Dt 23 - Chuj San Sebastian Bible

Jun tzo'n̈ 'anma*r* tz'ijx 'el 'a scal eb' chon̈ab'

¹ Toto 'ay junc winc pojnc sq'ue'en mto a swincal 'elnac, may yaln yic yoch 'a scal eb' chon̈ab' yic tz'och eb' 'emmquilal 'a Jehová.

² A junc mitz' 'unin yet' yin̈til, may xon b'a'n̈ 'ay yaln yic 'a scal eb' schon̈b' Jehová.

³ A eb' amonita yet' eb' moabita yet' yin̈tl junjn c'aj eb', may b'a'n̈ xon 'ay yaln eb' yic 'a scal eb' schon̈b' Jehová,

⁴ yujto a yic on̈ 'e't 'a sat slum eb', yic on̈ 'eltec 'a lum Egipto, ma'ix yac' xon eb' cu'c jac ya'al, may xon pax jac tas xyac' eb' qui c'uxu'. A yic eb', to 'ix stoj eb' Balaam win yunnal Beor, win cotnc 'a lum Petor 'a yol yic Mesopotamia, yic tzon̈ wul scatb'tzanec.

⁵ Palta ax Jehová qui Diosalec, ma'ix schaj yab' tas 'ix yal Balaam. A scatb' cha, 'ix meltzj 'och qui wach'loquec yuj Jehová, yujto caw 'ay schamc'ojlal 'ayn̈ec.

⁶ Man̈ e say tas tzex 'aj eyoch 'a junc'ojlal yet' eb', matz tac' tzex colwj 'a eb' yuj tas 'ay tz'och yuj eb' 'a smasnil tiempo.

⁷ Palta man̈ e chacl eb' edomita, yujto quicanec to qui b'a yet' eb'. An̈jtona eb' 'aj Egipto, man̈ e chacl pax eb', yujto on̈ 'e'c jun tiempoal 'a sat slum eb' cha.

⁸ A eb' yoxc'ajil yin̈tl eb' chi tz'alj 'a e cal, 'ayx yaln eb' yic 'a scal eb' schon̈b' Jehová.

Ley 'a yib'n̈ tas tz'aj*r* sacb'tzax camplamento

⁹ A yic tzex 'och 'a owl yet' eb' 'ajc'ojl yajch 'ayex, yic tzex can 'a scal c'ultac, man̈ e b'o junc tas q'uixweltac yilxi.

¹⁰ Toto 'ay junc mach 'a e cal, tztob' yin̈til yic waynac, yowlal tz'elcn jun chi 'a spatc 'el camplamento 'a jun c'u cha.

¹¹ A 'a yic wan yem c'u, wach' cab' tzyutj sb'icn 'el sb'a, ax 'a yic tox x'em c'u cha, tztac' yochx 'a yol camplamento.

¹² A yic tzex chulji, yowlal tze b'o junc lugar 'a 'aj wach' tzex chulj 'a spatc 'el camplamento cha.

¹³ Yowlal tzeyij b'ey junc e te 'icha istaca, tzeyac' 'ejm 'a yol e pa, sec ax yic tzex 'at chuljoc cha, tze joy lum lum chi yet' te'. Tzlajw cha, tzex chulji, ax yic tzlajw e chulj cha, tze lan̈n can pax e chul chi yet' lum lum cha.

¹⁴ Yujto a Jehová qui Diosalec ajun eyet'oc, 'ayc' eyet' 'a e camplamento. A tzex tan̈wni, tzcolwj pax eyet'oc yic tzeya'n ganar eb' 'ajc'ojl yajch 'ayex. Yuj cha, a jun e camplamento cha, yowlal cab' sac yaji, sec may cab' tas tu yilx tzyil Dios 'a 'a, to ma'ay, 'ay smay tzyij 'el sb'a 'a e cal.

A jun tzo'n̈ xo ley

¹⁵ Toto 'ay junc smeb'a junc win patron̈ tz'at 'elc 'a 'a, tzlajw cha, tzc'och 'ayex, tzc'ann can sb'a eyet'oc, man̈ eyac' meltzjoc 'a spatron̈ cha.

¹⁶ Can cab' 'a e cal cha, libre cab' si'lni 'aja junc chon̈b' 'aj tznib'j tzcan cajan, may cab' mach tztac' stzuntzn 'a 'aj tzcan cha.

¹⁷ May cab' junc winac, mto junc 'ix quit chon̈b'ec tzya'ch sb'a 'ajmulal, yuj ya'n 'och sb'a 'emmquilal 'a jun tzo'n̈ comn dios.

¹⁸ A q'uen tumn tzchaj eb' 'ix, mto eb' winc 'a spatquil yajmulal, man̈ e cha yac' eb' q'uen 'a junc 'aj ya'jnac eb' sti ya'n 'a Jehová Dios, yujto a jun b'eyb'al cha, caw yajb'il 'el yuj Dios.

¹⁹ A yic tzeya'n e tumn majnil 'a junc eyit chon̈ab', man̈ e c'an yune e tumn cha, mto junc tas tzc'uxxi, mto tzann̈j junc xo tas tzmajnaxi, man̈ e c'an smajnub'al.

²⁰ Palta 'a junc chuc chon̈b'al 'ayc' 'a e cal, tztac' e c'ann smajnub'l junc tas tzeyac' smajnoc. Ax pax 'a eb' quit chon̈b' cha, man̈ e c'an smajnub'al sec a Jehová qui Diosalec, 'oj yac' syaxilal 'a yib'n̈ smasnil tas 'oj e b'o 'a sat lum lum 'oj 'och eyico'oc cha.

²¹ A yic tzeya'n e ti eya'n junc tas 'a Jehová Dios, matz 'ec' cab' tiempo eya'ni. Toto ma'ay 'oj sc'anb'c 'ayex, ax yoch jun chi e muloc.

²² Toto may junc tas 'aj tzeyac' e ti eya'ni, may e mul 'oj 'ochoc,

²³ palta toto tz'el wal 'a e c'ojl eya'n junc tas 'a Jehová Dios, yowlal tzeyac' 'el'choc e ti tzeyac' cha.

²⁴ A yic tzex 'och 'a scal smunljel junc eb' quit chon̈b'ec mto junc mach, tztac' e lon sat te uva 'ay 'a scal smunljel cha, palta matz tac' eyi'n jac eyic 'a yol e pa.

²⁵ Toto tzex 'och 'a scal strigo junc mach, tztac' e ch'inn e c'ux 'ixm sjolm cha, palta matz tac' e poln 'ixim yic tzeyi'ni.