Eébulo 2 - Jola-Kasa

Kafakaku koololaal kubabbaj jáliŋ yáamak

¹ Wahawu unwu újimuu lootaale kama uhaŋaal makaan to uyinumolaal jak li kulimaku kan ujamaalumuu, jakum bil ulowaal li hújim.

² Hulimahu han kumalakaaku kulob nomuu, hulakolako hulim hata mal̥egen, ban anoowan áhoogulo hó mantee foof átuulut hó, lababbaj katek kacole.

³ Muñeˈe kama buu alolaal humumolaal uyiliyaale ufakaal li katekaku unku, alolaal bacucaale kafak káamak loon unku? Amaaŋenawu humumool okila ajande alob mata kafakaku unku. Fúlum tó, bukanabuku kajamumuu mata ko li akila, li kulobolaal kaanaku mal̥egen.

⁴ Ateemit humumool li ájowum li búhiisenum, li bakaane babaje sembe, li wah wájaahaleniye min áhiis kaanaku kulimaku kan kulobumuu mal̥egen. Ateemit láhihhiis foof wahawu unwu min asenumuu bukan úji wata Buyinumabu Banabaabu loon afañumuu.

Anawu ayilimuu áji bukanabuku li kufak

⁵ Li mal̥egenamu, adunaayi yammuu li ebil yan ulobaalemuu mata yo, Ateemit aŋalut yo abet li kuŋen kata emalaka.

⁶ Akee lansaan tikee: «Ateemit, waa ál̥ahukowan aam, mata min uwayil̥owool? Waa añool húkow hul̥a aam, mata min ucookoolool?

⁷ Lukankaan min kumalakaaku kufan kuhaŋ ál̥ahukowan jakee; li ukaanool abaj máyiineni li kasal.

⁸ Li uŋa’ wahawu feh uwalenool li koot.» Nokoomuu loon Ateemit lasensen ál̥ahukowan kayile li wahawu feh, yo yommuu kama bajut wah wan akat bo wan abajut kayile li wo. Bale boot yok muñeˈe, ujukolutaal kaanaku ál̥ahukowan lababbaj kayile li wahawu feh.

⁹ Ban lujukaale kaanaku Ateemit lakankaan min emalakaayi efan ehaŋ jatit Yéesu, bale muñeˈe labaje máyiineni ban li aluukeni, humum hata eketayi yan aketumuu li sílaam ló. Wahawu unwu újimuu Yéesu li ajaken eketayi boot kafaken bukanabuku feh, humum hata kájiyaku kata Ateemit.

¹⁰ Li mal̥egenamu, Ateemit akila áwuwene wahawu feh wabajumuu, ban wahawu feh ubabbaj boot li akila. Min ban, lakankaan min kameeŋe li bañoolool kulako li máyiineniyamu moola. Emmuu Yéesu akila afakeneyiilumuu, mó mújimuu Ateemit li áati akaanool ájowum li sílaam mantee li áliiŋ jak.

¹¹ Yéesu okila ágiilenemuu bukanabuku li uhoofoolawu wooliil, ban bukanabuku feh kan ammuu li kágiilenaku, buko foofiil feh Atuuba ano kubaje. Wahawu unwu újimuu Yéesu asuuwut bahooñiil kutuyool,

¹² nan aanumuu: «Fan ilob mata kajawaku kooli kutuyom, fan isali hákil huwoogahu.»

¹³ Li alaañen aan: «Injé fan íkangum li Ateemit.» Li aan foof: «Injé umme li bañiilabu ló ban Ateemit asenommuu.»

¹⁴ Emmuu kama bañiilabu umbu kúl̥ahukowan koom, Yéesu humumool foof li aŋa’ bóono bata ál̥ahukowan, mantee li ájowum li eketayi yoola min ágooten Sayitaane aakumuu sembaasu sata eketayi.

¹⁵ Mo foof láfakenummuu bukanabuku kan kákoliyaku kata eketayi kukaanumuu kulako emiikeel li buloŋabu booliil feh.

¹⁶ Li mal̥egenamu, let kumalaka labile kalamben, bale bubukoolumabu bata Abulaham labile kalamben.

¹⁷ Wahawu unwu újimuu li áati anokoo li kutuyool li wahoowah feh, bájum li alako álamba áamak ayilo káyiyen bukan, ban li al̥egen li bulokabu bata Ateemit min ahal uhoofoolawu wata bukanabuku.

¹⁸ Emmuu akila humumool lálallaam sílaamasu sabilumulomuu li jabuutoo, muñeˈe layilo alamben bukanabuku kan kommuu li kabuutoo.