Búhiisenumabu 7 - Jola-Kasa

Húhaasumahu hata bukanabuku kata Ateemit

¹ Fúlum tó, li ijuk kumalaka kubakii mayitowe li ugebawu ubakiilawu wata etaamayi. Li kujok úlusawu ubakiilawu wata etaamayi, jakum bil búlus bútekul li etaamayi, li halahu, li bunuunuk banooban.

² Muñeˈe li ijuk amalaka akee li abilumul Akiw. Li átuk húlangumaasowumahu hata Ateemit aloŋumuu. Li alob butiya kumalakaabuku kubakiilaku kan Ateemit asenumuu sembe min kukajen etaamayi li halahu.

³ Li aaniil: «Jakum jikaan majakut etaamayi, halahu li unuunukenawu, áloli bakaanolut húlangumaasowahu lí síjontumasu sata kulokaabuku kata Ateemit oololaal.»

⁴ Muñeˈe li kulobom bukan koono keem kukaanumuu húlangumaasowahu hata Ateemit li síjontumasu sooliil: bukanabuku umbuku kan kúlangumaasomuu koono sínjunne éteemeel li kúyii kúl̥uba li kubakii, kata utoŋawu feh wata Isilayeel.

⁵ Li butoŋabu bata Súda, bukan koono sínjunne kuŋen lí síl̥uba; li butoŋabu bata Lúben, bukan koono sínjunne kuŋen lí síl̥uba; li butoŋabu bata Gad, bukan koono sínjunne kuŋen lí síl̥uba;

⁶ li butoŋabu bata Aseel, bukan koono sínjunne kuŋen lí síl̥uba; li butoŋabu bata Nefitali, bukan koono sínjunne kuŋen lí síl̥uba; li butoŋabu bata Manase, bukan koono sínjunne kuŋen lí síl̥uba;

⁷ Li butoŋabu bata Simiyoŋ, bukan koono sínjunne kuŋen lí síl̥uba; li butoŋabu bata Lebi, bukan koono sínjunne kuŋen lí síl̥uba; li butoŋabu bata Isakaal, bukan koono sínjunne kuŋen lí síl̥uba;

⁸ li butoŋabu bata Sabuloŋ, bukan koono sínjunne kuŋen lí síl̥uba; li butoŋabu bata Suseef, bukan koono sínjunne kuŋen li síl̥uba; li butoŋabu bata Bayiseme, bukan koono sínjunne kuŋen lí síl̥uba.

Búsuk báamak bata bukan kata banooban

⁹ Fúlum tó, li ijuke li ijuk búsuk báamak bata bukan ban an ayilaat acob. Kukankaan bukan kata sihetasu feh, kata utoŋawu feh, kata etaam yanooyan, li kata silobasu feh. Li kuyito hákil efenjeŋayi yata jáyiiyaju li hákil Agálalaanawu. Ujúfo wahiite kukaanowe, ban li kooken úkunt li kuŋeniil.

¹⁰ Li kulob butiya koon: «Ateemit oololaal abahumuu li efenjeŋayi yata jáyiiyaju, okila li Agálalaanawu kufakenolaalumuu!»

¹¹ Kumalakaabuku feh li kuyito kúwooñen efenjeŋayi yata jáyiiyaju, kunahaanaku, li wahawu ubakiilawu waloŋumuu. Li kuŋa’ wuuliil kuya teetaam hákil efenjeŋayi yata jáyiiyaju, min kumanen Ateemit,

¹² koon: «Aameen! Ateemit oololaal laate amaneni, Okila akilumuu máyiineniyamu li bújallowabu. Usalaalool ban li úbinkenaalool. Lababbaj sembaasu ban li akaan Ateemit ata sembe boot nanoonan. Aameen!»

¹³ Akee li kunahaanaku kahallenumuu li agel̥l̥enom aanom: — Bukanabuku umbuku kakaanomuu újufowawu wahiitaawu buko kommuu bukay, bay kúfulumulo?

¹⁴ Li eenool: — Awu baleyi uhaase, amaaŋen. Muñeˈe li aanom: — Buko kommuu bukanabuku kálaamumuu sílaamasu sáamakasu. Kufoffos újufowawu wooliil, ban li kuŋa’ húsimahu hata Agálalaanawu min kukaan wo uhiit.

¹⁵ Mó mújimuu, li kuyito hákil efenjeŋayi yata Ateemit min kunaak kumanenool etihunaka kuban ehuka li Eluufayi yoola. Anawu abahumuu li efenjeŋayi yata jáyiiyaju fan afooyiil.

¹⁶ Bucaa li bahob let bulaañen bujokiil. Banakabu let bulaañen busowiil, ésufa let elaañen eyokeniil.

¹⁷ Mata Agálalaanawu ammuu li tut efenjeŋayi yata jáyiiyaju, fan alako amataawu ooliil. Fan ajow li buko boot bata uhuwenawu wata malamu masenemuu buloŋ. Ban Ateemit fan átil̥ muhuuwamu mata kúkilaku kooliil.