'ec' yuj eb', in laj sb'uch eb', xjuch'ch'i ye eb' in yiln yet' schichnc'ojlal.

17 Mamin Jehová, ¿jantcto wal tiempo ton̈j tzach 'och q'ueln 'ayn yet' jun tic? Tzin a colcn 'el 'a yol sc'ab' eb' 'icha león tzyutj sb'a 'ayin.

18 'Oj wal-l ab'xil 'a 'aj caw niwn yaj eb' 'anma syamn sb'a, 'oj wal wach' paxti 'aych 'a sat eb' chon̈ab'.

19 A eb' 'ajc'ojl yajch 'ayin, man̈ cab' comn tzaljc eb', man̈ tz'eynoc cab' tzin yutj eb' in yilni. May in mul 'a eb', palta tzcomn chichn 'och eb' 'ayin.

20 Yujto man̈oc junc'ojlal tzsayc' eb'; a yic eb', to tzsay eb' tas tzyutj stzuntzn eb' to tzaljc'ojlal yaj 'a yol schon̈ab'.

21 Caw 'ip tzlaj 'awj chan̈ eb' 'a in patic, tzyaln eb' 'ixtic: 'Iltec wal tz'aji, caw 'ix quilc yet' qui sat, xchi eb'.

22 Mamin Jehová, 'ix eln̈j smasnil jun tzo'n̈ tic, man̈ ach can 'a sictaquil. Man̈ e'l a b'a 'a in tz'ey.

23 Ach in Diosal, cotan̈ wul colin, caw b'onyaji, 'ochn̈ wet'oc.

24 Alcn 'eli to may in mul, sec wach' matz in tzetzx yuj eb' 'anma tic.

25 Comnoc matz yal eb' wuj 'ixtic: Atn wal tic tzqui nib'ej, 'ix juw can 'el 'a jun 'ejmn̈ej cujec, man̈ xchic cab' eb'.

26 A eb' tzalj wu'uj yic tzjaw in yailal, somchj cab' 'el eb' yuj q'uixwc'ojlal. Q'uixw cab' can 'el eb' caw niwc winc tzyutj sb'a 'a wojltac.

27 Palta ax eb' tznib'j 'ilnoc tas tzin 'aj 'el'chi, tzalj cab' chan̈ eb', b'itn cab' eb' yet' tzaljc'ojlal. Nachji tzyaln cab' eb' 'ixtic: A Jehová caw niwn ton yel'chi, 'ay cab' stzaljc'ojlal yuj swach'l jun schecb' tic, xchi cab' eb'.

28 Mamin, 'oj wal-l a tojlal 'a smasnil tiempo; 'a junjn c'u 'oj wal wach' paxti 'ayach.

Biblia Chuj San Sebastian © Sociedades Bíblicas Unidas, 1999.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ