Búhiisenumabu 8 - Jola-Kasa

Bálikaañabu butoken li búl̥ubutabu li búfuleni

¹ Nan Agálalaanawu áfulenumuu bálikaañabu butoken li búl̥ubutabu, li lu sub li emitayi jow yili baj húkej ewaatu.

² Muñeˈe li ijuk kumalakaaku hutok li kúl̥ubaaku kalakowemuu hákil Ateemit. Li kuseniil usiin woono hutok li úl̥uba.

³ Amalaka akee li abil akooj husilaahu. Li kusenool ecuulaay yameeŋe, bánum li asilawoo yo li ul̥awawu wata bukanabuku feh kata Ateemit, li husilaahu hata éwulusayi hammuu hákil efenjeŋayi yata jáyiiyaju.

⁴ Hakoolahu hata ecuulaayayi li hata ul̥awawu wata bukanabuku kata Ateemit, li húfulumul li kaŋenaku kata amalakaawu hákil Ateemit.

⁵ Fúlum tó, amalakaawu li aŋa’ ateefaayawu dán kúsulemuu ecuulaay, min áŋalul sambunasu sata husilaahu min ameeŋen yo aban, li abeten yo li etaamayi. Nan abeten yomuu li etaamayi, li yaan baj kufalajaj, li kulim, li kawiwijen. Etaamayi li egoloo.

Kumalaka kubakii li kul̥ok usiinawu wooliil

⁶ Kumalakaabuku hutok li kúl̥ubaaku kaakenumuu usiinawu hutok li úl̥ubaawu li kulako kágoluloo boot min kul̥ok usiinawu.

⁷ Amalakaawu átinaalawu li al̥ok kasiinaku koola. Kuteyisa li sambun ságinnoole li húsim li siyaan sílowul li etaamayi. Bugeb bano li úhaajiyawu wata etaamayi li búsulo. Bugeb bano li úhaajiyawu wata unuunukawu li búsulo. Mahosamu feh maloŋumuu li músulo foof.

⁸ Fúlum tó, amalakaawu ál̥ubutawu li al̥ok kasiinaku koola. Li kubeten li husamuwahu wah ukee wanokoole li huyuuy háamak hátife sambun. Bugeb bano li úhaajiyawu wata husamuwahu li bulaañ húsim.

⁹ Bugeb bano li úhaajiyawu wata wahawu feh wammuu li husamuwahu li buket. Bugeb bano li úhaajiyawu wata síbatowasu, li bukajen.

¹⁰ Amalakaawu áhaajutawu li al̥ok kasiinaku koola. Ewuut yáamak yátife loon húlaañaañ hata sambun, li élowumul li emitayi. Nan éliiŋulumuu, li elo li bugeb bano li ugebawu úhaaji wata utunkawu li uhuwenawu. (

¹¹ Ewuutayi inyu kajaw yo «Busik Bátaliye».) Bano li ugebawu úhaaji wata malamu li bútali mátali, ban kameeŋe li bukanabuku kahobumuu malamu ummu li kuket mata mútalitali ŋáa’.

¹² Amalakaawu abakiilenawu li al̥ok kasiinaku koola. Bano li ugebawu úhaaji wata banakabu, li bano li úhaajiyawu wata hul̥eeñahu li bano foof li úhaajiyawu wata bawuutabu li bugoli gay bugeb bano li úhaajiyawu wata mawuŋaamu mata bo li múyaakulo. Bano li ugebawu úhaaji wata etihunakaayi li wata ehukaayi li búlimen.

¹³ Muñeˈe li ijuke, li ijuk huwaalu halakowe jíyit haatiya tiya, li ijam ho li hunaak hul̥ok butiya hoon: «Iyéno, íyeno, íyeno bukanabuku kakinumuu li etaamayi, mata kumalaka kaabuku kúhaajiyaku kúji, kammuu li kumit kul̥ok usiinawu!»