Búhiisenumabu 15 - Jola-Kasa

Búhiisenumabu bata utekawu hutok li úl̥ubaawu úsolaawu

¹ Muñeˈe li ijuk li emitayi búhiisenum bakee báamak ban li bujak majak. Búhiisenumabu umbu bo bommuu: kumalakaaku koono hutok li kúl̥uba kaakene utek hutok li úl̥uba li kuŋeniil. Wo wommuu utekawu úsolaawu, mata li wo etindihuuñayi yata Ateemit yóomummuu li eban.

² Li ijuk foof husamu hayaaŋe loon eweel hágiiwoole li sambun. Li ijuk foof bukanabuku feh kabajumuu kaheek li énuukuleŋayi yákoyileniyaayi, li kambuwaku kata yo, li ecobayi yanaboomuu li kajawaku kata yo. Li husamuwahu unhu kuyitowe, ban li kútuk sikontiŋasu san Ateemit aseniilumuu.

³ Li kunaak kukijen kakijenaku kata Móyiis, ammuu alokaawu ata Ateemit li kakijenaku kata Agálalaanawu koon: «Amaaŋen Ateemit ata sembe, mo balokelabu booli buluuke ban li bújaahaleni ŋáa’! Awu ommuu Ayíiyawu ata bukanabuku kata sihetasu feh, mo makaanelamu mooli mucole ban li mulako mal̥egen!

⁴ Ayi aatut ákoliyi, Amaaŋen? Ayi aatut asal kajawaku kooli? Mata awu bale unabe. Bukanabuku kata sihetasu feh fan kubil kumaneni, mata buko feh kujuke buu makaanelamu mooli mucolumuu.»

⁵ Fúlum tó, li ijuke li ijuk haatiya emitayi Eluufayi yata Ateemit li ébabulo, yaakumuu kayuntaku kata húfaalumahu.

⁶ Kumalakaabuku hutok li kúl̥ubaaku kaakumuu utekawu hutok li húl̥ubaawu lí kúfulumul li Eluufayi yata Ateemit. Wañ wata sooy wahiite falala’ kukaanowe, ban li unaak uleñ. Li kukoko unaal wata éwulus li ugiŋawu wooliil.

⁷ Wakee li wahawu ubakiilawu waloŋumuu li usen kumalakaabuku hutok li kúl̥ubaaku sijunk soono hutok li síl̥uba sata éwulus. Sijunkasu unsu etindihuuñayi yata Ateemit aloŋumuu boot nanoonan emeeŋen so.

⁸ Muñeˈe Eluufayi yata Ateemit li emeeŋ hakoo humum hata máyiineniyamu li sembaasu sata Ateemit. Anoowan ayilaat anoken li Eluufayi yata Ateemit, utekawu hutok li úl̥ubaawu wan kumalakaabuku hutok li kúl̥ubaaku kúŋalulumuu wo babanolut.