Búhiisenumabu 21 - Jola-Kasa

Emit li etaam yawunkul

¹ Fúlum tó, li ijuk emit yawunkul li etaam yawunkul. Emitayi yátinaalayi li etaamayi yátinaalayi síjinjim, ban hándiinaam hulaañenut hubaj.

² Muñeˈe li ijuk ésukayi yanabaayi, yammuu Yeelusalem yawunkulayi, li éwalowumul li emitayi bata Ateemit, majake loon anaale ajeˈe boot búyabo ásangenoolowe ajow ajak boot li áyinool.

³ Li ijam hulim habaje sembe li húfulumul li efenjeŋayi yata jáyiiyaju, haane: «Muñeˈe eluufayi yata Ateemit inyu li bukanabuku. Ateemit fan akin li buko, min kulako bukan koola. Ateemit humumool fan alako li buko, min alako Ateemit ooliil.

⁴ Fan átil̥ muhuuwamu mooliil feh li kúkiliil. Eket let elaañen ebaj, ñíkul foof let ñibaj. An let al̥okoo, an let abaj foof sílaam. Mata, wahawu feh uhaanawu fan újim.»

⁵ Muñeˈe anawu abahumuu li efenjeŋayi yata jáyiiyaju, li aan: «Jijuke, boot min ilaañen wahawu feh uwunkulo.» Li afamen aanom: — Ukiic, mata kulimaku unke kulim kata mal̥egen, ban an layilo áyinen li kó.

⁶ Li amit aan: — Muñeˈe bane! Injé emmuu átinaalawu li ábanumawu, húkitumahu li húbanumahu. An bahob bujokoolumuu, fan isenool malamu mata kábulenaku kata malamu mata buloŋabu ahob, ban let acaam.

⁷ An ammuu abaj kaheekaku, fan atowo wahawu unwu. Injé fan ilako Ateemit oola, akila li alako añoolom.

⁸ Bale bukanabuku kákol̥l̥imuu, kátukutumuu lit, kakaanemuu wah wasuuneniye, kamukemuu bukan, káfulowemuu li aletalet, kakaanemuu jángafayinde, kamanenemuu kuteemit kalet mal̥egen li kúmalamiñaku feh, buko fan kujow li buwokaayabu bata sambunasu li batolokabu básoyiyaabu. Bo bommuu eketayi yál̥ubutayi.

Yeelusalem yawunkulayi

⁹ Muñeˈe akee li kumalakaabuku hutok li kúl̥ubaaku kaakenumuu sijunkasu hutok li síl̥ubaasu sameeŋenimuu utekawu hutok li úl̥ubaawu úsolaawu, li abil aanom: — Ubil min íhiisi ábuwaawu, ammuu anaalaawu ata Agálalaanawu.

¹⁰ Buyinumabu li bulako lí ínje, amalakaawu li atebom ájowetum boot li huyuuy háamak hagimbe. Nan jíliiŋ dómuu, li áhiisom ésukayi yanabaayi, Yeelusalem yan Ateemit áwalenumulomuu li emitayi.

¹¹ Máyiineniyamu mata Ateemit yookene. Li enaak eleñ maleñ loon huyitik hatiineniye ŋáa’, loon huyitik hágiiniine han koone Jasif ban li huyaaŋ loon eweel.

¹² Huteefahu háwooñen yomuu hufenfeñ ban li hugimb. Ebaje wámbii woono kuŋen li úl̥uba, wan kumalaka koono kuŋen li kúl̥uba kunaake kufooy. Li kukiic li wámbiilawu ujawawu wata utoŋawu kuŋen li úl̥ubaawu wata kata Isilayeel.

¹³ Kagebookageb kata ésukayi kubaje wámbii woono úhaaji: úhaaji li kagebaku kata Akiw, úhaaji li kata Alool, úhaaji li kata Kúñum, úhaaji li kata Jalaŋ.

¹⁴ Huteefahu hata ésukayi li kúlankiin koono kuŋen li kúl̥uba huyitowe. Li kúlankiinaku unku, ujawawu wata kufootalaku kata Agálalaanawu, kukiic ló.

¹⁵ Amalakaawu anaake alobumuu lí ínje, kaliikum laakene: hunuk hata éwulus boot kaliik ésukayi, wámbiilawu wata yo li kuteefaku kata yo.

¹⁶ Esúkayi ebaje ugeb woono ubakii. Mabaakamu mata yo mulele li mawuŋamu mata yo. Amalakaawu li aŋa’ hunukahu min aliik ésukayi. Li ebaj kukiib koono sínjunne kuŋen li síl̥uba. Mabaakamu mata yo mulele li mawuŋamu li magimbamu mata yo.

¹⁷ Amalakaawu li aliik huteefahu hata ésukayi, li hubaj kukiib kan koone Kúde koono téemeel lí kúyii kúl̥uba li kubakii. Kaliikumaku unku kan amalakaawu aŋalumuu min aliik, kaliikum kata ál̥ahukowan.

¹⁸ Kugisaaku kan kuŋalumuu min kuteef huteefahu, kugisa kajake majak ban li kúgiiniin kan koone Jasif. Esúkayi, éwulus yajake majak kuŋale min kuteef yo, éwulus yaleñe loon eweel.

¹⁹ Kúlankiinaku kan kuŋalumuu kukaan hul̥unkumahu hata huteefahu hata ésukayi, li kuŋa’ bagisa banooban batiineniye ŋáa’ min kúsangen kó. Húlankiinahu hútinaalahu hata hul̥unkumahu hata huteefahu koone ho jasif. Húl̥ubutahu koone ho safiil. Húhaajutahu koone ho kaliseduwaañ. Hubakiilenahu ho koonemuu émolod.

²⁰ Hutokenahu koone ho saaliduwaan. Hutoken li hanolawu li koon ho koolinaliin. Hutoken li húl̥ubutahu ho koonemuu kilisolit. Hutoken li húhaajutahu koone ho beelil. Hutoken li hubakiilenahu ho koonemuu tofaas. Huŋenenahu li koon ho kilisofulaas. Huŋenen li hanolahu koone ho yaasent. Huŋenen li húl̥ubutahu ho koonemuu ametisit.

²¹ Wámbiilawu kuŋen li úl̥ubaawu, wo woonosoono usis kuŋen li úl̥uba. Kámbii kanookan esis yano kuŋale min kukaan ko. Kaayeenaku kata ésukayi li kuŋa’ éwulus yajake majak ban li eleñ loon eweel, min kukaan ko.

²² Bale ijukut eluuf yata Ateemit li ésukayi inyu, mata eluufayi yata yo yommuu Amaaŋenawu, Ateemit ata sembe buko li Agálalaanawu.

²³ Esúkayi inyu esohulawut min banak buwuŋen yo, mantee foof min hul̥eeñahu huwuŋen yo, mata máyiineniyamu mata Ateemit muhiitene yo, ban Agálalaanawu li alako ehiitumayi yata yo.

²⁴ Bukanabuku kata sihetasu feh fan kújowum li mawuŋaamu moola, ban kúyiiyaku kata etaamayi fan kúŋalul ebajayi yooliil boot ló.

²⁵ Wámbiilawu wata ésukayi fan úbabuli kat to etihunakaayi feh, ban let úmus ubabi, mata li ésukayi inyu let baj ehuka.

²⁶ Fan kúŋalul máyiineniyamu li ebajayi yata sihetasu feh, boot ló.

²⁷ Wah waboje let unoken li ésukayi inyu. An akaane wah wasuuneniye li ámalamiñ let anoken dó foof. Bukanabuku kan ujawawu wooliil ukiicimuu li éliibalayi yata buloŋabu yata Agálalaanawu, buko bale kommuu li kunoken dó.