Búhiisenumabu 5 - Jola-Kasa

Elíibalayi yasenimuu ágalalaanawu boot ábabul

¹ Li ijuk éliibal yata hubooñ li kaŋenaku kúlilaku kata anawu abahumuu li efenjeŋayi yata jáyiiyaju. Hubooñahu hukiicikiic li ugebawu úl̥uba wata ho, ban li kuŋa’ bálikaañ min kujok ho tin toono hutok li tíl̥uba.

² Muñeˈe li ijuk amalaka abaje sembe anaake alob butiya aan: «Ayi atooke min áfulen bálikaañabu, min ábabul éliibalayi yata hubooñahu?»

³ Bale bajut an li emitayi, li etaamayi, li kata láala etaamayi, ayilo ábabul éliibalayi min ajuke kata láala yó.

⁴ Muñeˈe li il̥ok ŋáa’ mata bajut an atooke min ábabul éliibalayi min ajuke kata láala yó.

⁵ Akee li kunahaanaku kahallenumuu li aanom: «Jakum ul̥ok. Ujuke, Eŋáŋayi yata kalandaku kata Súda, yammuu bubukoolumabu bata áyiiyawu Dayit, yabajumuu kaheekaku, eyilo éfulen bálikaañabu hutok li búl̥ubaabu, min ébabul éliibalayi yata hubooñahu?»

⁶ Muñeˈe li ijuk Agálalaan ayitowe li tut efenjeŋayi yata jáyiiyaju. Wahawu ubakiilawu waloŋumuu li kunahaanaku kahallenumuu, li kúguutool. Agálalaanawu ummu lanokoonokoo li ágalalaan an kumuke. Labaje usiin hutok li úl̥uba li kúkil hutok li kúl̥uba. Usiinawu unwu hutok li úl̥ubaawu li kúkilaku unku, wo wommuu uyinumawu hutok li úl̥ubaawu wata Ateemit wáboñulimuu li etaamayi feh.

⁷ Agálalaanawu li ajow ayab éliibalayi yata hubooñahu li kaŋenaku kúlilaku kata anawu abahumuu li efenjeŋayi yata jáyiiyaju.

⁸ Nan Agálalaanawu ayabumuu éliibalayi yata hubooñahu, wahawu ubakiilawu waloŋumuu li kunahaanaku áyii li kubakiilaku kahallenumuu, li kúkuntuŋ hákilool. Anoowan li buko ekontiŋ laakene li sijunk sata éwulus mameeŋe ecuulaay. Sijunkasu unsu sameeŋumuu ecuulaayayi so sommuu ul̥awawu wata bukanabuku kammuu kata Ateemit.

⁹ Muñeˈe li kukijen kakijen kuwunkul koon: «Lutootook min uŋa’ éliibalayi. Lutootook foof min úfulen bálikaañabu. Mata awu umukimuu, ban li húsimahu hooli, lúfakenummuu bukanabuku boot li Ateemit, bukanabuku kata kaland kanookan, kata elob yanooyan, kata het yanooyan, li kata etaam yanooyan.

¹⁰ Lukaaniikaan kulako jáyii jata élamba, boot mata min kulok boot li Ateemit oololaal, ban fan kulako kúyii li etaamayi.»

¹¹ Muñeˈe li ilaañen ijuke, li ijam kulim kata kumalaka kameeŋe mameeŋ, sínjunne li sínjunne. An ayilaat acobiil. Li kuyito kúwooñen efenjeŋayi yata jáyiiyaju, li wahawu ubakiilawu waloŋumuu, li kunahaanaku kahallenumuu.

¹² Li kulob butiya koon: «Agálalaanawu amukimuu, okila atookumuu min ayab sembaasu, li hubajahu, bújallowabu li sembe, kábinkenaku, máyiineniyamu li kasalaku.»

¹³ Li ijam wahawu feh wan Ateemit áwuwenumuu li emitayi, li etaamayi, li wammuu kata láala etaamayi, li wata husamuwahu: wahawu feh wáami dómuu, li ijam wo li ukijen woon: «Anawu abahumuu li efenjeŋayi yata jáyiiyaju, awu Agálalaanawu, kasalaku li kábinkenaku, máyiineniyamu li sembaasu, jow ulako uya boot nanoonan.»

¹⁴ Wahawu ubakiilawu waloŋumuu li unaak woon: «Aameen!» Kunahaanaku kahallenumuu li kúkuntuŋ min kumanen.