Búhiisenumabu 19 - Jola-Kasa

¹ Fúlum tó, li ijam li emitayi hulim habaje sembe, hanokoole loon húcuh hata búsuk báamak. Hulimahu li hunaak hoon: «Aleluuya! Ateemit oololaal akile kafakaku, li kasalaku li sembaasu!

² Latiibetiib li mal̥egen ban li col! Mata latittiib ecagaayi yáamakayi, yalakomuu kakajenaku kata etaamayi li bucagayetabu bata yo. Ateemit latekootek min aluken kulokaabuku koola kan amukumuu.»

³ Búsukabu li bulaañen boon: «Aleluuya! Hakoolahu hata ésukayi yáamakayi yásulomuu, fan hukoolet boot haatiya boot nanoonan.»

⁴ Muñeˈe kunahaanaku áyii li kubakiilaku kahallenumuu, li wahawu ubakiilawu waloŋumuu, li kúkuntuŋ hákil Ateemit abahumuu li efenjeŋayi yata jáyiiyaju, min kumanenool koon: «Aameen! Aleluuya!»

Sinaaŋasu sata ébutowayi yata Agálalaanawu

⁵ Hulim li húfulumul li efenjeŋayi yata jáyiiyaju, hunaake hoon: «Jisal Ateemit oololaal, bukuluul feh jammuu kuloka koola, bukuluul jákoliwoolumuu, bukuluul jammuu bañiil li bukuluul jammuu kunahaan.»

⁶ Fúlum tó, li ijam hulim hanokoole li húcuh hata búsuk báamak. Li hunaak huwel loon kácololen kata mal máamak, loon foof kawel kata kufalajaj kabaje sembe. Hulimahu hunaake hoon: «Aleluuya! Mata Amaaŋenawu Ateemit oololaal ata sembe, ummu li Jáyiiyaju joola!

⁷ Kásuumaay kulako li ololaal, ulakowaal li ésuumansuum ban li usalaalool! Mata taŋayi yata ébutowayi yata Agálalaanawu éliiŋe, ban aseekool lásangenoole aban.

⁸ Li kusenool kañ kajake majak kata sooy akaano, kanaake kuleñ ban li kuset maset.» (Kañaku kata sooyayi ko kommuu bakaanelabu bacolumuu bata bukanabuku kata Ateemit.)

⁹ Muñeˈe amalakaawu li aanom: — Ukiic: Awólo, bukanabuku kahooñimuu boot hutiñahu hata sinaaŋasu sata ébutowayi yata Agálalaanawu. Ban li afamen aan: — Laalu kulimaku kata mal̥egen kata Ateemit.

¹⁰ Muñeˈe li íkuntuŋ li kootaku kata amalakaawu boot min imanenool, bale li aanom: — Jakum ukaan mo! Injé foof aloka leem loon awu humumi, loon kutuyi kajokumuu jak kulimaku kata mal̥egen kan Yéesu alobumuu. Ateemit lóotimuu umanen! Li mal̥egenamu, kulimaku kata Yéesu ko kommuu buyinumabu basenemuu kulim kufulofetaku.

An alemboole li efilinjebe yahiite

¹¹ Muñeˈe li ijuk emitayi li ébabulo, efilinjebe yahiite li éfulul. Anawu alemboomuu li yo kajawool Atúka lit li Al̥egene. Latiibetiib col ban li anaak atiik hutiik hacole.

¹² Kúkilaku koola li kunaak kuhenj loon sambun, ban li akaano síjambi sameeŋe li húkowool. Kajaw li kukiici li akila kan akila balewool ahaase.

¹³ Hukaafa hagole húsim lakaanowe. Kajawool kooneyi «Hulimahu hata Ateemit.»

¹⁴ Kúmimaku kata kusollaaliyaku kammuu li emitayi li kulemboo li sifilinjebe sahiite min kunaak kunab li akila. Wañ kukaanowe wata sooy yalehe ban li ehiit falala’.

¹⁵ Ekúndu yañeke li éfulumul li butumabu boola boot kútek bukanabuku kata sihetasu feh. Fan aŋa’ egol yata mañ min amatiil. Fan áluuhiil li buyinjaay báamak loon kúul̥ kata búbiiñ áluuheyimuu boot kakaan ébiiñ, min áhiisiil etindihuuñayi yáamakayi yata Ateemit ata sembe.

¹⁶ Kajaw laake kakiici li hukaafaahu li huboŋahu hoola. Kajawaku ko kommuu unke: «Ayíiyawu ata kúyiiyaku li Amaaŋenawu ata kumaaŋenaku.»

¹⁷ Muñeˈe li ijuk amalaka mayitowe li tinak. Li alob butiya li basuuwabu feh báyitemuu boot haatiya tiya emitayi aan bo: «Jibil, jiwonnoo boot li húbaññaatiyahu háamakahu hata Ateemit.

¹⁸ Jibil jitokoñ kúyiiyaku, li kuhaanaku kata esollaaliyayi, li esollaaliyayi humumiil, sifilinjebaasu li kalemboolemuu li so, bukanabuku feh, kaletumuu emiikeel li káamimuu emiikeel, katitimuu li káamimuu bukan káamak.»

¹⁹ Fúlum tó, li ijuk énuukuleŋayi yákoyileniyaayi li kúyiiyaku kata etaamayi boot li kusollaaliyaku kooliil ló, mawonnoole boot hutiik li anawu alemboomuu li efilinjebaayi li kusollaaliyaku koola.

²⁰ Muñeˈe li kujok énuukuleŋayi yákoyileniyaayi li anawu ámalumuu aan afulofet laam, anaake akaanumuu wah wájaahaleniye hákil énuukuleŋayi, min abunt bukanabuku kabajumuu húlangumaasowahu hata énuukuleŋayi, ban li kunaak kumanen kambuwaku kata yo. Li kubeten li buwokaay bata sambunasu li bata batolokabu básoyimuu ŋáa’, énuukuleŋayi li anawu ámalumuu aan afulofet laam, maloŋe.

²¹ Ekúnduwayi yáfululomuu li butumabu bata anawu alemboomuu li efilinjebaayi, li emuk bukanabuku kasaŋomuu min basuuwabu feh butokoñiil.