Ex 12 - Chuj San Sebastian Bible

A q'uin̈ yic yel eb' israel 'a libre

¹ Yaljnacx pax Jehová 'ixtc 'a Moisés yet' 'a Aarón 'a Egipto cha:

² A jun 'uj tic, niwn cab' yel'ch 'a e sat, b'ab'l 'uj tz'ajcn 'a yol junjn ab'il.

³ Alc 'a smasnil eb' eyit israelal yuj jun checnb'il tic. To a yic lajn̈e yoch jun 'uj tic, junjn mamb'il 'oj yi' cot junjnoc squelm calnelu mto chiwo, junjn no 'a junjn n̈ail yic tzchix no'.

⁴ Toto man̈ niwnoc e b'ey 'a yol eyatut, matz lajw no e chini, tztac' eyawtn cot eb' cajn 'a e tz'ey, sec tzcolwj eb' schin no eyet'oc. Tze pojc' no chib'j chi 'a eb', a tzyal jantc sb'isl eb' 'anma cha, mto a tzyal jantc tzchi junjn eb'.

⁵ A no noc' cha, yowlal cab' jun ab'il xo sq'uinl no', no may spaltail 'a sniwnal, wach'xam chiwo mto calnelu, cojn toto smam no'.

⁶ Ton̈j tze si'cn 'elt no', masnto 'a yic chan̈lajn̈e yoch jun 'uj tic, atta 'oj e mil cham no 'a jun c'u cha. A yic wan xo sq'uic'b'i ax e miln eyic e masnil.

⁷ Smasnil te n̈a 'aj 'oj chixoc no noc' cha, junjn mamb'il 'oj succh jac schic'l no noc' chi 'a sjolm smarcoal smac yatut yet' 'a smarcoal 'a smo'och.

⁸ A 'a yic jun 'ac'wl cha, yic 'oj e chinc no chib'j cha, ton̈j 'oj e b'ol no'. 'Oj e chi no chib'j cha, ax e wan pax 'ixm pan may yich, ax e lon te 'itj caw c'a.

⁹ May xon jac tas tzeyax chi'ej, man̈ e tz'an̈ pax no 'a yol chen. Ton̈j tze b'oln̈j no smasnil: no sjolom, no yoc, yet' no yolsc'ojol.

¹⁰ Man̈ eyactc can jacx no 'a yic junc xo c'u. Toto matz lajw no eyuj 'a jun 'ac'wl cha, tze wach' n̈usjtz'a no'.

¹¹ A yic tzex wa cha, lista xo cab' eyaji. 'Ayx 'och cab' e pichl yic b'eyl eyu'uj, 'ayx 'och cab' e xan̈ab', yamb'ilx cab' e c'ococh. Caw wal ji'ltixn̈ej 'oj eyutc e chin no', yujto an Jehová in, an 'oj wec' 'a jun 'ac'wl cha.

¹² An Jehová in, an tzwala: To a wal 'a jun 'ac'wl cha, 'oj wec' 'a yol yic Egipto tic smasnil. 'Oj 'ec' in mil cham sb'ab'l 'unnal junjn 'anma 'a junjn n̈ail, yet' sb'ab'l 'une no cajb'en noc', ax wa'n lajwc 'ejm sdiosal eb' 'aj Egipto tic.

¹³ A schic'l no noc' chi 'oj e succh 'a smac eyatut cha, a 'oj ch'oxnoc 'ajtil 'ay te n̈a chi 'aj cajn ex, sec a yic 'oj wec' in mil cham eb' b'ab'l 'unn 'a eb' 'aj Egipto tic, may junc ex 'oj e chami. A yic 'oj wilnc 'och chic' cha, c'ax'e'l 'oj weq'ui.

¹⁴ A jun c'u cha, niwn cab' yel'ch tz'ajcn 'a e sat, tzeya'ch junc niwquil q'uin̈ yic tzeyi'n chan̈ in b'i an Jehová in tic. Smasnil tiempo tze na cot jun tic, ax snan cot eb' eyunnal b'aq'uin̈. Ley tz'ajcn jun tic 'a e cal 'a smasnil tiempo.

'Ixm pan may yich

¹⁵ Uque c'u 'oj e wa 'ixm pan may yich cha. A 'a yic b'ab'l c'u, tze julcn 'el smasnil yich pan 'ayc' 'a eyatut junjn ex. Toto 'ay junc mach tzwan 'ixm pan 'ay yich 'a e cal 'a jun c'u cha, yowlal tz'ijx 'el 'a e cal.

¹⁶ A 'a yic b'ab'l c'u cha, tzeyam e b'a yic tzex 'och 'emmquilal 'ayin, 'ixta tzeyutj pax 'a yic yucl c'ual. A 'a chab' c'u cha, may xon mach tzmunlji, cojn tas tze c'uxu a tztac' e b'oni.

¹⁷ Yowlal tzeyiclj jun q'uin̈ yic 'ixm pan may yich, yujto a 'a yic jun c'u cha, ata 'oj ex wic' 'elt e masnil 'a yol yic Egipto tic. Junjn ab'il tze nan jun q'uin̈ cha; ley tz'ajcn jun chi 'ayex, 'oj syiclcn̈ej eb' eyin̈tl b'aq'uin̈.

¹⁸ Tz'el yich e wan 'ixm pan may yich, 'a yemc'ul 'a chan̈lajn̈e yoch b'ab'l 'uj, masnto 'a yic junschawinc yoch jun 'uj chi 'a yic yemc'ual.

¹⁹ A 'a jun uque c'u cha, may cab' junc mach 'ayc' yich pan yuj 'a yatut. Toto 'ay junc mach tzwan 'ixm pan 'ay yich, junc chuc chon̈b'al mto eyit israelal; a jun cha, yowlal tz'ijx 'el 'a e cal.

²⁰ Yuj cha, man̈ e c'ux tas 'ay yich, yaln̈j 'ajtil 'ayx 'eq'ui, cojn 'ixm pan may yich tze wa'aj, xchi Dios 'a Moisés.

²¹ 'Ix yawtn cot Moisés eb' 'ichmtac winc 'a scal eb' yit israelal cha, xyaln 'ixtc 'a eb': 'At si'c can 'el junjnoc e quelmtac calnelu mto chiwo, to 'oj e mil no e chi yet' eb' eyunnal, yic tze nan q'uin̈ yic tzon̈ 'elc 'a libre.

²² Tze chan schic'l no 'a yol junc palagan, tze sayn jun yuchc te sc'ab' hisopo, tze lab'n 'ejm 'a scal schic'l no cha, tze sucn 'och 'a smasnil smarcoal smac eyatut. May junc ex tzex 'elt 'a sti smac eyatut, masnto tzsacb'i.

²³ Yujto a yic 'oj 'ec' Jehová 'a jun 'ac'wl cha, 'oj 'ec' smil cham eb' 'anma 'a Egipto tic, ax yiln 'och chic' 'a sti smac eyatut cha, c'ax'e'l 'oj 'ec'oc, ma'oj chaxc 'och jun ángel chi smil eb' b'ab'l 'unn 'a yol eyatut.

²⁴ A jun checnb'il tic 'oj eyiclcn̈ej, ax syiclni pax eb' eyin̈tl b'aq'uin̈. 'Icha junc ley may slajub', 'ixta tz'ajcn jun tic 'ayex.

²⁵ A yic 'oj e c'och 'a sat lum lum 'aj ya'jnac Jehová sti ya'n eyico'oc, yowlal 'oj eyiclcn̈ej jun q'uin̈ tic.

²⁶ A yic 'oj sc'anb'noc eb' eyunnal 'ixtc 'ayex: ¿Tas tzch'ox jun q'uin̈ tic? 'oj schic eb'.

²⁷ Ax eyaln 'ixtc 'a eb': A jun q'uin̈ tic, yic snanb'il cot queltec 'a libre 'a Egipto, atn yic scham no calnelu xajmb'al-l 'a Jehová, yic 'ec' smilnc cham Jehová eb' b'ab'l 'unn 'a Egipto cha. Ax 'a sti catutec, c'ax'e'l x'eq'ui. 'Ixta 'ix yutj Jehová scoln can 'el eb' 'unnab'il 'ayn̈ 'a yic jun tiempoal cha, 'oj e chic 'a eb', xchi Moisés. A yic 'ix lajw yaln jun tzo'n̈ tic, 'ix 'em n̈ojnjoc eb' yit israelal ya'n 'emmquilal 'a Jehová.

²⁸ Yajn̈j wal cha, syamn 'och eb' syiclni mto sb'on 'icha 'ix yutj Jehová yaln 'a Moisés yet' 'a Aarón.

Schamlil eb' b'ab'l 'unn 'aj Egipto

²⁹ Ax 'a yic chim'ac'wal, 'ix 'ec' smilnc cham Jehová eb' sb'ab'l 'unnal eb' 'aj Egipto 'a junjn n̈ail. 'Ixta 'ix 'aj scham win sb'ab'l 'unnal win rey, win to jab'xoj yochx can sjelc win 'a sdespacho; xcham pax eb' sb'ab'l 'unnal ewin 'aych 'a preso yet' pax sb'ab'l 'une e no noc'.

³⁰ A smasnil eb' 'aj Egipto, 'ix q'ue wan eb' 'a yic jun 'ac'wl cha. Caw wal tz'oc' win rey, tz'oc' pax eb' 'aych yajlil yet'oc, yet' smasnil eb' 'anma 'a yol yic Egipto cha, yujto man̈x 'a junc n̈a 'ajtil may chaml 'ix 'ochi.

³¹ Atn 'a jun 'ac'wl cha, ata 'ix yac' win rey 'awtxoc Moisés yet' Aarón, 'ix yaln 'a eb' 'ixtic: —A ticnec 'ixquec muc'uc. 'Ijec 'at smasnil eb' eyit israelal cha, 'ijec 'el e b'a 'a scal eb' wit chon̈b' tic. 'At 'a'c 'emmquilal 'a Jehová 'icha tzeyutj eyaln cha.

³² 'Ijec 'at smasnil e cajb'en noc' chi eyet'oc: e calnelu, e wacax, e chiwo. 'Ixquec muc'uc, tzex tew 'a Jehová wu'uj, xchi win rey cha.

³³ Locn eb' 'aj Egipto chi xchecn 'elt eb' israel cha, sec yajn̈ej tz'el eb' 'a yol schon̈b' eb', yujto tzna eb' 'aj Egipto cha, toq'ue tzcham eb' smasnil.

³⁴ Ax eb' israel cha, 'ix yi'n q'uet eb' 'ixm harina 'a yol yet'ul, 'ixm to mant 'a yich, toxn̈ej 'ix spichch eb' 'ixm 'a yol sábana yet' scajonal, 'ix ya'n q'ue eb' 'a squelab'.

³⁵ 'Ix syiclni eb' israel chi tas 'ix yal Moisés, sc'ann eb' oro, plata yet' pichl 'a eb' 'aj Egipto cha.

³⁶ 'Ix paxtin Jehová 'a snab'en eb' 'aj Egipto cha, wach' 'ix yutj eb' snab'en 'a eb' israel, 'ix ya'n eb' smasnil tas sc'an eb' cha. 'Ixta wal 'ix yutj eb' yi'n 'ec' tas 'ay 'a eb' 'aj Egipto cha.

'Elnc eb' israel 'a Egipto

³⁷ 'Ix 'el eb' israel 'a Ramesés, 'ix jaw eb' 'a Sucot. 'Aym waque'oc ciente mil eb' winc smoj yoch soldadoil, matz 'och eb' 'ix yet' eb' 'unn sb'isloc.

³⁸ An̈jtona', til wal scalnelu eb' xyij coti, xyi'n cot eb' swacax yet' schiwo. Til wal eb' chuc chon̈b'al 'ix cot yet' eb'.

³⁹ Man̈x 'a tiempo 'ix sb'o eb' tas sc'uxu, ji'ltixn̈ej xpechx 'elt eb' yuj eb' 'aj Egipto cha. Toxn̈ej sb'ol eb' yoch cha, atn 'ixm harina may yich xyij cot eb'.

⁴⁰ A eb' israel cha, 430 ab'il xo sc'och cajn eb' 'a Egipto cha, 'ix 'el paxt eb'.

⁴¹ A 'a jun c'u 'aj 'ix tz'acw 430 ab'il sc'och eb' 'a jun lugar cha, ata 'ix 'elt eb' schon̈b' Jehová 'a yol yic Egipto.

⁴² A wal 'a yic jun 'ac'wl cha, 'ix munlj Jehová yic xyi'n 'elt eb' schon̈ab'. Yuj cha, 'a junjn ab'il yowlal tzna cot eb' israel chi jun tic, tz'el swayn̈ eb' 'a jun 'ac'wl 'aj ujnac jun tic, yic tzyi'n chan̈ eb' sb'i Jehová 'a smasnil tiempo.

Leyl yic q'uin̈ yic yel eb' israel 'a libre

⁴³ 'Ix yaln Jehová 'a Moisés yet' 'a Aarón 'ixtic: —Tic tzwalcni tas sleyl q'uin̈ yuj snanb'il cot eyel 'a libre tic: May junc eb' chuc chon̈b'al tztac' schin no xajmb'al.

⁴⁴ A ewin e moso to manb'il eyu'uj, toto 'ac'b'ilx circuncidar ewinac, tztac' schin eb' no' yet' eb' 'ix eya'mal servil.

⁴⁵ A pax junc eb' chuc chon̈b'al ton̈j tz'ec' 'a e cal, mto ton̈j tzsay munljoc sb'a 'a e cal cha, matz tac' schin eb' no'.

⁴⁶ Cojn 'a yol te n̈a 'a 'ajtil tzb'o no chib'j cha, ata tztac' schix no', matz tac' yijx 'at no 'a junc xo n̈ail, matz tac' stzu'x poj sb'acl no'.

⁴⁷ A jun checnb'il tic, 'oj eyiclc smasnil ax israel ex tic.

⁴⁸ Palta toto 'ay junc win man̈ israeloc 'ayc' 'a e cal, tznib'j tzyiclj q'uin̈, b'ab'el tz'ajx can circuncidar eb' winc 'ay 'a junjn n̈ail, 'ixta to b'i'an, tztac' snan eb' jun q'uin̈ cha, 'icha to eyit chon̈b' tz'aji. A pax junc winc man̈ 'ac'b'ilc circuncidar, matz tac' schin win no xajmb'al cha.

⁴⁹ A jun ley tic, yowlal tzyiclj smasnil eb' 'anma tz'alj 'a e cal, yet' eb' chuc chon̈b'al tzjaw cajn 'a e cal, xchi Dios.

⁵⁰ Smasnil tas xyac' Jehová yal Moisés yet' Aarón, syiclj smasnil eb' yit chon̈b' eb' cha.

⁵¹ A 'a jun c'u cha, stzol-l 'ix yutj Jehová yi'n 'elt eb' israel 'a sat slum eb' 'aj Egipto.