Hulimahu Hásuumaahu loon Lík akiic homuu 1 - Jola-Kasa

Lík li alob mata éliibalayi yoola

¹ Téwofiil, bukan kameeŋe kuŋeseene mata min kukiic wahawu wabajumuu li alolaal.

² Kukittenkitten wahawu wabajumuu loon bukanabuku humumiil kamaat womuu li húkitumahu, kukittenolaal womuu. Bukanabuku umbuku muñeˈe kuwaaleya kata Hulimahu hata Ateemit.

³ Muñeˈe li igel̥l̥en min ihaas jak wahawu wabajumuu li húkitumahu iban, li een jaajak, Ahaanawu Téwofiil, mín ínje foof ikiic kulimaku unke boot li awu.

⁴ Likankaan mo bájum awu humumi li uyili uhaas oon wahawu wan kuliikenimuu mal̥egen.

Amalaka li alob Elisabet mata kabukiyaku kata Saŋ Batiis

⁵ Nan Elod alakomuu áyiiyawu ata etaamayi yata Súde, li baj álamba an kunaake koon Sakali li buwaajabu bata élambaayi yata Abiya. Aseekool kajawool Elisabet. Elisabet bubukoolum bata Aaloŋ.

⁶ Buko kúl̥uba feh kukankaan bukan kacole hákil Ateemit, imban kútuttuul jak siluwaasu feh li kulimaku feh kata Amaaŋenawu.

⁷ Bale kubajut añiil mata Elisabet ayilaat ajam huhaane, ban buko kúl̥uba foofiil feh bahallene.

⁸ Li líiŋ hunak hukee, Sakali li alako bulokool bata álamba li Eluufayi yata Ateemit, mata kaloku buwaajabu booliil.

⁹ Loon élambaayi ekaanemuu, akee li buko fan al̥usumi li éñaakutuken min anoken dán ñéyimuu li Eluufayi yata Amaaŋenawu ajow ayaben ló ecuulaayayi. Hunakahu unhu li lako Sakali.

¹⁰ Búsukabu feh bata káyinenumuu li Ateemit li bulako tíyaŋ min bul̥aw nan ecuulaayayi elakoyimuu kásulaku.

¹¹ Muñeˈe amalaka ata Amaaŋenawu li áfu’ Sakali, ban li ayito alaañ kaŋen kúli husilaahu tan ecuulaayayi ésuleyimuu.

¹² Nan Sakali ajukumuu amalakaawu li aliiwo. Ekole li ejokool.

¹³ Bale amalakaawu li aanool: — Sákoli, Sakali, mata Ateemit látuttuul kal̥awaku kooli. Aseeki Elisabet fan abuki añiil ánayine, ban loote ukaanool kajawaku kaaneyimuu Saŋ.

¹⁴ Fan úbajum li añiilawu ésuumahukow yáamak, ban bukan kameeŋe fan súumiil li kabukiyaku koola.

¹⁵ Mata fan alako an áamak hákil Amaaŋenawu. Let ahob bunuk, li ehob yanooyan yayilo ékaliyen. Buyinumabu Banabaabu fan bulako li akila ŋáa’ átowum abuki.

¹⁶ Fan álaañenul kuñiil kameeŋe kata Isilayeel boot bata Amaaŋenawu Ateemit ooliil.

¹⁷ Fan abil ló áyabul hákil Ateemit, li buyinumabu, li sembaasu sata afulofetawu Elí, min akaan bañiilabu li situubayiil kubaj hujamoo, min álaañenul kátuulutumuu Ateemit kubaj bújallo loon bata bukan kacole. Fan afale bukan boot kayab Amaaŋenawu.

¹⁸ Muñeˈe Sakali li agel̥l̥en amalakaawu aanool: — Li waa léetummuu íhaas een wahawu unwu mal̥egen? Mata ínje likaane anahaan ban foof aseekom lahallene.

¹⁹ Amalakaawu li aan Sakali: — Injé emmuu Gáabuliyeen. Injé ummu nanoonan hákil Ateemit, min inaak ilok boot li okila. Ateemit láboñulomboñul boot min ilob li awu min foof ilobi hulimahu unhe hásuumaahe.

²⁰ Ban muñeˈe fan ukumbo, ban let uyili úlobul boot yok hunakahu nan wahawu unwu wommuu li ubaj, mata úyinenut kulimaku kúmbaam kammuu li kubaj nan taŋayi yata ko yommuu li éliiŋ.

²¹ No unnu, ésukayi li elako banaakabu bata Sakali, li esego min afiyowulo muñowu dán ñéyimuu li Eluufayi yata Amaaŋenawu.

²² Nan Sakali áfulumuu, ayilaat alob li buko. Li kúnaanum kaanaku babbaj wah wan ajuke dán ñéyimuu li Eluufayi yata Amaaŋenawu. Sakali li anaak aŋa’ kuŋenool min anaak alob li buko. Ayilaat álobul.

²³ Muñeˈe nan kunakaku kata kalokuwaku kata Sakali kubanumuu, li alaañ ábalo.

²⁴ Fiyo jakee, aseekool Elisabet li ayab ha’, ban li ayolo kul̥eeñ koono hutok. Lanaanaak aan li buyinumool:

²⁵ — Wahawu unwe Amaaŋenawu akaanumuu boot lí ínje. Láfulenfulen muñeˈe lí ínje wahawu wájimuu li ibaj ñisuu hákil bukanabuku.

Amalaka li alob Mali mata kabukiyaku kata Yéesu

²⁶ Muñeˈe li hul̥eeñahu hutoken li hanolahu, Ateemit li áboñul amalakaawu,

²⁷ bata ásungute ahaasut ánayine an ánayine akee an koone Suseef li bubukoolumabu bata áyiiyawu Dayit, aŋese boot huyab. Asúngutaawu ummu kajawool Mali.

²⁸ Amalakaawu li anoken bata Mali áliiŋ li aanool: — Lisaafi Mali, awu jan Ateemit asenumuu káji. Amaaŋenawu ummu li awu.

²⁹ Nan Mali ajammuu kulimaku unku li aliiwo; li ayinoo to basaafabu umbu bo bommuu waa.

³⁰ Bale amalakaawu li aanool: — Sákoli Mali, mata lubabbaj káji hákil Ateemit.

³¹ Fan uyab ha’, ban fan úfulul li añiil ánayine an óomi li ukaan kajawaku kaaneyimuu Yéesu.

³² Fan alako an áamak, ban fan kuhooñool Añiil ata Ateemit ata Haatiya. Amaaŋenawu Ateemit fan asenool efenjeŋayi yata jáyiiyaju jata atuubawool ahaan Dayit.

³³ Fan alako áyii ata kata Isilayeel boot nanoonan. Jáyiiyaju joola let jiban.

³⁴ Mali li aan amalakaawu: — Kama buu wahawu unwu woote uyili ubaj, ínje jahaasutumuu ánayine?

³⁵ Amalakaawu li aanool: — Buyinumabu Banabaabu fan bubil bulako li awu, min sembaasu sata Ateemit ata Haatiya síhimeni loon máyiino. Mó mújimuu, añiilawu ammuu li abuki fan akaan añiil anabe, ban fan ahooñi Añiil ata Ateemit.

³⁶ Elisabet humumool ammuu ani, lahalete ban fan abaj añiil áyine, maayeet min ahallenumuu. Akila an kunaake koonumuu let ayili ajam huhaane, ummu muñeˈe li hul̥eeñool hutoken li hano.

³⁷ Mata bajut wah wan Ateemit ayilaat akaan.

³⁸ Muñeˈe Mali li aan: — Injé aloka ata Amaaŋenawu. Jow kaanom loon ulobumuu! Amalakaawu li ajow min akatool to.

Mali li ajow bagaagen Elisabet

³⁹ No unnu, Mali li ayito ajow li mahile boot li ésuk yakee yáami li kuyuuyaku kata etaamayi yata Súde.

⁴⁰ Alíiŋ, li anoken li eluufayi yata Sakali ban li asaaf Elisabet.

⁴¹ Nan Elisabet ayaane ajammuu Mali li asaaf, añiilawu li agoloo li halahu hata Elisabet. Buyinumabu Banabaabu li bulako li Elisabet ŋáa’.

⁴² Elisabet li alob butiya aan: — Awu Ateemit ahaŋumuu másooniyen li kaalaabuku feh, ban kásooniyenaku koola kunku foof li añiilawu an ommuu li ubaj.

⁴³ Kama sum ínje emmuu ayi, májimuu jaaw ata Amaaŋenawu úmbaam li abilom bagaagen?

⁴⁴ Mata, lujuke, nan iyaane ijamimuu li usaaf, añiilawu li afum jifum jata ésuumahukow li halom.

⁴⁵ Awólo, awu jáyinenumuu kaanaku wahawu wan Amaaŋenawu alobimuu fan ubaj.

Kakijenaku kata Mali

⁴⁶ Muñeˈe Mali li aan: — Lisale maluukamu mata Amaaŋenawu li yaalayi yúmbaam,

⁴⁷ ban li súumom li buyinum mata Ateemit áji, ammuu Afakenaawu úmbaam.

⁴⁸ Mata Ateemit lawayil̥owonwayil̥o, ínje jahine emmuu alokaawu oola. Mó mújimuu, kítum hunakahu hata síyaat, bukanabuku feh fan kunaak koonom: «áwolo, Mali».

⁴⁹ Mata Ateemit ata Sembe lakankaan wah wáamak boot lí ínje. Kajawaku koola kuñawo.

⁵⁰ Ban káyiyenaku koola fan kulako li bukanabuku kákoliwoolumuu li taŋ yanooyan.

⁵¹ Lakankaan wah wáamak li sembaasu sata kaŋenaku koola: layiyyiis bukanabuku katebenoolomuu li uyinumiil.

⁵² Ateemit láhooluuhoolul kata sembaasu li sifenjeŋasu sooliil, min ateben kawalenoolomuu.

⁵³ Lasensen ebaj yáamak kacaaletumuu, min alaañen kabajumuu kúbalo, kuŋeniil kuŋen.

⁵⁴ Labiibil kalamben kata Isilayeel, kammuu kuloka koola: amojenut káhiis káyiyenaku koola,

⁵⁵ Abulaham li bubukoolumabu boola boot nanoonan, loon alob momuu situbawolaal sihaan.

⁵⁶ Mali li alako bata Elisabet ebat kul̥eeñ kúhaaji, fú’ tó, li alaañ bóot.

Kabukiyaku kata Saŋ Batiis

⁵⁷ Muñeˈe nan hunakahu hata Elisabet húliiŋumuu, li anoken li afúlul li añiil ánayine.

⁵⁸ Kukinoo Elisabet li bukanool li kujam kaanaku Amaaŋenawu láyiyenooyiyen ŋáa’, li súumiil boot li Elisabet ló.

⁵⁹ Nan añiilawu abajumuu kunak hutok li kúhaaji, li kubil boot kateyenool búkut. Imban li kufañeen kukaanool kajawaku kata atuubawool, Sakali.

⁶⁰ Bale jaawool li aan: — A’aa’! Añiilawu fan ahooñi Saŋ.

⁶¹ Bukanabuku li koonool: — Bajut an li ebukiinayi yooli, abaje kajawaku unku.

⁶² Muñeˈe li kuŋa’ kuŋeniil min kugel̥l̥en atuubawool min alobiil kajaw kay lafañe min kukaan añoolool.

⁶³ Sakali li alobiil min kusenool jibabbalu min akiic ló kulimaku unke: «Kajawool Saŋ.» Buko foofiil feh li kusego.

⁶⁴ Yan no unnu, Sakali li ayili alaañen álobul. Li alako to kasal Ateemit butiya.

⁶⁵ Kukinoolool feh li kúkoli. Wahawu unwu feh li uhebooli li etaamayi yata kuyuuyaku kata Súde.

⁶⁶ Bukanabuku feh kajamumuu li kulob mo, li kukaan kulimaku unku li uyinumiil min kunaak kugel̥l̥enoolo koon: — Kama waa añiilawu aate abil alako? Li mal̥egenamu sembaasu sata Amaaŋenawu li akila silakowe.

Sakali li akijen aya li káyiyenaku kata Ateemit

⁶⁷ Muñeˈe Buyinumabu Banabaabu li bumeeŋen Sakali, ammuu atuubaawu ata añiilawu, min alob kulim kata Ateemit aan:

⁶⁸ — Usalaal Amaaŋenawu, mata labiibil kalamben ésukayi yoola, min afaken yo.

⁶⁹ Lasenolaasen Afakena ata sembe, li bubukoolumabu bata aloka oola Dayit.

⁷⁰ Wahawu unwu Ateemit alobumuu nan fiyo, li kufulofetaku koola kanabaaku.

⁷¹ Lansaan fan afakenolaal li kulatoolawolaal, li afakenolaal foof li sembaasu sata bukanabuku kahoyolaamuu.

⁷² Muñowu Ateemit áhiisummuu káyiyenaku koola situubawolaal, loon alobumuu, ban li awayil̥o húfaalumahu hoola hanabaahu.

⁷³ Mata Ateemit lanunnuu asen Abulaham ammuu atuubawoolaal ahaan,

⁷⁴ kaanaku fan afakenolaal li kuŋenaku kata kulatoolawolaal, aban li akatolaal min ulokaal boot li akila babajut ekole yanooyan.

⁷⁵ Bájum li uyiliyaal ulakowaal bukan kanabe, li bukan kacole hákil Ateemit, kunakaku feh kata buloŋabu boololaal.

⁷⁶ Bale awu, añoolom, fan ubil uhooñi afulofet ata Ateemit ata haatiya, mata fan uyab Amaaŋenawu hákil min úhosul bútinabu boot li okila.

⁷⁷ Min akaan ésukayi yoola ehaas kaanaku fan áfakenum yo, li kabonket kata uhoofoolawu wooliil.

⁷⁸ Mata Ateemitawu oololaal lababbaj káyiyen ban li ásuum, mó mújimuu fan akaan ehiitum ehiitenumulolaal haatiya, loon banakabu bo li kayitowul.

⁷⁹ Boot kahiiten kammuu li emoocayi li kammuu li élimayi yata eketayi, boot kájowetumolaal li bútinabu bata kásuumaayaku.

⁸⁰ Muñeˈe añiilawu Saŋ li ankoo li sembewool li buyinumool ló. Li ajow akin ban wayitomuu, boot yok hunakahu nan áfululumuu hákil ésukayi feh, min kata Isilayeel kuhaasool.