Romanos 9 - Sinia' Jlamtis 1994

Pablo jijliak'ali po' ape'e papo Israel jika kia'lis

¹ Siuti ya'am ti atankiuni pa Sijwajieti, ijiatk'i siu'nie ajwe'el, je ka jla'm iyoyi. 'Etsaka 'neje siunie iyone siojona Sinia' jikimet ti 'es, ti si'wenkina ti ijiate siu'nie awoyi ti awo'ate:

^2-3 Ti yamjliyi siu'nie awoyi ti a'tiek'i siunie itienkiujnieye ti wuj ti awoyi ijliak'aliye ape'e siunapo i'lijwas, ti i'lijijwase Israel jika kia'lis pet, 'yina ti a'we'en ti je tijwajyi'n. Sekyi'i awo'ate, ¡jlam'ne pa Sinia' ka yama ya'am kanwenk'i'm pa iwit'iaye, 'yina sek jane'yi ka Sinia' iwenataja'm pet siunie 'es ka imp'elisijne'n! ¡'Estieje ka Sijwajieti sot kiu 'niji ka sek ne'yi ka ink'iuyetajats'i ni i'wit!

⁴ Kajeyepa ti pa Sinia' ijniejiett'iyijpe ka kiak iwoyi ti iyo jilisa'. 'Yina ini'wenkijna'm siupi iyo pi t'oniye ti 'es; jlamis ti 'esi siupa tiwonat'iyipi ti tijwelaja'm, iyoye'ate siupa inka'neyasajnaye t'ipi ti iwijna'm pa Moisés. Sekyi'i 'yiyasane siupa tiwonaja ti tonitie, sekyi'i ijwijla'm ta'a siupuwa wask'i'nelaja ti janwejna'm ts'ijiye kapajata, sekyi'i ti 'yakaja siupa jawoyi.

⁵ Papok jitise'l t'ipi pet papo Abraham jilis, sekyi'i siupa tajla'm siupapo jilis pet ti tomik'i pijia'm paka pet pa Sijwajieti, siupa ti Injwajieti ti Sinia' jijliujwanik. ¡'Esiji ka tiwunitie pa Sinia' jajnok'i'ni, ti jla'am ti isie'e wikie'eyi siuniwa wask'i'nelaja! Amén.

⁶ Jlampet siuti awo'eje 'ate, “Siupapo Israel jika kia'lis ja ke ijwajyi'n”, 'yinit'iyijpe ka je ijiatk'i siupa iyo'neje ti ijwijla'm siupapo jitise'l. Jlam'ne je kiak iyoyi. Jlam'ne ki iyoyi, ti siunapo Israel jilis ti tomik'i pijia'm je wikie'eyi ka ijiatayiji ka papokaye ka intajla'm papok Israel jika kia'lis.

⁷ 'Yina je wikie'eyi 'neje siupapo Abraham jilis ti tomik'i pijia'm ka papok ijiatayiji ka jilisa', kajeyepa ti Sinia' kiakt'i iyonipi pa Abraham ti iyo'ate, “Siunapo alesayi nak jantajle na Isaac.”

⁸ 'Yina ¿ten jiat'eje siupapo ti ijiate ti Sinia' jilis? Awo'ate, je wikie'eyi ka Abraham jilisa', 'yina papokata jla'am siupapo ti Sinia' ijwijla'm ti iyo'ate, “Japoye ni siunapo ti ja ijiatayiji ti alesa'.”

⁹ 'Yina 'nakajimpe siunie ti Sinia' ijwijla'm pa Abraham ti iyone'ate, “Siunie najkap ink'ieye ja'nijts'eje sek jane'yi ka 'winana'a jli ak'iemjla Sara ti jlas japoye.”

¹⁰ Je nakata ka itienkiunk'i. Siojopa asejnia jle' iyo'ate Rebeca ti itimisieti papo jilis, siupa tajla ijwienjli, paka siupa sitis t'ipi pet Isaac.

^11-13 Siuti je yijlik'ijij'ne 'yina lajk'ipa ka je 'esie ni'ne ka 'esie paka woyisi, Sinia' iyone'ne 'ate japa Rebeca, “Siunie isijli nak ji'yini jawo jikawoye.” Nak kia'iyo siunie Sinia' iyot'iyipi'iji ti iyo'ate, “Jacob nak emi'n, jlampet ni Esaú se'waja'm.” 'Yina naka ti a'wena ti Sinia' jla'am ti 'yijene siupa iyo ka inki'me, siupa ti iyo ka intane, siupa iyo ti itiliaja kanwone, 'yina je naka ka in'yene siupa ka 'esi pi jikijmaye.

¹⁴ Jot'e ¿ka iyok'iate Sinia' je tijnajyi siunie iyoyi? ¡Jeyi!

¹⁵ Siupa Moisés, Sinia' iyo'ne 'ate ti ijwijla'm, “Siuti jayo ka iyo i'nioye k'iye paka ne'yi pa, ijiate i'niok'i'm, jak je iyoyi jap'ilisi'n siunie jayo ka ip'ilisi'n.”

¹⁶ Ijiatjliyi, a'wena siunie it'imina ni i'nio', ti siuti kia'iyo Sinia' ip'ilisi'n, je ka nak intajleje siuti ini'neti, ni'ne ka jlama ka kiak iniwone, 'wenajliyi jla'am pa Sinia' iyo ka imp'elisi'n pa.

¹⁷ Siuniwa inamtis ijwil'neje siupa anechiyas t'ipi ti yiji japa ajnat Egipto, ti Sinia' kiak iyone ti ijwijla'm, “Ya'am ti awojwa'n anechiyasa'a'm, lapakawo ti awotajank'iye ka ti'wena siunie ijwiye naka ni siunie ekiaj'la, siu'neje ti awo ka intant'iejak'i wikie'eyi napo i'nio' yi' ape'e 'ni ajnat.”

¹⁸ Kiak iyo siunie iyo pa Sinia'. Siunie iyo ka imp'elisi'n nak ip'ilisina'aja. Jlampet ni siunie iyo ka int'onit ka iwo jlosik ink'ieye, nak kiak iyonayi'ijyi.

Siunie Sinia' jikap'ijliuskiye, siu'neje ni jiwak

¹⁹ Ent'a japoye pa jawo'ate, “Siuti kia'iyo ni Sinia' iyo, 'yina ti ja lajk'ipa ka intomik'i'ni siunie iyo ka wo, ijiatjliyi ¿ten jiat'eje siupa Sinia' jantajlata ni i'nio'?

²⁰ 'Yina ya'am awo'ate, ¿Tent'i'ya'm ka a'lej kiak awone ilia'm ni Sinia'? 'Yejne'n, siunie i'nio' itits'i niwa inatiwa ti siojona ilisane, je ti'wena ka wone'ate, “¿Yot'iyi'ni kiak jiwonk'i?”

²¹ Kajeyepa siunie ti ilisana niwa inatiwa siupa iyo ka wone, lajk'ipa ka intomik'i'ni, siuti itiliaja ka inlesane siojopa jiwe pet siupa k'iejliyi ti ijiate ti laja po' ilisanayi, ni'ne ti ilisane siojopa jiwe pet siupa ti k'iejliyi ti jiniliak pet.

²² 'Yina kiak iyoyi, siukia Sinia' iyot'iyipi, lapakawo ti iyo ka inkajanit pet ni jijweye iyo, siu'neje ni jiwak itioyi'i puwa jlomas yijni k'iye pa ti inilayiti wek napoka siunapo ti 'yaka ti jansa'ak'i, jla'yi ti janetiajnate.

²³ Siu'neje ti iyo ka 'wenkints'e'm siunie jijweye iyo ti 'es ti jla'am ti wuj. It'imina ti kasp'elisijne'n, 'yina ti pajk'i ti iwiakajlanit sik'ioye ka wiek'i naka.

²⁴ Je samkata ti sa'am ti atajlaja'm pet napo Judíojos ti tants'e, siupet ti asa'am ti jitiajlayi siunapo je Judíojos kiak jiwoyeyi i'yajts'ase pit.

²⁵ Iyo niwa inamtis ti yi'i ni injwejlanik jiwo Oseas ilisane, ti iyo'ate: “Siunapo ti je 'yaka kia'lis ta'a 'yaka kia'lis, kiak jayone ti ja yane'e. Jlampet siunie ti je ts'amaja ta'a, nak kiak jayone ti jayane'e yiminik.

²⁶ 'Yina ja ke 'wenaye siojo ajnat yiyits'ipe ti kiak awone ti ajwejla'm ti awo'ate, “Je ika kia'lits'ase'm”, ja yine'eje siunie ti kiak jayone “Siunie Sinia' ti laj jlaja jilists'ase'm”.”

²⁷ Siupa injwejlanik jiwo Isaías kiak iyo iyot'ipi 'ate ti ijwi'l papo Israel jika kia'lis ti iyo'ate: “'Wanjliyi ka je piniye, ka wo'ate siunie jolo' yiji ni tewuk, 'yina ja 'nak nojwaja'm jiwekie'eja napo janjwa'.

²⁸ Kajeyepa siunie Saka'niona ja ke impajanit'i ape'e ti janinayi wita'm siunie jawoyi ti jlajma ke iwoyi, ti janemit siunie ji'lij t'ipi yi'ne napo i'nio' yi' ape'e 'ni ajnat ti jantejwk'i'ni.”

²⁹ Po'neje siunie iyot'iyipi pak Isaías t'ipi ti iyo'ate: “Siut'itiejpe ka je ina'yiyi sik'ioye pa Saka'niona, ti lajk'ipa ka ijnojliji, siupapo jilis t'ipi ti tomik'i pijia'm, 'yina papok ejewitatak'i siupapo yiji japak ajnat Sodoma siu'neje japa Gomorra ti no'we.”

Siunie ik'emijiet papo Israel jika kia'lis

³⁰ 'Yina, ¿tepat'e sitienkiujnieye jayonaja? Siuti Sinia' ilisajne'n siunapo i'nio' ti je Judíojosieta, lapakawo ti naka jla'am ti je 'yakakiuyis, jlam'ne jeyeta ka inwoyisijyi'n ka Sinia' ilesajne'n.

³¹ Jlam'ne pet siunapo Judíojos ti je ijlienis ti iyoyisi nak inka'neyasajnaye ti ijwilis janakaye ka 'esieyisi, ka nakayi ka inses, 'yina je i'winis ka kiak iwoyi.

³² ¿Yot'iyi'ni? Kajeyepa ti ijwilis ka nakaye ka 'esieyisi siuniwa jikijmaye ti iyoyi ka t'emina ka Sinia' inlesajne'n, jlam'ne siunie ti jitienkiujnieye ti it'imina je jnanjliyi. It'imina ti t'opits'i'ni isia'm ti t'asis kiajwe siojona sisaj

³³ ti siuniwa Sinia' jlamtis ijwi'l ti iyo'ate: “Ts'iji yi'i jana Sión janaka sisaj ti je jlase', siojona ti jant'opits'i'ni isia'm napo i'nio'. Siunie ja ke inkakiu ja lajk'ipa ka inik'emijiete.”