Búhiisenumabu 17 - Jola-Kasa

Batiibabu bata ecagaayi yáamakayi

¹ Muñeˈe akee li kumalakaaku hutok li kúl̥ubaaku kátukumuu sijunkasu hutok li síl̥ubaasu, li abil aanom: — Ubil min íhiisi buu ecagaayi yáamakayi yommuu li etiibi eeno, yo yáamimuu ésukayi yáamakayi yateefimuu kooj kusamu kameeŋe.

² Kúyiiyaku kata etaamayi kuhintenhinten yo. Bukanabuku kakinumuu li etaamayi li kúkaliyenoolum li bunukabu bata yo, ban li kulo li bucagayetabu bata yo.

³ Muñeˈe Buyinumabu li bulako lí ínje, amalakaawu li atebom ájowetum boot li kayiinaay. Li ijuk bo anaale alemboole li énuukuleŋ yájunke cúl. Enúukuleŋayi inyu ebaje kúkow koono hutok li kúl̥uba li usiin kuŋen, ban li ebaj tanootan li eniilayi yata yo ujaw wata kúgel Ateemit.

⁴ Anaalaawu wañ wájunke lakaanowe li wájunke cúl, ban li ásangenoolum sikob sata éwulus, sata bagisa batiineniye ŋáa’ li usis. Li átuk li kaŋenool ejunk yata éwulus, yameeŋe tib wah wajakut bajuk. Wahawu unwu wo wommuu bucagayetabu boola bajakutumuu.

⁵ Li bájontumabu boola li baj kajaw kakiici to kan an ayilaat ahaas waa kufañe kulob: «Babiloon yáamakayi, jaaw ata sicagaasu, li ata wahawu wajakutumuu bajuk wammuu li etaamayi.»

⁶ Li ijuke, li ijuk kaanaku anaalaawu húsimahu hata bukanabuku kata Ateemit li hata bukanabuku kan kumukumuu mata káyinenaku kooliil li Yéesu kúji, húkaliyenookaliyen. Nan ijukoolumuu li isego ŋáa’.

⁷ Muñeˈe amalakaawu li aanom: — Wáa újiye li usego? Fan ihebi mahaasutimuu mata anaalaawu li mata énuukuleŋayi yateboolumuu, yabajumuu kúkow koono hutok li kúl̥uba li usiin kuŋen.

⁸ Enúukuleŋayi yan ujukumuu naanaŋ eloŋenloŋ, bale muñeˈe eloŋut. Fan éfulumul li buwokaayabu básenkimuu ŋáa’, ban boot min ejow boot kaniilo. Bukanabuku kakinumuu li etaamayi, kan ujawawu wooliil ukiicutimuu li éliibalayi yata buloŋabu kábilum nan etaamayi ejuul̥imuu, fan kusego buko bajuke énuukuleŋayi, mata eloŋenloŋ naanaŋ ban muñeˈe eloŋut. Bale fan ban li elaañen éfulul.

⁹ «Unte, butuuko bugel̥l̥eni tó lí bújallo. Kúkowaku hutok li kúl̥ubaaku ko kommuu kuyuuyaku hutok li kúl̥ubaaku dán anaalaawu abahumuu. Li kóomi foof kúyii hutok li kúl̥uba.

¹⁰ Hutok li kúyiiyaku umbuku kulolo. Ano ummu min aake jáyiiyaju. Aahu okila abilolut. Nan ammuu li abil, let alako to fiyo.

¹¹ Enúukuleŋayi yaloŋeen nomuu ban muñeˈe elet li buloŋ, yo humum yo yommuu áyiiyawu atoken li áhaajutawu. Yo humum yo yóomisoomi foof akee li kúyiiyaku hutok li kúl̥ubaaku, ban boot min ejow boot kaniilo.

¹² «Usiinawu kuŋenayi wan ujukumuu, wo wommuu kúyii koono kuŋen kaŋalolut jáyiiyaju. Bale fan kuseniil sembe min kooken jáyiiyaju ewaatu bale, buko li énuukuleŋayi yákoyileniyaayi.

¹³ Kúyiiyaku umbu kuŋenayi, foofiil feh wah wano bale kuyinoole kakaan: kaŋa’ sembaasu sooliil li kayileyaku kooliil kusen énuukuleŋayi yákoyileniyaayi.

¹⁴ Fan kutiik li Agálalaanawu, bale Agálalaanawu fan aheekiil, mata akila ammuu Amaaŋenawu ata kumaaŋenaku li Ayíiyawu ata kúyiiyaku. Okila Agálalaanawu li bukanabuku kan Ateemit al̥usumuu li kan ahooñumuu, li kátuulumuu Yéesu, fan kuheek kúyiiyaku kuŋenayi.»

¹⁵ Fúlum tó, amalakaawu li alaañen aanom: — Malamu man ujukumuu dán anaalaawu ammuu ecaga abahumuu, mo mommuu bukanabuku, búsukabu, sihetasu li silobasu feh.

¹⁶ Usiinawu kuŋenayi wan ujukumuu lí énuukuleŋayi, fan ulat anaalaawu acagayetumuu. Usiinawu lí énuukuleŋayi yákoyileniyaayi fan uŋa’ wahawu feh wan anaalaawu acagayetumuu abajumuu, min ukatool bákolotoo balewool. Fan utokoñ eniilayi yoola ban li úsulool li sambun.

¹⁷ Mata Ateemit lakankaan li uyinumawu wata kúyiiyaku umbuku kuŋenayi húfañum hata kakaan wahawu wan ayinoomuu. Fan kujamoo min kuŋa’ sembaasu sooliil sata jáyiiyaju kusen énuukuleŋayi yákoyileniyaayi boot yok nan kulimaku kan Ateemit alobumuu kommuu li kubaj.

¹⁸ «Anaalaawu an ujukumuu, akila ammuu ésukayi yáamakayi yágootenumuu kúyiiyaku kata etaamayi.»