Máciya 26 - Jola-Kasa

Huhaanaahu hata élambaayi li hulob mata jamuk Yéesu

¹ Nan Yéesu abanumuu elobayi yata kulimaku unku feh, li aan kúgoomaku koola:

² — Jihaase joon taate kunak kúl̥uba kagaanaku kata Faakayi fan abeti li kuŋen bukan min kubaaŋool li ekuluwa.

³ Muñeˈe huhaanaahu hata élambaayi li kunahaanaku kata ésukayi, li kujoj li eluufayi yata anahaanawu ata kúlambaaku an koonemuu Kayif.

⁴ Nan kujojumuu, li kujamoo mata min kubuutoo Yéesu kujok an bahaasut kujow kumuk.

⁵ Bale li koon: — Jakum ujokaalool nan kagaanaku kata Faakayi, jakum bil ésukayi éguul̥oo.

Anaale li aŋa’ eheeñ áyu li húkowahu hata Yéesu

⁶ Muñeˈe nan Yéesu alakomuu li ésukayi yan koonemuu Betani, li eluufayi yata Simoŋ an háhaayee ejoke,

⁷ anaale akee aakene ateefaay ameeŋeni eheeñ yaseele ŋáa’, li álohul Yéesu, min aŋa’ eheeñayi áyuwool li húkow akila li hutiñ.

⁸ Bale nan kúgoomaku kata Yéesu kujukumuu anaalaawu li akaan loon muñaˈa, súumutiil min koon: — Kama muñowu wáa újimuu li aŋa’ eheeñayi inyu acooc?

⁹ Eheeñayi inyu eyiliyeene éjulayi seel ŋáa’, min sídalamasu siŋali sen esukateenayi.

¹⁰ Yéesu li ahaas wahawu wan kulakomuu elobayi li aaniil: — Wáa újiye li joono li kayoken anaalaawu ummu? Lakankaan wah wajake ŋáa’ boot lí ínje.

¹¹ Mata fan jibaj nanoonan esukateen li bukuluul, bale ínje let ilako li bukuluul nanoonan.

¹² Min anaalaawu ummu aŋa’muu eheeñayi áyuwom li eniil, lakankaan mo boot kafale kahokaku kúmbaam.

¹³ Li mal̥egenamu fan ilobuul, tanootan tan Hulimahu unhu Hásuumaahu huwaaleyi li adunaayi feh, fan kulob foof wahawu wan anaalaawu ummu akaanumuu, min awayil̥oyi.

Sudaas li anuyoo Yéesu

¹⁴ Muñeˈe, akee li kúgoomaku kuŋen li kúl̥uba, an koone Sudaas Isikaaliyot li ajow ajuk huhaanaahu hata élambaayi,

¹⁵ min aaniil: — Waa jifañe jisenom ínje babete Yéesu li kuŋenuul? Li kucob sihanjal sata sídalam soono áyii li kuŋen kusenool.

¹⁶ Yaan no unnu, Sudaas li alako huŋes bútin bajake boot min abet Yéesu li kuŋeniil.

Yéesu li akaan kagaanaku kata Faakayi li Kúgoomaku koola ló

¹⁷ Li líiŋ li hunakahu hútinaalahu hata kagaanaku kata kúmbuuluwaku kakaanutimuu élebiil kata Yéesu li kubil kujukool min kugel̥l̥enool koonool: — Bay lufañe min jilak sinaaŋasu sata kagaanaku kata Faakayi?

¹⁸ Yéesu li aaniil: — Jijow boot li ésukayi bata antijaman jijow joonool: «Anahaanawu laane: “taŋayi yúmbaam éliiŋe, kúgoomaku kúmbaam lí ínje humumom, boot min jibil jikaan kagaanaku kata Faakayi booli.”»

¹⁹ Kúgoomaku li kukaan loon Yéesu alobiilumuu, min kulak sinaaŋasu sata Faakayi.

Yéesu li alob aan an fan abetool li kuŋen bukan

²⁰ Muñeˈe li bil líiŋ kátiimaku, Yéesu li abah li kúgoomaku u koola ló kuŋen di kúl̥uba boot hutiñ.

²¹ Nan kulakomuu hutiñahu, li aaniil: — Li mal̥egenamu fan ilobuul, akee li bukuluul fan abetom li kuŋen bukan.

²² Kúgoomaku li jokiil ŋáa’. Li kugel̥l̥en Yéesu ano li ano koonool: — Amaaŋen, waa fíle, ínje?

²³ Yéesu li aaniil: — Anawu álu’muu kaŋenool li buyinjaayabu li mano lí ínje, akila ammuu li abetom li kuŋen bukan.

²⁴ Añool-An fan aket loon Bakiicelabu bulobumuu buya li akila. Bale katek kujow kulako li anawu ammuu li abetool li kuŋen bukan. Haŋeene majak jakum anawu ummu abuki.

²⁵ Sudaas ammuu li abet Yéesu li kuŋen bukan, li agel̥l̥enool aanool: — Anahaan, waa fíle, ínje? Yéesu li aanool: — Awu humumi lúlobulo mó.

Húmbuulu li ejunk yata ébiiñ boot kawayil̥o Yéesu

²⁶ Nan kulakomuu hutiñahu, Yéesu li aŋa’ húmbuulu. Nan ásooniyen homuu aban, li amuncul ho asen kúgoomaku koola, ban li aaniil: — Jiŋa’ jitokoñ. Laale eniilayi yúmbaam.

²⁷ Li alaañen aŋa’ ejunk yata ébiiñ, min asal Ateemit aban, li aseniil yo ban li aaniil: — Jihob ló bukuluul foofuul feh.

²⁸ Mata laalu húsimahu húmbaam, húsimahu halitenumuu húfaalumahu han Ateemit ajokumuu bukanabuku, háyuwimuu boot li bukan kameeŋe, boot kabonketaku kata uhoofoolawu.

²⁹ Fan ilobuul, kale hunakahu hata síyaat lihobumee ébiiñayi inyu min ikat, boot yok nan emmuu ilaañen ihob ébiiñ yawunkul li bukuluul ló li Jáyiiyaju jata Atuubawom.

³⁰ Muñeˈe nan kukijenumuu ukijen wata kasal Ateemit kuban, li kúfu’ kujow boot bata Huyuuyahu hata unuunukenawu waaneyimuu Olíibiye.

Yéesu li alob ákibben bo kaanaku Fiyeel fan bil aceeŋ aan lahaasoohaas

³¹ Nan kúliiŋumuu bata Huyuuyahu hata unuunukenawu waaneyimuu Olíibiye, Yéesu li aan kúgoomaku koola: — Li ehukaayi inye, wahawu wammuu li ubajom fan újiwuul foofuul feh li jikat bo káyinenaku kan jibajumuu lí ínje, mata kikkiic kaanaku: «Fan itek amataawu imuk, min kúgalalaanaku kata bumatabu kuyiisoo.»

³² Bale nan emmuu li iyitowumul li eketayi, fan ijow ló ijow ikobuul Gálile.

³³ Fiyeel li aanool: — Manoo kaabuku feh kukat bo káyinenaku kan kubajumuu li awu, ínje let ikaan mo.

³⁴ Yéesu li aanool: — Li mal̥egenamu fan ilobi, li ehukaayi inye humum yo, fan uceeŋ ñoono ñáhaaji oon luhaasonhaas, tówum káyin kul̥ok.

³⁵ Fiyeel li aan Yéesu: — Maayeet min eete iket inaboo li awu, bale let iceeŋ een lihaasihaas. Kúgoomaku feh li kulob manolamu.

Yéesu li al̥aw tan koone Getisemane

³⁶ Muñeˈe Yéesu li kúgoomaku koola li kujow boot tan koone Getisemane, kúliiŋ li aaniil: — Jibah taate mín ínje ijow baaba kal̥aw.

³⁷ Yéesu li ájowetum Fiyeel buko li bañiilabu búl̥uba báyinaabu bata Sebede. Li kit tóŋ jokool ban li kaanool kákoli.

³⁸ Muñeˈe li aaniil: — Buyina báamak bookom, bayilo bumukom. Jilako taate lí ínje ban jakum jímooli.

³⁹ Yéesu li ayinno bo lóyi jakee, li ákuntuŋ min aŋa’ buulool aya li etaam min al̥aw loon muñeˈe: — Faafa, loon kayiliyeenuma, li úloyiyen ejunkayi inyu yata sílaamasu téetiwom. Bale jakum kaan loon ínje ifañumuu, bale loon awu ufañumuu.

⁴⁰ Yéesu li aban kal̥awaku, li álaañul boot tan kúgoomaku koola kúhaaji kulakomuu áŋejul li atookiil buko li kámooli. Muñeˈe li agel̥l̥en Fiyeel aanool: — Kama jibanut jiban bayili jilako lí ínje bámooliwut maayeet ewaatu yano?

⁴¹ Jakum jímooli. Jil̥aw jakum bil jilo li jabunt. Buyinumabu bufañe, bale eniilayi égootogooto.

⁴² Yéesu li alaañen búl̥ubut ayinno bo min al̥aw aan: — Faafa, kaanumuu loon ejunkayi inyu yata sílaamasu eyilaat éloyiyom ínje bahobut yo, jow kaan loon awu ufañumuu.

⁴³ Yéesu li aban kal̥awaku, li amit álaañul boot tan kúgoomaku koola kulakomuu áŋejul, li alaañen atookiil buko li kámooli, mata kámooliyaku kujokiijok ŋáa’ gay kuyilaat kuluuj.

⁴⁴ Li alaañen akatiil to min ayinno bo áliiŋ, li alaañen búhaajut ál̥awum li kulimaku kanolaku.

⁴⁵ Fúlum tó, Yéesu li álaañul boot tan kúgoomaku kulakomuu min aaniil: — Kama jiloŋe li jímooli min jiyool̥o? Jíkaanum, waatuwayi ékoojulo; Añool-An kubetool kuban li kuŋen kata kuhoofoola.

⁴⁶ Jiyito ujowaal! Anawu ammuu li abetom li kuŋen bukan láliiŋulo.

Huhaanaahu hata élambaayi li hujok Yéesu

⁴⁷ Nan Yéesu alakomuu elobayi, Sudaas alakomuu akee li kúgoomaku kuŋen li kúl̥uba li áliiŋul. Li ánaboolul li búsuk bajunkowulo síkundu li sigol. Bukanabuku umbuku huhaanaahu hata élambaayi li kunahaanaku kata ésukayi kúboñuliil.

⁴⁸ Sudaas abetumuu Yéesu li kuŋen bukanabuku umbuku, lalobiilob buu láatimuu akaan min kuhaas Yéesu. Laaniisaan: «Anawu an emmuu igaab kuŋenom, akilamuu. Jijokool.»

⁴⁹ Muñeˈe Sudaas li ayaan ajow boot tan Yéesu alakomuu, áliiŋ li aanool: — Lisaafi, Anahaan! Ban li agaabool.

⁵⁰ Bale Yéesu li aanool: — Afaalom, wahawu wan ubilumuu kakaan, ukaan wo. Muñeˈe bukanabuku kánabulumuu li Sudaas li kúlohul Yéesu, min kujokool.

⁵¹ Akee li bukanabuku kalako tomuu li Yéesu li áhoonul ékunduwayi yoola atek alokaawu ata anahaanawu ata élambaayi, afalen kanuu.

⁵² Yéesu li aanool: — Uhoon ékunduwayi yooli, mata bukanabuku feh katiikumemuu síkundu, fan kúketum síkundu.

⁵³ Kama uhaasut oon liyilo ihooñ Atuubawom mata min alambenom, li ayaan ásenulom muñeˈe uyooŋ wata emalaka wahaŋe kuŋen li úl̥uba?

⁵⁴ Bale ikaan momuu, buu wahawu wan Bakiicelabu bulobumuu woote úbajum? Bakiicelabu bonsoon wahawu unwu fan ubaj loon muñaˈa.

⁵⁵ Fúlum tó, Yéesu li aan búsukabu: — Waa, jibil boot kajokom li síkundu li sigol ló loon eenimuu ínje ákuu? Hunakoohunak linaanaak ibah li Eluufayi yata Ateemit, min inaak iliiken bukanabuku mata Ateemit, ban jijokutom.

⁵⁶ Bale wahawu unwu feh ubabbaj bájum kulimaku kan kufulofetaku kukiicumuu kukat to, li kubaj. Muñeˈe kúgoomaku koola li kukatool bo, min kutewoo kuwuj.

Yéesu hákil huhaanaahu hata Kusuwifaku

⁵⁷ Bukanabuku kajokumuu Yéesu, li kújowetumool boot bata anahaanawu ata élambaayi an koonemuu Kayif, ban kaliikenemuu ésukayi Eluwaayi yata Móyiis li kunahaanaku kuwoogumuu.

⁵⁸ Bale Fiyeel li alako lóyi min anaak ánabul li Yéesu, boot yok li ekaakayi yata eluufayi yata álambaawu ahaanawu. Nan áliiŋ dómuu, li abah áginnoo li kufooyaabuku min ajuk buu wahawu feh wóomi li úbanum eeno.

⁵⁹ Muñeˈe huhaanaahu hata élambaayi li Huhaanaahu hata Kusuwifaku, li kuŋes bukan kayilo kúmal kuya li Yéesu bájum li kuyili kumukool.

⁶⁰ Bale maayeet min sigujuun sameeŋe sibilumuu boot min símal siya li Yéesu, sijukut li akila butila banooban. Li húbanumahu, kánayine kúl̥uba li kubil kuyito to min koon:

⁶¹ — Anáyinaawu ummu lansaan: «Liyilo ihum Eluufayi yata Ateemit, ban li iŋa’ kunak kúhaaji min ilaañen iteef yo.»

⁶² Alámbaawu áamakawu li ayito, li aan Yéesu: — Kama waa ulet li ubag? Kama wahawu wan bukanabuku umbuku kulobemuu li wo kuya li awu, buu?

⁶³ Bale Yéesu abagut. Alámbaawu áamakawu li aanool: — Lil̥awi li kajaw kata Ateemit aloŋumuu. Ulóboli mantee awu ommuu Afakenaawu, Añiilawu ata Ateemit.

⁶⁴ Yéesu li aanool: — Lúlobulo mo awu humumi. Bale fan eenuul: Kítum muñeˈe, fan jijuk Añool-An mabahe kaŋen káli kata Ateemit ata sembe, li abilumul li ufaalawu wata haatiya emitayi.

⁶⁵ Nan Yéesu alobumuu loon muñaˈa, anahaanawu ata élambaayi li ahaacul wañawu wan akila humumool aakenumuu, aban li aan: — Lagele Ateemit. Ulaañenutaal usohulawaal kumaata. Jijame feh bukuluul humumuul kulimaku kan alobumuu aya li Ateemit.

⁶⁶ Muñeˈe buu jiyinoole? Li koonool: — Tootook min aket.

⁶⁷ Muñeˈe li kuyaan kumasenool li buul, ban li kutekool sínuka li siheejen ban li koonool:

⁶⁸ — Emmuu awu ommuu Afakenaawu, kama úheboli ayi atekimuu.

Fiyeel li aceeŋ aan lahaase Yéesu

⁶⁹ Muñeˈe no unnu, Fiyeel li abah tíyaŋ li ekaakayi yata anahaanawu ata élambaayi. Agoloola ata anahaanawu ata élambaayi li ákoojul Fiyeel min aanool: — Awu foof lunaanaak unaboo li Yéesu áfulumulomuu li etaamayi yata Gálile.

⁷⁰ Bale Fiyeel li aceeŋ hákil ésukayi feh min aan: — Ihaasut waa lufañe ulob.

⁷¹ Muñeˈe nan Fiyeel alakomuu ejowayi ajooŋoo bata kámbiilaku kata ekaakayi, agoloola akee li ajukool. Li aan bukanabuku kalako tomuu: — Anáyinaawu umme buko kunaake kunabumuu li Yéesu ata ésukayi yata Nasalet.

⁷² Fiyeel li alaañen aceeŋ, ban li anuu aan: — Ihaasut ánayinaawu ummu.

⁷³ Fiyowut, bukanabuku kalako tomuu li kúlohul Fiyeel min koonool: — Mal̥egen awu foof bukuluumuu, mata malobelamu mooli múhiisenhiisen bay lúfulumulo.

⁷⁴ Muñeˈe Fiyeel li anuu wah wajakut aya li akila humumool aan: — Ihaasut ánayinaawu ummu! Muñeˈe nan alobumuu loon muñowu, káyin li kuyaan kul̥ok.

⁷⁵ Li awayil̥o hulimahu han Yéesu alobool nomuu aanool: «Fan uceeŋ oon luhaasonhaas ñoono ñáhaaji tówum káyin kul̥ok.» Li áfulul tíyaŋ alako bo jíl̥ok jáamak.