1 Cr 28 - Chuj San Sebastian Bible

Yaljnac can rey David*r* chajtl 'oj 'aj sb'o yatut Dios

¹ 'Ix yac' David syam sb'a smasnil eb' yajl yaj 'a chon̈b' Israel 'a Jerusalén: eb' yajl yaj 'a junjn 'in̈tal, eb' yajl yaj 'a junjn macn̈ eb' soldado 'aych yopiso 'a win rey, eb' yajl yaj 'a yib'n̈ mil soldado, yet' 'a jun ciente soldado, eb' tz'iln smasnil scajb'en noc' win rey, eb' tz'iln slu'um, eb' tz'iln eb' yunnal winac, eb' tz'iln smasnil tas 'ay 'a 'a, smasnil eb' winc to niwn yel'chi, eb' 'aych yopiso yet'oc, yet' eb' soldado caw jelan.

² Xlajw cha, 'ix q'ue lin̈n rey David, 'ix yaln 'ixtic: 'Ab'c e masnil ex wit chon̈ab': 'Aych wal 'a in c'ojl in b'on chan̈ yatutal 'aj 'oj 'aj te scaxail strato Jehová, sec ata tzcan te 'a jun 'ejmn̈ej, sec wach' ata 'oj 'aj qui Diosal. Tox 'ix syam sb'a smasnil syamc'ab'il 'oj c'anxoc 'a 'a.

³ Palta 'ix yal Dios 'ayn 'ixtic: Man̈oc ach 'oj a b'o chan̈ jun watut cha, yujto 'a'm ach owal, til wal 'anma 'ix cham o'oj, xchi 'ayin.

⁴ A Jehová qui Diosalec an̈ israel on̈c tic, a in si'n 'eli yic tzin 'och reyl 'a chon̈b' tic 'a jun 'ejmn̈ej. Yujto a 'ix si'n 'el yin̈tl Judá, yic tzya'n yajlil 'a yib'n̈ smasnil quin̈tlec. A 'a scal yin̈tl Judá, a yin̈tl in mam 'ix si'cn 'eli, an xo in si'cn 'el 'a scal eb' wu'tac yic tzin 'och reyal.

⁵ Til wal eb' wunnal 'ix yac' Jehová 'ayin, ax 'a scal smasnil eb' wunnal cha, a Salomón a 'ix si'cn 'eli, sec to a 'oj 'em wocn 'a despacho yic tzch'oxn 'el yopiso Jehová 'a yib'n̈ qui nacion̈.

⁶ 'Ix yal pax 'ayn 'ixtic: A onnal Salomón, a 'oj b'onc chan̈ watut yet' yamq'uil, yujto an 'ix in si'cn 'eli yic tz'och wunnaloc, an xo 'oj woch mamb'ilal 'a 'a.

⁷ An̈jtona', an 'oj wac' yic' yip yopiso chi 'a smasnil tiempo, toto te'nn̈ej 'oj yutc sb'a sb'eylb'an in checnb'il yet' in cuynb'il, 'icha 'a jun c'u tic, xchi Dios 'ayin.

⁸ A ticnec jun, 'a e sat e masnil ex wit israelal, ex schon̈b' Jehová, yet' 'a yojltac qui Diosalec tzon̈ 'ab'ni, cham wal waln 'ayex, to tze cuy smasnil schecnb'il Jehová qui Diosal, tzeyiclni paxi, sec wach' 'oj e caj jun chon̈b' to man̈x jantcoc swach'l tic, ax xo 'oj eya'cn lum smacloc eb' eyunnal 'a smasnil tiempo.

⁹ Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

¹⁰ 'Iltnab'an, a Jehová ach si'n 'eli yic 'oj a b'onc chan̈ jun n̈a 'oj scajnub'oc. Yuj cha, ¡'ac' ep, 'och cab' munljel! xchi David.

¹¹ Xlajw cha, 'ix ya'n David yechl yatut Dios 'a Salomón, yuj tas 'oj 'aj sb'o'i, a 'aj tzyal yuj scoredoral yet' jun tzo'n̈ xo n̈a 'aj tzmolx yamc'ab', yet' jun tzo'n̈ cuarto 'ay 'a cha'an̈, yet' 'a yalan̈, yet' pax jun lugar cojxn Dios 'ay yico'.

¹² An̈jtona', 'ix ya'n pax yechl smasnil tas ya'jnac Espíritu nachjoc 'el yu'uj, atn tas 'oj 'aj sb'o yamq'uil, yet' jun tzo'n̈ cuarto 'oj 'och 'a spatquil, yet' jun tzo'n̈ cuarto 'aj 'oj molxoc ofrenda yet' jun tzo'n̈ tz'ajx siylab'il 'a Dios.

¹³ An̈jtona', 'ix ya'n pax slistail tas 'oj 'aj sjaw eb' ya'mal 'och sti eb' 'anma 'a Dios, yet' eb' levita, yic tzyi'n 'elt eb' yopiso yet' smasnil tas 'oj sb'o eb' 'a yatut Jehová cha, yet' slistail smasnil syamc'ab'il yic tz'och 'emmquilal ta'.

¹⁴ 'Ix ya'n slistail yuj jantc q'uen oro mto q'uen plata 'oj 'och 'a junjn c'aj syamc'ab'il yatut Jehová cha,

¹⁵ atn 'a sb'achnub'al cantil, yet' pax 'a junjn cantil cha,

¹⁶ yet' pax jun mexa nab'a oro, atn 'a 'aj yowlal 'oj 'em tzoln 'ixm pan to yic Jehová yaji, yet' junjn mexa to plata,

¹⁷ yet' jun tzo'n̈ q'uen luchlab' chib'ej, jun tzo'n̈ q'uen 'uc'ab' yet' jun tzo'n̈ q'uen vaso.

¹⁸ An̈jtona', 'ix ya'n pax jantc q'uen oro caw wach' 'oj 'och 'a jun yet'l xajmb'al yic incienso, yet' pax oro 'oj 'och 'a caruaje, tzyal 'el'chi atn jun tzo'n̈ yechl querubín to jen̈n 'at sc'axl 'a yib'n̈ te scaxail strato Jehová.

¹⁹ Yuj cha, xyaln pax David 'ixtc 'a Salomón: Smasnil jun tzo'n̈ tic, tz'ib'b'il cani, caw a Jehová 'ix 'a'n nachjc 'el wu'uj, ata tzyal yuj tas tz'aj sb'o smasnil munljel cha, 'icha yaj 'a yechel.

²⁰ ¡'Ac' ep, te'n tzotj a b'a, 'och cab' munljel! Man̈ ach xiwoc, man̈ a chab'c'ojloc a b'a, yujto a Jehová qui Diosal a 'oj 'ochn̈j et'oc. Ma'oj ach yactcani, masnto 'oj lajwc c'och smasnil munljel 'oj 'a b'o 'a yatut Jehová cha.

²¹ A ticnec, a eb' ya'mal 'och sti eb' 'anma 'a Dios yet' eb' levita, junjn macn̈ eb', caw wal tzya'ch eb' 'a sc'ojl smunlj 'a smasnil munljel tic. An̈jtona', yet' smasnil eb' mun tz'el 'a sc'ojl smunlji, eb' jeln snab'en smunlj 'a tzann̈j munljelal, eb' yajl yaji, yet' pax smasnil eb' chon̈ab', caw 'oj syiclc eb' smasnil a checnb'il, xchi rey David 'a Salomón.