Ex 3 - Chuj San Sebastian Bible

'Awtb'il Moisés yuj Dios

¹ 'Ix 'och Moisés 'ilj calnelu 'a sn̈i', atn win Jetro cha. 'Ay jun c'ual 'ix 'at Moisés chi 'ilj calnelu 'a lum cusltac lu'um, masnto 'ix c'och 'a yich witz Horeb, atn 'a jun witz chi 'aj sch'ox sb'a Dios 'a 'a.

² Ata 'ix sch'ox sb'a jun yángel Jehová 'a scal jun te q'uix tzn̈ilchj sc'aq'uil; caw ow sn̈ilchj sc'a'l te', palta matz lajw te stz'a'i.

³ Yuj cha, 'ix snan Moisés chi 'ixtic: Caw wal satjub'tac yilx jun cha, ¿tas yuj matz lajw te q'uix chi stz'a'i? Wach' to 'oj 'at wila', xchi.

⁴ Ax yic 'ix yiln Jehová to wan sc'och Moisés chi 'a stz'ey te c'ac' cha, 'ix paxtin 'elt 'a scal te', xyaln 'ixtic: —Moisés, Moisés, xchi. —Waj Mamin, xchi Moisés cha.

⁵ 'Ix yaln Dios 'ixtc 'a 'a: —Man̈ ach 'ochlc 'a tic, 'ij 'el a xan̈ab', yujto a jun lugar 'aj tzach jaw tic, an 'ay wico', an 'ayn 'ec' 'a tic.

⁶ An tic, sDiosal in eb' a mam echam, atn Abraham, Isaac yet' Jacob, xchi Dios. A yic xyab'n Moisés yalx jun tzo'n̈ paxti cha, 'ix smacn 'och sc'ab' 'a sat, yujto caw xiw yiln Jehová.

⁷ 'Ix yaln Jehová 'ixtic: —Wal yel caw wal 'oltac tz'aj eb' in chon̈b' yab'n syal 'a Egipto, tzwab' yoc' eb' yuj tas tz'aj yixtx yuj eb' 'aych yilmalc eb'. Wojtac to caw wal 'oltac tz'aj eb' in chon̈ab'.

⁸ Yuj cha in 'emli, yic tzwul in colnc 'elt eb' 'a yol sc'ab' eb' 'aj Egipto cha. 'Oj wic' 'elt eb', ax wi'n 'at eb' 'a jun lum lum caw lewan, caw wach', til wal tas 'ay 'a jun lum cha. Atn lum 'aj cajn eb' cananeo, eb' hitita, eb' amorreo, eb' ferezeo, eb' heveo yet' eb' jebuseo.

⁹ Caw wal tzq'ue'ch yaw eb' et israelal yawj 'ayin, yujto til wal tz'aj eb' yixtx 'a 'aj 'aych mosoal cha.

¹⁰ Yuj cha, 'ixc ticnec, ach tzach wa'ch 'a sat paxtinc 'a win sreyl Egipto cha, ach 'oj a paxtin 'a winac, ax e'n 'elt eb' in chon̈b' chi 'a jun lugar cha, xchi Dios.

¹¹ Palta 'ix yaln Moisés 'ixtc 'a Dios: —¿Tas waj an tic, yuj cha, 'oj stac' in 'at paxtinc 'a sat win rey cha, ax wi'n 'elt eb' wit israelal 'a Egipto cha? xchi Moisés.

¹² 'Ix ta'w pax Jehová, 'ix yaln 'ixtic: —Wal yel an 'oj woch et'oc, 'ay jun ch'oxnb'il 'oj wac' 'ayach, chajtlto an tzach in checb'ti. Ax yic tox 'ix 'elt eb' in chon̈b' chi oj 'a Egipto cha, ax wul eya'nc 'ejm e b'a 'ayn 'a jun witz tic, xchi Dios.

¹³ Xlajw cha, 'ix yaln pax Moisés 'ixtc 'a Dios: —Caw wal 'ajltac jun tic, q'uinloc an tzin 'at paxtinc 'a eb' wit israelal cha, tzwaln 'ixtc 'a eb': A qui Diosalec yet' eb' qui mam quicham, a tzin checn cot 'ayex, toto xin chi 'a eb', ax sc'anb'n am eb' 'anma chi 'ayin: ¿Tas sb'i jun tzal cha? xchi am eb' 'ayin. ¿Tas pax tzwutj ta'wc in b'a 'a eb'? xchi Moisés.

¹⁴ 'Ix ta'w pax Jehová 'ixtc 'a Moisés: —AN TIC 'AYNÑEJ XON 'EQ'UI. 'Ixta tzotj aln 'a eb' et chon̈b' cha: AN TON TIC, an tzach in checb'ti, xchi Dios.

¹⁵ 'Ix yaln pax Jehová 'ixtc 'a Moisés: —Al 'ixtc 'a eb' et chon̈b' cha: A Jehová qui Diosalec yet' eb' qui mam quichmec, atn Abraham, Isaac yet' Jacob, a in checn cot colwjoc 'ayex, xa chi 'a eb'. A 'in b'i tic, 'ayc' 'a jun 'ejmn̈ej; 'oj b'inaxc 'a smasnil tiempo yuj eb' eyin̈tl b'aq'uin̈.

¹⁶ 'Ixic, 'at yamb'tzej eb' yichm wincal chon̈b' Israel, tzaln 'a eb' 'ixtic: A Jehová qui Diosalec yet' eb' qui mam quicham, atn Abraham, Isaac yet' Jacob, a 'ix sch'ox sb'a 'ayin, 'ix yaln 'ixtic: Wal yel tzwil tas tz'aj eyixtx 'a Egipto.

¹⁷ 'Ix wala to 'oj ex in col-l 'a yaln̈ jun eyailal tic, ax ex wi'n 'at 'a jun lum lum caw wal wach', caw 'ay syaxil sat, atn 'a 'aj cajn 'ec' eb' cananeo, eb' hitita, eb' amorreo, eb' ferezeo, eb' heveo yet' eb' jebuseo, xchi Dios, xa chi 'a eb'.

¹⁸ 'Oj scha eb' yab' 'ayach. Tzlajw cha, tzach 'at yet' eb' yichm wincal chon̈b' Israel 'a yojltac win sreyl Egipto cha, tzeyaln 'a win 'ixtic: A Jehová qui Diosal an̈ hebreo on̈ tic on̈, a 'ix sch'ox sb'a 'ayn̈ on̈. Yuj cha, to tzon̈ a chaj 'at 'a lum cusltac lu'um, to tz'at cac' qui xajmb'al 'a qui Diosal on̈, 'aym 'oxe'oc c'u ste'nb'il jun lugar cha, xe chi 'a winac.

¹⁹ Palta wojtac to ma'oj ex scha 'elt win sreyl Egipto cha, 'ac'b'il puralil, yet' cal owlal 'oj eyaj eyelta.

²⁰ Yuj cha, 'oj in ch'ox in poder, 'oj wac' yailal to satjub'tac yilx 'a yib'n̈ jun nacion̈ cha, 'ixta 'oj wutoc, sec 'oj ex yac' 'elt win rey chi 'a libre.

²¹ An̈jtona', an 'oj wac' snab'enoc eb' 'aj Egipto cha, sec 'ay eyel'ch 'a sat eb', caw wal tzaljc'ojlal 'oj eyaj eyelta, may tas ma'oj eyic' ax eyelta.

²² Junjn eb' 'ix 'ix israel, 'oj sc'an eb' 'ix tas 'ay 'a eb' 'ix 'aj Egipto cajn 'a stz'ey. Toxn̈ej tzann̈j 'ixl 'ayc' 'a e cal, 'oj yac' eb' plata mto oro, mto pichul, sec a 'oj eya'ch yet' eb' eyunnal yic 'oj eyelta. 'Ixta 'oj eyutc eyi'n 'ec' tas 'ay 'a eb' 'aj Egipto cha, xchi Dios.