Búhiisenumabu 22 - Jola-Kasa

¹ Fúlum tó, amalakaawu li áhiisom foof katunkaku kata malamu mata buloŋabu. Malamu ummu mugiwulogiwulo loon eweel, ban li munaak múfulumul li efenjeŋayi yata Ateemit li yata Agálalaanawu.

² Li munaak múteyum li tut kaayeenaku kata ésukayi. Li baj li kageb kanookan kata katunkaku, bunuunukenabu bata buloŋabu. Bunuunukenabu umbu li bunaak bubuk mutiñaay ñoono ñaŋen li ñál̥uba emitoomit. Hul̥eeñoohul̥eeñ fan bubuk ñano. Etojayi yata bo yo kuŋalemuu min kubunten bukanabuku kata sihetasu feh.

³ Wahoowah feh wan Ateemit aane ujakut let ubaj li ésukayi inyu. Efenjeŋayi yata Ateemit li yata Agálalaanawu fan elako li ésukayi inyu, ban kulokaabuku kata Ateemit fan kunaak kumanenool.

⁴ Fan kujuk buulabu boola, ban kajawaku koola fan kukiici li síjontumasu sooliil.

⁵ Ehuka let elaañ ebaj ló. Let kulaañen kusohula mawuŋe mata ehiitum li mata banakabu, mata Amaaŋenawu Ateemit fan awuŋeniil, ban li kulako kúyii boot nanoonan.

Ebilayi yata Yéesu

⁶ Fúlum tó, amalakaawu li aanom: — Kulimaku unke kulim káwooluwe ban kata mal̥egen. Amaaŋenawu, láboñuuboñul amalakaawu oola abil alob kulokaabuku koola wahawu wammuu li ubaj ban let fiyo.

⁷ Yéesu li aan: — Ujanten, muñeˈe li ibil! Awólo anawu ammuu li átuk jak kulimaku kabilummuu li Ateemit, kammuu li éliibalayi inyu.

⁸ Injé Saŋ, lijanjam ban li ijuk wahawu unwu. Ban nan ijam womuu ban li ijuk wo iban, li íkuntuŋ li kootaku kata amalakaawu áhiisom womuu booteen min imanenool.

⁹ Amalakaawu li aanom: — A’aa’! Jakum ukaan mo! Injé aloka leem loon awu, loon kutuyi kammuu kufulofet, li loon foof bukanabuku feh kátukumuu jak kulimaku kata éliibalayi inyu. Ateemit bale lóotimuu umanen!

¹⁰ Muñeˈe amalakaawu li afamen aanom: — Jakum uyoloo kulimaku unku kabilummuu li Ateemit kammuu li éliibalayi inyu, mata taŋayi nan wahawu unwu wommuu li ubaj, ékoojulo.

¹¹ An ájakaatimuu, jakum akat bújakaatiyabu boola. An anaakumuu akaan wah wasetut, jakum akat kakaan wah wasetut. An anaakumuu akaan majake, jakum akat kakaan majake. An aloŋumuu boot li Ateemit, jakum akat buloŋ boot li Ateemit.

¹² Yéesu li alaañen aan: — Ujanten, ínje muñeˈe li ibil. Ban fan íŋaloolul bacaamabu ban emmuu li isen anoowan, naboo li wahawu wan akaanumuu.

¹³ Injé emmuu ekiicayi étinaalayi li élelenumayi, ínje emmuu foof átinaalawu li ásolaawu, húkitumahu li húbanumahu.

¹⁴ «Awólo bukanabuku kafosumuu wañawu wooliil, min kuyili kutiñ mutiñaayamu mata bunuunukenabu bata buloŋabu, ban li kújowum li wámbiilawu kunoken li ésukayi.

¹⁵ Bale bukanabuku kammuu li kulako tíyaŋ ésukayi, buko kommuu kakaanemuu wah wasuuneniye, kakaanemuu jángafayinde, sicagaasu, kamukemuu bukan, kamanenemuu kuteemit kalet mal̥egen, li bukanabuku feh kafañumuu émalimiñ ban li kunaak kúmal.

¹⁶ «Injé Yéesu, líboñuuboñul amalakaawu úmbaam abil alobuul wahawu feh li sijanguwasu. Injé emmuu bubukoolumabu bata butoŋabu bata Dayit. Injé emmuu elabenayi.»

¹⁷ Buyinumabu li Abúwaawu li koon: «Ubil!» An ajamumuu wahawu unwu li aan foof: «Ubil!» An bahob bujokoolumuu li abil. An afañumuu malamu mata buloŋabu, li abil aŋa’ mo ban let acaam.

Húwuñenumahu

¹⁸ Injé Saŋ, fan ilob anoowan ajame kulimaku kata Ateemit kammuu li éliibalayi inye ikat to. An afamen dómuu wah, Ateemit fan afamenool sílaamasu salobimuu mata so li éliibalayi inye.

¹⁹ An áyaakulumuu wah ukee li kulimaku kata Ateemit kammuu li éliibalayi inye, Ateemit fan áfulen joola li bunuunukenabu bata buloŋabu, ban let ayili anoken li ésukayi yanabaayi. Wahawu unwu ukiicikiic li éliibalayi inye.

²⁰ Anawu aanumuu kulimaku unku mal̥egen, laane: «Eéhe’, ínje ummu li ibil!» Aameen! Ubil, Amaaŋenawu Yéesu!

²¹ Kájiyaku kata Amaaŋenawu Yéesu kulako li bukuluul foofuul feh.