2 Cr 7 - Chuj San Sebastian Bible

¹ A yic 'ix lajw sleslwi Salomón, 'ix cot c'ac' 'a satcha'an̈, 'ix tz'a xajmb'al to tz'a smasnil yet' jun tzo'n̈ xo xajmb'al. Caw 'ix macchj 'el yol yatut Jehová chi yuj stzictznial,

² yuj cha, a eb' ya'mal 'och sti eb' 'anma 'a Dios, man̈x 'ic stac' yoch eb' 'a yojol.

³ A wal yic 'ix yiln smasnil eb' israel yeml jun c'ac' yet' stzictznil Jehová 'a yib'n̈ jun n̈a cha, 'ix 'em cumn eb', squiln 'ejm eb' snan̈l sat 'a sat lum yaln sb'a, yuj yaln eb' yuj diosal 'a Jehová, tzyaln eb' 'ixtic: Caw wach' snab'en, a schamc'ojlal may b'a'n̈ 'ay slajub', xchi eb'.

^4-5 Xlajw cha, ax win rey Salomón yet' smasnil eb' chon̈ab', 'ix ya'n can 'och jun n̈a chi yico'oc Dios. A win rey cha, 'ix yac' win 22 mil no mam wacax yic tz'och no xajmb'aloc, yet' 120 mil no calnelu.

⁶ Lin̈n 'ec' smasnil eb' chon̈ab' yic x'och jun 'emmquilal cha. A eb' ya'mal 'och sti eb', 'ayc' eb' 'a yet'l 'aj 'ayq'ui, tzyutz'n eb' q'uen trompeta. Ax 'a yojltac eb', ata 'ayc' eb' levita wan syucn jun tzo'n̈ yamc'ab' b'ob'il can yuj rey David yic tz'och 'emmquilal 'a Jehová. Ya' sb'a cha, wan yaln eb' wach' paxti 'a Jehová 'ixtic: A schamc'ojlal may b'a'n̈ 'ay slajub', xchi eb'.

⁷ 'Ix ya'n 'och Salomón yopiso spacl snan̈l 'amc' 'ay 'a yojltac yatut Jehová, sec ata tz'ajx tz'a xajmb'al to tz'a smasnil, yet' xepual no xajmb'al yic junc'ojlal. Yujto a jun yet'l xajmb'al nab'a bronce ya'jnac b'o'oc, man̈xtzac yab' 'aj tzq'ue jun tzo'n̈ xajmb'al chi 'a yib'an̈, atn yofrendail 'ixm trigo yet' xepual no xajmb'al cha.

⁸ A 'a jun tiempoal cha, a Salomón yet' smasnil eb' yit israelal, 'ix sna eb' q'uin̈ Chinama 'a uque c'ual. Caw niwn sb'isl eb', xcotn̈j eb' 'ay 'a 'aj tzon̈ 'och 'a Hamat, 'a smon̈jonal norte masnto eb' 'ay 'a jun a b'eymal a yic Egipto 'a smon̈jonal sur.

⁹ Uque c'u 'ix sna eb' sq'uin̈l jun yet'l xajmb'al, xlajw cha, 'ix snan pax eb' uque xo c'u q'uin̈ yic Chinama. Ax 'a junx c'u 'ix ya'n 'och eb' junx niwquil q'uin̈ 'a slajub'.

¹⁰ A yic 23 yoch yucl 'uj, ata xyalcn sb'a Salomón 'a eb' chon̈ab'. 'Ix paxcn eb' 'a yatut 'a tzaljc'ojlal. Caw wal tzalj eb' yuj swach'c'ojlal Jehová, 'icha yutjnac 'a David, 'a Salomón yet' 'a smasnil chon̈b' Israel.

Sb'o Dios strato yet' Salomón

^11-12 'Ix sch'oxn sb'a Jehová jun 'ejm xo 'a 'ac'wl 'a Salomón, yic tox xb'o yatut Jehová yet' pax sdespacho winac, yet' smasnil tas snalb'ej win ya'n b'o 'a chab' n̈a cha, 'ix yaln Jehová 'ixtc 'a 'a: 'Ix wab' a lesal, xin si'n 'el jun lugar tic wico'oc, yic tz'och yatutaloc 'aj tz'ajx tz'a xajmb'al 'ayin.

¹³ Q'uinloc 'oj wa' cot junc cuaresma yic man̈xtzac yac' n̈ab', mto tzwal 'a no c'ulub' to tzlajl no smasnil 'awb'ente', mto junc yab'il tzwa' cot 'a eyib'n̈ ax in chon̈b' ex tic,

¹⁴ palta toto 'oj eyic' 'ejm e b'a, ax sb'inax in b'i eyu'uj, tzex leslwi 'ayin, tzeyaln e b'a 'ayin, tzlajw cha, tze jeln e b'eyb'al. Toto 'ixta', 'oj wab' e lesl 'a satcha'an̈, ax wa'n lajwc e mul, ax wa'n pax yaxb'oc e lu'um.

¹⁵ A ticnec yet' yic 'oj b'ey tiempo, 'oj in maclc wab' lesl 'oj 'och 'ayn 'a jun lugar tic,

¹⁶ yujto tox xin si'cn 'el jun n̈a tic wico'oc, atn 'aj 'oj 'och 'emmquilal 'ayn 'a smasnil tiempo. A jun tic 'oj in tan̈woc, nann̈ej wuj 'a smasnil tiempo.

¹⁷ A ticnec, toto 'oj a b'eylb'ocn̈ej smasnil tas xwala, 'icha 'ix yutj a mam, ax a yiclni in ley yet' in checnb'il,

¹⁸ toto 'ixta', an 'oj wac' 'el'choc opiso tic, 'icha wal 'ix wutj in b'on in trato yet' a mam, yic 'ix walni to may b'a'n̈ 'oj yac' palta junc yin̈tl ya'n reyl 'a eyib'n̈ ax chon̈b' Israel ex tic.

¹⁹ Palta toto ach tic mto eb' et chon̈b' tic, ma'oj eyiclc in ley yet' in checnb'il 'ix wa'cn 'ayex, ax 'oj 'ajoc to 'oj eyac' servil jun tzo'n̈ comn dios, ax eyaln e b'a 'a 'a,

²⁰ toto 'ixta', 'oj ex wi'l 'a sat jun lum wa'jnac 'ayex. A jun n̈a x'ochcn wico'oc tic, 'oj wi'l 'a wojltac, ax wa'n can 'och b'uchnb'ilc 'a smasnil nacion̈.

²¹ A jun n̈a man̈x jantcoc swach'l yilx tic, 'oj lan̈chjoc can 'ejmi, caw 'oj sat sc'ojl eb' 'oj 'ec' 'a stz'ey yilni, ax yaln eb' 'ixtc yu'uj: ¿Tas yuj 'ixtc 'ix yutj Jehová jun chon̈b' tic, yet' pax jun n̈a tic? 'oj xchic eb'.

²² Ax yalx 'a eb' 'ixtic: 'Ixtc 'ix 'aj eb' yujto xyactjcan eb' Jehová sDiosal smam yicham, atn jun x'i'n 'elt eb' 'a Egipto, ax jun tzo'n̈ comn dios xyac' servil eb'. Yuj wal cha, 'ix cot jun niwquil yailal tic 'a yib'n̈ eb', 'oj schic eb' chi 'a eb', xchi Jehová 'a Salomón.