Dt 26 - Chuj San Sebastian Bible

A sb'ab'l sat 'awb'en*r* yowlal tz'ajx ofrendail

¹ A yic tox ex c'och cajn 'a sat lum lum 'oj yac' Jehová qui Diosalec eyico'oc, a yic tzex munlj 'och 'a sat lu'um,

² ax sb'ab'l sat eyawb'en, tzeyac' 'ejm 'a yol junc xu'uc, tzeyi'n 'at 'a jun lugar sic'b'il 'el yuj Jehová qui Diosalec, 'a 'aj tzex 'och 'emmquilal 'a 'a.

³ Ata tzex c'och 'a yojltac eb' 'aych ya'malc 'och sti eb' 'anma 'a Dios 'a jun tiempoal cha. Tzeyaln 'a eb' 'ixtic: An̈ tic, tzcal 'a yojltac Jehová qui Diosalec, chajtlto on̈ jaw cajn 'a sat lum lum 'ix yac' Jehová sti ya'n 'ayn̈ 'a eb' qui mam quichmec, xe chi.

⁴ Ax schan 'ec' win ya'mal 'och sti eb' 'anma chi jun xuc chi 'ayex, tzya'n 'och win 'a yojltac yet'l xajmb'al yic Jehová.

⁵ Tzlajw cha, tzeyaln jun tzo'n̈ xo paxti tic 'ixtc 'a sat Jehová qui Diosalec: A eb' qui mam quichmec, arameo eb', jaywn̈ej wal sb'ey eb'; ton̈j 'e'lb'a yec' eb', 'ijn xcham eb' yuj wejel; yuj cha, x'atcn eb' 'a Egipto yet' jaywn̈ yunnal, ata xcan cajn eb' ta'. Axta 'ix 'och eb' niwquil chon̈b'al, caw jeln x'aj eb', caw niwn pax x'aj sb'isl eb'.

⁶ Palta caw 'oltac x'aj eb' yuj eb' 'aj Egipto cha. 'Ix yab' eb' syal si'mb'il, yic x'ajx 'och eb' 'a munljel caw ya.

⁷ Yuj cha, 'ix sc'ann eb' 'a Jehová qui Diosalec yet' eb' qui mam quichmec cha, to tzcolwj yet' eb'. 'Ix yab'n Jehová tas sc'an eb' cha, xyiln paxi, to caw ya munljel 'aj 'aych eb', 'oltac tz'ec' eb' smunlj 'a eb' 'aj Egipto cha.

⁸ Yuj cha, sch'oxn wal Dios spoder to 'ay xo smay yilxi, caw satjub'tac yilx tas 'ix sch'ox 'a Egipto, yic on̈ yi'nec 'elta.

⁹ Xlajw cha, on̈ yi'nec cot 'a sat jun lum lum tic, 'ix ya'n lum 'ayn̈ec, atn lum caw 'ay syaxil sat.

¹⁰ Yuj cha, tic tzquij cot sb'ab'l sat cawb'en tzquij 'a sat lum lum 'ix yac' Jehová Dios 'ayon̈, xe chi. Tzlajw eyaln jun tzo'n̈ paxti cha, tzeya'n 'och te xuc chi 'a yojltac Jehová Dios, tzex 'em cumn 'a yojltac.

¹¹ Tzlajw cha, tze nan junc q'uin̈ yet' eb' eyunnal, yuj smasnil tas tzyac' Jehová qui Diosalec 'ayex. Tzeyawtn cot eb' yin̈tl Leví eyet' 'a jun e tzaljc'ojlal cha, yet' pax eb' chuc chon̈b'al 'ayc' 'a e cal.

Sdiesmoal smasnil tas

¹² A 'a junjn yoxxil ab'il, tzeya'n sdiesmoal smasnil eyawb'en 'a eb' yin̈tl Leví, 'a eb' chuc chon̈b'al 'ayc' 'a e cal, 'a eb' meb'a 'unn chamnc smam, yet' 'a eb' 'ix 'ix chamnc yichmil, sec wach' 'ay tas tzc'ux eb' 'a yol e chon̈ab',

¹³ tzeyaln junjn ex 'a yojltac Jehová Dios 'ixtic: Tox xin pojcn 'el 'a watut 'a tas ec yaj 'a smasnil tas xwij chan̈ 'a sat lum lu'um. Tox xin pojcn pax 'el yic eb' yin̈tl Leví, yic eb' chuc chon̈b'al 'ayc' 'a qui cal on̈, yic eb' meb'a 'unn chamnc smam, yet' yic eb' 'ix 'ix chamnc yichmil. Xin yiclj smasnil tas aljnac 'ayin, may junc a checnb'il tz'at satc'ojlal wu'uj, yic matz in yiclej.

¹⁴ May jac tas xin c'ux 'a jun tzo'n̈ tic yic 'ayn 'och 'a cusc'ojlal yuj chamel, yet' 'a yic man̈ wach'c waj in sacb'tzan in b'a. May pax tas xwaltj 'a eb' chamnac. Ach Jehová in Diosal, xin yiclj smasnil tas 'ix ala.

¹⁵ 'Ilt on̈ 'emt 'a satchan̈ 'aj 'aych 'ec' 'a et'l to ecn̈ej yaji. Tza'n cot a yaxilal 'a quib'n̈ an̈ israel on̈ tic on̈, yet' 'a yib'n̈ lum lum xac' 'ayn̈ tic on̈, lum caw yax sat, 'icha wal otjnac aln can 'a eb' qui mam quichm on̈, xe chi 'a 'a.

A chon̈b' Israel yicn̈ej Jehová yaji

¹⁶ A Jehová qui Diosalec, a 'ix aln smasnil jun tzo'n̈ checnb'il tzwalcn 'ayx tic, to tzeyiclj eb' smasnil. Tze b'eylb'ej eb', tzeyiclni eb' yet' smasnil e c'ojol yet' smasnil e nab'en.

¹⁷ A ticnec, tox 'ix eyala, to a Jehová qui Diosalec yaji. 'Ix eya'n e ti', to 'oj eyoch tza'n yu'uj. Ax eyiclni smasnil schecnb'il, scuynb'il yet' pax sley; yuj cha, yicljec 'a smasnil tiempo.

¹⁸ An̈jtona ticnec, 'ix yal Jehová to an̈ israel on̈c tic, to yicn̈ej cajec, sic'b'iln̈ec 'el yu'uj, 'icha yutjnac yaln 'ayn̈ec, yuj cha, yowlal tzqui yicljec smasnil schecnb'il.

¹⁹ A 'oj eya'n 'och niwquil chon̈b'al. 'Oj e b'inax 'a swach'ilal. Niwn eyel'ch pax 'a sat jun tzo'n̈ xo nacion̈ b'ob'il yu'uj. 'Ixta wal 'oj eyaj 'icha yutjnac yalni, jun chon̈b' to yicn̈ej Jehová Dios yaji, xchi Moisés.