Búhiisenumabu 6 - Jola-Kasa

Agálalaanawu li ákotul bálikaañabu hutok li bano min ábabul éliibalayi

¹ Muñeˈe li ijuk Agálalaanawu li átoŋ ábabul éliibalayi yan kuŋalumuu bálikaañ hutok li búl̥uba min kubab yo. Nan ákotulumuu bálikaañabu bútinaalabu, li ijam wakee li wahawu ubakiilawu waloŋumuu li ulob hulim haluuke loon kawel kata hufalajaj woon: «Ubil!»

² Fúlum tó, li ijuke li ijuk efilinjebe yahiite. Anawu alemboomuu li yo, huŋaajen laakene. Li kusenool éjambi, ban li ajow li kaheekaku ló, ban fan amit alaañen aheek.

³ Nan Agálalaanawu ákotulumuu bálikaañabu búl̥ubutabu, li ijam wahawu úl̥ubutawu waloŋumuu li woon: «Ubil!»

⁴ Muñeˈe efilinjebe yakee li éfulul. Ejúnjunk loon sambun. Anawu alemboomuu li yo, li kusenool sembe min áfulen kásuumaayaku li etaamayi mantee bukanabuku li kumukoo. Li kulaañen kusenool ékundu yáamak.

⁵ Nan Agálalaanawu ákotulumuu bálikaañabu búhaajutabu, li ijam wahawu úhaajutawu waloŋumuu li woon: «Ubil!» Li ijuke, li ijuk efilinjebe yal̥ayine. Anawu alemboomuu li yo, éfeesawum laakene li kaŋenool.

⁶ Muñeˈe li ijam wah ukee loon hulim hata an, li úfulumul li tut wahawu ubakiilawu waloŋumuu. Wahawu li woon: «Hukiib hano hata edenfeteŋ boot li bacaam bata bulok etihunaka, kukiib kúhaaji kata emaano boot li bacaam bata bulok etihunaka. Bale jakum ugo’ éduuliinayi li ébiiñayi.»

⁷ Nan Agálalaanawu ákotulumuu bálikaañabu bubaalikenabu, li ijam wahawu ubakiilenawu waloŋumuu li woon: «Ubil!»

⁸ Li ijuke li ijuk efilinjebe yágiiniinete. Anawu alemboomuu li yo kajawool Eket. Dín bukanabuku kaketumuu kóomimuu li naak nábul li akila. Li kuseniil sembe li bugeb bukee bata etaamayi min kuyili kumukum bukanabuku kakinumuu li bugebabu umbu, li ékundu, li bamuufaay, li úsomut, li sínuukuleŋasu sata li bujal.

⁹ Nan Agálalaanawu ákotulumuu bálikaañabu butokenabu, li ijuk kata láala husilaahu saalasu sata bukanabuku kan kumukumuu mata hulimahu hata Ateemit húji, li mata min kulobumuu bukanabuku hulimahu unhu hata Ateemit.

¹⁰ Li kunaak kulob butiya koon: «Anahaan anabe ata mal̥egen, kama boot min unaak boot yok nay útowum utiib bukanabuku kammuu li etaamayi, min kubaj katek mata min kúmukolimuu?»

¹¹ Muñeˈe li kusen anoowan li buko kájufo kahiite, ban li kooniil kukokkoben jakee boot yok nan kufaaliil kuloka, li kutuyiil kommuu lí kúli kan kommuu li kumuk loon buko.

¹² Muñeˈe li ijuk nan Agálalaanawu ákotulumuu bálikaañabu butoken li banolabu, etaamayi li egoloo ŋáa’. Banakabu li bul̥ayen tilili loon kábil. Hul̥eeñahu li hújunk cúl loon húsim.

¹³ Bawuutabu li búlowumul li emitayi boot teetaam loon kul̥el̥u kakujut, kan búlus bútekulo li butuulul ko.

¹⁴ Emitayi li éjim loon hubooñ hata éliibal abooñeyimuu. Kuyuuyaku feh li kuyinno tan kulakomuu, sítebelemukasu foof li siyinno.

¹⁵ Muñeˈe kúyiiyaku kata etaamayi li bukanabuku káamakaku, kunahaanaku kata kusollaaliyaku li kusaanumaku, bukanabuku kabajumuu sembe, emiikeelayi feh li kaletumuu emiikeel, buko feh li kujow kuyolo li uwokaayawu li kata láala kúlankiinaku kata kuyuuyaku.

¹⁶ Li kunaak koon kuyuuyaku li kúlankiinaku: «Jílowul jilo li óloli min jíyololi jakum bil anawu abahumuu li efenjeŋayi yata jáyiiyaju ájukoli, mantee Agálalaanawu jakum ábetoli li katek.

¹⁷ Mata hunakahu háamakahu hata katekaku kooliil húliiŋulo. Li hunakahu unhu ayi li buko aate ayili ayito to?»