Nehemías 13 - Chuj San Sebastian Bible

A tas 'ix scha b'oj pax*r* Nehemías jun 'ejm xo

¹ A 'a yic jun tiempoal cha, 'ix 'awtx ch'an̈ libro yic Moisés yab' eb' chon̈ab'. X'ilchj 'a ch'an̈ chajtlto a eb' amonita yet' eb' moabita, may b'a'n̈ tztac' yoch eb' 'a scal eb' schon̈b' Dios

² yujto may tas 'ix yac' eb' c'uxxoc, ma'ix yac' eb' 'u'xoc yal yuj eb' quit israelal. A yic eb' to 'ix yac' eb' tumn 'a Balaam yic tzcatb'tzax can eb' yu'uj. (Palta ax qui Diosalec, a 'ix 'a'n meltzjoc 'och jun catb' chi 'a wach' paxti'al).

³ Yuj cha, a yic xyab'n eb' quit chon̈b' tas tzyal ch'an̈ ley cha, 'ix spojn 'el eb' smasnil eb' 'anma chuc chon̈b'al cajn 'a scal eb'.

⁴ A yic mantzac uj jun cha, a Eliasib ya'mal 'och sti eb' 'anma 'a Dios, a 'aych yajlil yiln jun tzo'n̈ cuarto 'a yatut qui Diosalec. A Eliasib cha, to 'ay yaln yic 'a eb' yin̈tl Tobías;

⁵ yuj cha, 'ix ya'n jun niwquil cuarto 'a 'a, atn jun 'aj tzlaj molx q'uen ofrenda 'a yaln̈taxi, 'aj tzmolx incienso, jun tzo'n̈ yamc'ab', sdiesmoal 'ixm trigo, yal uva yet' aceite. A jun tzo'n̈ chi 'ix alxi to tz'ajx 'a eb' levita, 'a eb' tzb'itni, 'a eb' tan̈m puerta, yet' 'a eb' ya'mal 'och sti eb' 'anma 'a Dios.

⁶ Palta a yic 'ix 'uj smasnil jun tzo'n̈ tic, an tic, man̈ in 'ayc 'ec' 'a Jerusalén, yujto 'a yic 32 ab'il xo yoch Artajerjes reyl 'a yib'n̈ eb' 'aj Babilonia, in meltzj pax 'a win rey cha. A yic xlajw yec' jaye'oc c'ul wu'uj, xin c'ann pax in permiso 'a win rey,

⁷ in meltzj pax cot 'a Jerusalén. Xlajw cha, xwab'n yuj jun maysch'olnil x'el sb'on Eliasib, yujto 'ix can 'a sc'ojl ya'n 'a Tobías jun niwquil cuarto 'ay 'a yatut Dios.

⁸ Caw 'ix cot wowl si'mb'il yuj jun cha. Yuj cha, smasnil jun tzo'n̈ tas 'aych yuj Tobías 'a yojol, xwa' julxoc 'elt smasnil 'a sti jun cuarto cha.

⁹ Xlajw cha, xwalni to tzsacb'tzax jun tzo'n̈ cuarto cha, 'ix wa'n 'ajxoc 'och jun tzo'n̈ yamc'ab' yic yatut Dios jun 'ejm xo 'a yojol, yet' ofrenda yet' incienso.

¹⁰ An̈jtona', xwab'n paxi to man̈xtzac 'ajx jun tzo'n̈ tas tzc'uxx 'a eb' levita, yet' eb' tzb'itni, eb' 'aych 'a yib'n̈ ya'n 'emmquilal, yuj cha, tolab' 'atnc eb' 'eloc, 'ix pax junjn eb' 'a slu'um.

¹¹ Xlajw cha, in owx 'a eb' yajl yaji, xwaln 'a eb' 'ixtic: ¿Tas yuj 'aycn yatut Dios tic eyu'uj? xin chi 'a eb'. Xwa'n syam sb'a eb' ya'mal 'och sti eb' 'anma 'a Dios yet' eb' levita, xwa'n pax 'och eb' 'a yopiso jun 'ejm xo.

¹² Ax smasnil eb' 'aj Judá, 'ix yij cot pax eb' sdiesmoal 'ixm trigo, yal uva yet' aceite 'a yet'l 'aj tzmolxi.

¹³ Xlajw cha, xwa'n 'och Selemías ya'mal 'och sti eb' 'anma 'a Dios yilmalc 'aj tzmolx jun tzo'n̈ cha, yet' Sadoc 'ajtzib' yet' pax jun levita Pedaías sb'i. An̈jtona', xwa'n pax 'och Hanán, yunnal Zacur, yixchicn Matanías colwjoc yet' eb', yujto a eb' cha, caw wach' snab'en eb'. Atn eb' chi xcan 'a yol sc'ab' spojn 'ec' tas tzc'uxx eb' yican eb' cha.

¹⁴ Xwaln 'ixtc 'a in lesal: Ach in Diosal, na cot jun tzo'n̈ tas xin b'o tic. Man̈ 'at satc'ojlal o'oj, atn jun tzo'n̈ tas xin b'o yet' in chamc'ojlal 'a atut, 'a 'aj tz'och 'emmquilal 'ayach, xin chi.

¹⁵ A 'a yic jun tiempoal cha, xwila to 'ay eb' 'a yol yic Judá tic, ste'l eb' yalil yuva 'a sc'ul 'iljelal. 'Ay pax eb' tz'ec' cuchj trigo, tz'ec' e no b'uro cuchj yal uva, cuchj uva 'a sc'ojlab'il, cuchj higo yet' tzann̈j 'ictzal. An̈jtona', tzyi'n pax cot eb' jun tzo'n̈ chi schon̈ 'a sc'ul 'iljelal 'a Jerusalén. Yuj cha, in owx 'a eb', yujto tz'ec' eb' 'a yib'an̈.

¹⁶ An̈jtona', 'ay eb' 'aj chon̈b' Tiro cajn 'a Jerusalén, yet' eb' no chay yet' smasnil tzann̈j chon̈al, yic tzchon̈n eb' 'a eb' wit israelal.

¹⁷ Yuj wal cha, in owx 'a eb' yajl yaj 'a yol yic Judá, xwaln 'a eb' 'ixtic: —Man̈ jantcoc maysch'olnil tze b'o 'a sc'ul 'iljelal, comn xoj tzeyutej.

¹⁸ Atn jun tzo'n̈ tic sb'ojnac eb' qui mam quichmec, yuj wal cha, xya'n cot qui Diosal jun tzo'n̈ maysch'olnil 'a quib'n̈ec yet' 'a yib'n̈ jun chon̈b' tic. ¿Tom tze nib'j tze tzuntzj cot yowl sc'ojl Dios 'a quib'n̈ec an̈ israel on̈c tic, yuj cha, comn xoj tzeyutj sc'ul 'iljelal? xin chi 'a eb'.

¹⁹ Xlajw cha, xwa'n macx spuertail chon̈b' Jerusalén 'a yemc'ual yic jab'xoj yel yich sc'ul 'iljelal, ma'ix jacwi masnto 'ix 'ec' sc'ul 'iljelal cha. An̈jtona', xwa'n 'och jaywn̈ eb' in checb' stan̈wc sti puerta cha, sec wach' may junc 'ictzal chon̈ chi tz'oxt 'a jun c'u cha.

²⁰ Ax eb' chon̈wjum cha, 'ix can eb' chab' 'oxe 'ac'wl 'a spatquil 'el Jerusalén.

²¹ Yuj cha, xin ten in b'a yet' eb', xin tenn 'och wan eb' yujto tz'ec' chab' 'oxe 'ac'wl yuj eb' 'a spatquil muro tic. Yuj cha, xwaln 'a eb' 'ixtic: Toto tze b'o jun 'ejm xo 'ixtic, 'oj ex wa'ch 'a preso, xin chi 'a eb'. 'Ixtnta x'aj eb' yoch wan sjawi.

²² Xlajw cha, xwaln 'a eb' levita to tzsacb'tzej sb'a eb', yic tz'at eb' 'at stan̈wc puerta cha, sec wach' matz tz'ixtx 'el sc'ul 'iljelal. Yuj cha, xwaln 'ixtc 'a in lesal: Ach in Diosal, nan cot yuj jun tzo'n̈ tic, 'o'ch cab' 'a c'ojl 'ayn yuj a wach'c'ojlal, xin chi.

²³ An̈jtona', a 'a yic jun tiempoal cha, xwiln paxi to 'ay eb' wit israelal xyij sb'a yet' eb' 'ix 'aj Asdod, eb' 'ix 'aj Amón yet' eb' 'ix 'aj Moab.

²⁴ A spacloc eb' yunnal eb', tztac' yaln eb' sti eb' 'aj Asdod yet' sti jun tzo'n̈ xo nacion̈, palta man̈xtzac stac' yaln eb' sti eb' quit israelal.

²⁵ A yuj jun cha, xin tej in b'a yet' eb', xin catb'tzej can eb'. 'Ay eb' xin mac'a, xin to'n 'el xil sjolm eb', xwa'n pax pural eb' ya'n sti 'a Dios, to man̈xtzac yij sb'a yunnal eb', yisl eb' yet' eb' chuc chon̈b'al. An̈jtona', matz tac' pax yoch eb' 'ix chuc chon̈b'al chi yistloc eb'. 'Ix waln pax 'ixtic:

²⁶ 'Ixtn tic x'aj yoch smul Salomón sreyl Israel. Wach'xam may junc xo rey lajn yet' 'a jun tzo'n̈ xo nacion̈, to 'ay schamc'ojlal Dios 'a 'a, 'ix 'ajx 'och qui reyloc an̈ israel on̈c tic, palta 'ix 'ijx 'at 'a maysch'olnil yuj eb' 'ix chuc chon̈b'al.

²⁷ Yuj cha, ma'oj yal qui c'ojl e locn e mul yel xo maysch'olnil 'a sat qui Diosalec, yic tzeyi'n e b'a yet' eb' 'ix chuc chon̈b'al, xin chi 'a eb'.

²⁸ A junc eb' yunnal Joiadá, yixchicn Eliasib, sat ya'mal 'och sti eb' 'anma 'a Dios, n̈ilab'il yaj 'a Sanbalat, atn win horonita, a jun win n̈ilab'il cha, xin pechl 'a in tz'ey.

²⁹ Yuj cha, xwaln pax 'ixtc 'a in lesal: Ach in Diosal na cot jun tzo'n̈ eb' x'a'n juwc 'el jun 'opiso yic tzya'n 'och eb' sti eb' 'anma 'ayach, yet' a trato xa b'o yet' eb', yet' eb' levita, xin chi.

³⁰ 'Ixtnta xwutj in b'on smasnil tastc 'ix juw yuj eb' chuc chon̈b'al; xwa'n 'och eb' ya'mal 'och sti eb' 'anma 'a Dios yet' eb' levita 'a yopiso, junjn eb' tzyil yopiso 'a stzolil.

³¹ 'Ix waln yuj te c'atzitz, tas c'ul tz'ijx cot te', xwaln pax yuj sb'ab'l sat yawb'en eb' quit chon̈ab', to yowlal tzyij cot eb' 'a yatut Dios. Yuj cha, xwaln 'a in lesl 'ixtic: Ach in Diosal, nan coti, 'o'ch cab' 'a c'ojl 'ayin, xin chi 'a Dios.