Dt 19 - Chuj San Sebastian Bible

Eb' chon̈b' 'aj tzcol sb'a eb' 'anma'

¹ 'Ix yaln pax Moisés 'ixtic: A yic tox satl Jehová qui Diosalec eb' 'anma 'a jun tzo'n̈ nacion̈ cha, ax ya'n slum eb' chi eyico'oc, ax e cajn schon̈b' eb' yet' pax yatut eb',

² 'oj e si'cn 'el 'oxe'oc chon̈b' 'a lum lum 'oj yac' Jehová Dios chi eyico'oc cha.

³ Tze b'on pax b'e tzc'och 'a jun tzo'n̈ chon̈b' cha. 'Oxe tzeyutj 'el lu'um, atn lum 'oj yac' Jehová qui Diosalec eyico'oc, sec tzann̈j junc mach tzmiln junc yit 'anma'il, ata tzc'och scol sb'a 'a junc eb' chon̈b' cha.

⁴ A jun tzmilwj cha, tztac' s'at 'eloc, yic tz'at scolnc sb'a ta', sec matz chami, toto man̈ sc'anc sc'ojl tzmilwji, toto may pax xon yowl yet' jun tzmil cha.

⁵ Q'uinloc 'ay chawn̈oc 'anma tzmol 'at c'atzitz, ax tz'aji, tz'el q'uen ch'acb' chi 'a yoc yic wan stzu'n junc chi sc'atztz cha, tzc'och q'uen 'a junx ajun yet' cha, tzcham yuj q'ue'en. A jun tz'och smul cha, tztac' s'at 'eloc, yic tz'at scolnc sb'a 'a junc eb' chon̈b' cha.

⁶ Toto a junc chon̈b' cha, najt s'at sb'eal, 'ay pax junc mach yican to sb'a yet' junc tzcham cha, tznib'j tzyac' spac jun yican cha, tz'at 'a spatquil jun tz'och smul cha, 'ay smay tzyamchj yu'uj, tzmiln chamoc, palta man̈ smojc jun chi schami, yujto 'a yic yalan̈, may yowl eb'.

⁷ Yuj cha, tzwaln 'ayex, to tze si'cn 'el 'oxe'oc chon̈ab', sec ata tzcol sb'a eb' 'anma'.

⁸ Toto a Jehová qui Diosalec, 'oj yac' niwnb'oc lum e lum cha, ax ya'n smasnil lum 'ayex, 'icha wal yutjnac yaln can 'a eb' qui mam quichmec,

⁹ toto 'ixta', 'oj e si'cn 'el pax 'oxe'ocx chon̈ab', yic tz'och stz'acb'oc eb' 'oxe cha, sec ata tz'at scol sb'a eb' 'anma'. ('Oj 'el'choc jun tzo'n̈ tic, toto 'oj e b'eylb'oc jun tzo'n̈ checnb'il tzwalcn 'ayx tic; yujto caw tze chamc'ojlej Jehová qui Diosalec. Yuj cha, 'ochn̈ec tz'a'n yu'uj.)

¹⁰ Toto 'ixta', man̈ comnoc 'oj 'el schic'l eb' 'anma may smul 'a sat lum lum 'oj yac' Jehová Dios 'ayex, may pax junc ex 'oj comn 'och chaml chi 'a eyib'an̈.

¹¹ Palta toto 'ay junc mach 'ay xon yowl yet' junc xo mach, macb'il yec' jun chi yu'uj yic tzmiln chamoc, tzlajw cha, tz'at scolnc sb'a 'a junc eb' chon̈b' cha.

¹² Toto 'ixta', a eb' yichmtac wincal chon̈b' 'aj tz'och jun chaml cha, 'oj yac' eb' 'ijxoc cot jun xmilwj cha, tzlajw cha, tz'ajx 'a yol sc'ab' junc yican to sb'a yet' jun xcham cha, ax tzmiln chamoc.

¹³ Man̈ 'o'ch e c'ojl 'a 'a, sec wach' 'ixta tz'aj yochwan chaml 'a yol e chon̈ab'. Toto 'ixta', caw wach' 'oj eyel'chi.

¹⁴ A 'a lum lum 'oj yac' Jehová qui Diosalec 'ayex, 'ay cab' yel'ch smon̈jonal yic junc xo mach 'aych yic 'a sti eyic cha, 'icha cab' yajcn 'ejm smon̈jonal xon yuj eb' e mam eyichm 'a pecti', 'ixta cab' yaji.

Ley 'a yib'n̈ eb' testigo*r* man̈ yelc tas tzyala

¹⁵ Toto cojn junc mach tzyac' testigoal sb'a yuj junc 'anma tz'och smul, matz tac' yoch 'a yib'an̈, masnto 'ay chawn̈oc mto 'oxwn̈oc tzyac' testigoal sb'a yuj smul cha, 'ixta b'i'an tz'och 'a yib'an̈.

¹⁶ A yic 'ay junc mach tu snab'en, tzcomn 'a'j 'och sb'a testigoal, yic tzyalni, to 'ay smul junc xo mach,

¹⁷ toto 'ixta', a chawn̈ 'anma cha, yowlal tzc'och eb' schawn̈il 'a yojltac Jehová, yet' 'a yojltac eb' ya'mal 'och sti eb' 'anma', yet' pax 'a yojltac eb' juez, eb' to 'aych yopiso sb'onyaj eb' 'anma chi 'a jun tiempoal cha.

¹⁸ Ax eb' juez chi tzb'eyc'ojlan eb', toto caw yel jun paxti cha, mto 'es wan ya'n 'och jun testigo chi 'a yib'n̈ junc xo 'anma cha.

¹⁹ Toto 'es, to 'ixta', a 'a yib'n̈ jun 'a'm 'es cha, ata tz'ochcni, 'icha tas tznib'j ya'ch 'a yib'n̈ jun yit 'anmal cha, sec 'ixta tz'aj slajw 'ejm jun 'es chi 'a e cal.

²⁰ Ax yic 'oj yab'nc eb' 'anma jun cha, 'oj xiw chan̈ eb', man̈x 'oj scomn b'oc eb' jun maysch'olnil cha.

²¹ Man̈ 'o'ch e c'ojl 'a junc mach tzb'on jun tzo'n̈ tic: a mach tzc'ann cham junc mach, yowlal cham pax jun xo, toto tzpoj yol sat, mto tz'el ye, mto tz'el sc'ab', mto tz'el yoc jun cha, 'icha wal tz'aj jun cha, 'ixta tz'aj jun tz'och smul cha.