Dt 14 - Chuj San Sebastian Bible

¹ An̈ec tic, yunnaln̈ec xo Jehová Dios, man̈ ca'c lajwc qui niwnal yuj junc chamnc 'anma', man̈ qui joxlec xil qui jolm 'a snan̈l qui sat.

² Yujto an̈ec tic, schon̈b' on̈c Jehová Dios. A 'on̈ si'n 'elt 'a scal jun tzo'n̈ xo chon̈b' 'ay 'a sat lum tic, sec tzon̈ 'ochcn schon̈b'oc.

No noc' tzchixi, yet' no matz tzchixi

³ Man̈ e chi no noc' yajb'entac.

^4-5 Yaj sb'i e no smoj e chin tic: no wacax, no calnelu, no chiwo, smasnil junjn c'aj no c'ultq'uilchej, no calte'al chiwo, yet' no calte'al calnelu.

⁶ Tztac' e chin smasnil e no noc' tzjax yan̈, no pojl yech.

⁷ Palta ax jun tzo'n̈ xo e no tic, matz tac' e chin e no', wach'xam tzjax no yan̈, palta toto man̈ pojloc yech e no': No camello, no tejón, no chich. Yowlal tzeyojquej 'eli to man̈ wach'c e no'.

⁸ No chitam pojl yech no', palta matz jax no yan̈. Yowlal tzeyojquej 'eli to man̈ wach'c no', man̈ e chi schib'jal jun tzo'n̈ noc' tic. A yic chamnc xo no', matz tac' eyamn sniwnal no'.

⁹ Ax e no 'ay 'a yol a', tztac' e chin e no 'ay sma'lab' a', yet' e no 'ay solcal.

¹⁰ Ax no may sma'lab' a', man̈ e chi no', yet' e no may solcal cha; yowlal tzeyojquej 'eli to man̈ wach'c e no'.

¹¹ Tztac' e chin smasnil no ch'ic wach' schixi.

^12-18 Palta a 'a scal no ch'ic tic, 'ay pax no matz tac' e chini: no salt'iw, no niwc xulem, no salt'iw yic a mar, no milano, smasnil no niwc c'uc'um, smasnil no joj, no avestruz, no tonton, no gaviota, smasnil no sal c'uc'um, no cujub', no ibis, no cisne, no pelícano, no 'usej, no cormorán, no cigueña, no julm chay, no abubilla yet' no sotz'.

¹⁹ Smasnil no cotc noc' 'ay sc'axl secsni sb'ey 'icha no turin, man̈ wach'c e no'. Matz tac' schix e no'.

²⁰ Palta 'ay e no tzchixi, tztac' e chin e no cha.

²¹ Man̈ e chi no noc' mun tzchami, yujto an̈ec tic, sic'b'iln̈ec 'el schon̈b'oc Jehová Dios. A no noc' cha, tztac' eya'n schi eb' chuc chon̈b'al cajn 'a e cal; atn eb' chi tztac' schin no', mto tze chon̈ no 'a eb' chuc chon̈b'al ton̈j tzb'eyc' 'a e cal. Man̈ e tz'an̈ no cotc chiwo 'a scal yal yim no snun.

Cuynb'il 'a yib'n̈ Diesmo

²² 'A junjn ab'il, yowlal tzeyij can 'el sdiesmoal sat smasnil eyawb'en tze molo.

²³ A sdiesmoal e trigo, eyal uva, eyaceite yet' no sb'ab'l 'une e wacax, mto sb'ab'l 'une e calnelu mto chiwo. Ata tze c'ux jun tzo'n̈ chi 'a yojltac Jehová qui Diosalec, 'a jun lugar 'oj si'l yico'oc cha, sec 'ixta tzeyutj eyi'n 'ejm e b'a 'a Dios 'a smasnil tiempo.

²⁴ Toto a jun lugar cha, najt tzcan 'a 'aj cajn ex cha, matz tac' eyi'n 'at sdiesmoal tas 'ay 'ayex, yic tzeyi'n 'ejm e b'a 'a Jehová Dios yuj syaxilal tzyac' 'ayex.

²⁵ Tztac' e chon̈n 'el e diesmo cha, ax cab' stojl chi tz'at eyac' 'a jun lugar 'oj si'l Jehová yico'oc cha.

²⁶ Ax yet' q'uen tumn chi tztac' e mann tas tze nib'j ta'; no wacax, calnelu, yal uva mto junc xo tas tz'u'x to jawnc xo sti'. Tzlajw cha, toto 'ay tas tze nib'j e c'ux ta', tztac' e c'uxn 'a yojltac Jehová qui Diosalec, tze nan sq'uin̈l yet' eb' eyunnal.

²⁷ Man̈ e patquilc can 'el eb' levita cajn eyet' 'a yol e chon̈b' cha, yujto may xon slum eb' 'oj scha 'icha lum eyic cha.

²⁸ 'A junjn yoxxil ab'il, tzeyecn syam sb'a e diesmo, tzeyij can 'el 'a eyawb'en 'a junjn ab'il. Tzlajw cha, tze moln 'a junc yet'l 'ay 'a yol e chon̈b' cha.

²⁹ Sec a yic 'oj c'och eb' levita 'ayex, eb' may xon slum 'oj scha eyet'oc, mto eb' chuc chon̈b'al cajn 'a e cal, mto eb' meb'a 'unn chamnc smam, yet' eb' 'ix 'ix chamnc yichmil, atn jun tzo'n̈ e diesmo chi 'oj sc'ux eb', sec b'ut'n sc'ojl eb' eyet'oc. 'Ixta 'oj yutc Jehová qui Diosalec ya'n yaxilal 'a eyib'n̈ yet' tas tze b'o cha, xchi Moisés.