Romanos 14 - Sinia' Jlamtis 1994

Je 'es ka laki napo a'lejwas

¹ Jlampet siunie akiecha ti jijweye je t'onik'i siunie jitienkiujnieye ti po', lesanayiji ti jakima'yi ilia'm, 'yina ká ayeyiji siupa jitienkiujnieye iyone.

² Kajeyepa po' siunapo iyo'ate, “'Esiji ka titiuwa ka ne'yi pa siuniwa wask'i'nelaja”, jlampet siunapo jijweye je t'onik'i siunie jitienkiujnieye ti 'es, ka 'esieyiji pet ka intojw siuniwa a'la' 'wole ti inkas.

³ Siunie ti inijwe'el 'esiji ti itiujw pi k'iejliyi niwa wask'i'nelaja, je 'esiji ka ilaki siunie jikiecha siunie itiujw pet. Kia'iyojliyi siunie ti je itiujw siuniwa k'iejliyi ni itiujw pet ni jikiecha, Sinia' je 'yakawona jla'am.

⁴ 'Yina ¿tent'i'ya'm jiat'eje ti jiliaki ni akiecha jikawo? Ka 'esie ni'ne ka je 'esie pi jikijmaye iyo, 'yina ja jlama jla'am pi jika anechiyas ti jan'ye'en, ka 'esieyi wita'm pa jika anechiyas.

⁵ 'Yina po'neje napo Sinia' jilis ti ijwi'il ka poye niwa jlomas ti ijiate ti laja po', 'yina puwak ijiunitie. Po' papo Sinia' jilis 'neje ti iyo'ate, “Sa'am je'e, siuniwa jlomas lajk'i puwa ka 'wena iwo.” Siupet ti ya'am awo'ate, kasjwanjlajamk'i'ni niwa sitienkiujnieyejes iyo, 'yina 'esiji ka 'yena.

⁶ Siuti po' ni iyo'ate, “Ya'am wuj ti 'otat siujlie'e jloma”, ijiatjliyi, 'yotat, lapakawo ti paka jla'am pa Saka'niona. Siunie ti itiujw puwa k'iejliyi niwa wask'i'nelaja, itiujw kajeyepa ti iyunit pa Saka'niona, jla'yi ti iyo jinikanitiejayi pa Sinia'. Jlampet siunie ti je itiujw pi t'isie'n pa k'iejliyi, 'yina je itiujw kajeyepa ti iyunit jla'yi ti iyo jinikanitiejayi pa Sinia'.

⁷ Lajk'ipa ka ne'yi, napo si'lijwas, ka 'najane paka iwone ka ini'wasanit, siu'neje ka inila'an.

⁸ Kajeyepa ti siuti kas'wasajne'n nak atajietajape ni Saka'niona ka iyunitie. Siuti kasts'ajle'n kia'iyojliyi, atayeje pet ni Saka'niona ka iyunitie. Jak je iyoyiji siuti si'wasankiye jla'yi ti saj po', 'yaka ti nak atajlaja ni Sinia'.

⁹ Tempi it'imint'iyijpe ti Sijwajieti 'ya'al, sekyi'i ti yapilie'eje pijia'm, lapakawo ti siunapo 'wasajne'n siu'neje napo 'yajle'n iyo jika'nionajayis.

¹⁰ 'Yina siuti am ti je tiujw niwa wask'i'nelaja, ¿yot'iyi'ni ti jiliaki ni akiecha? Siupet ti a'am ti jitiujw niwak wask'i'nelaja, ¿yot'iyi'ni 'neje pet ti jiliaki ni akiecha? Jlam'ne ni jayoki ti ja kaswikie'eyi ti janiojoki jitieyi'i pa Sinia', ti jla'am ti ja kas'ye'en siupa sitis iyo.

¹¹ Kajeyepa siuniwa Sinia' jlamtis iyo'ate: “Siuti si'wasa'n, jlajma jak je iyoyi siunie jayoyi, iyo ni Saka'niona. Ja wikie'eyeyi napo ti t'akosjlete'l janteyiji'n isiajwe ti ja siwunit ti ya'am ti Jiniak'i'm.”

¹² 'Yina kiak jawoyi, ti ja kasjwanjlajamk'i'ni siunie jayoki ti jajwilak'iji'n siupa awokt'iyi ti jajwilaja'm ni Sinia'.

Je 'es ka t'emina ni akiecha ka jiwet'ia poye

¹³ 'Esiji ka ilik'i ti alakik napo si'lijwas. 'Yina akiojwa'l wonayi'ate, “Ja ke iyoyi pi k'iejliyi ka pakaye ka int'emina pa isiecha ka ileyi ni 'es ti iyoyi.”

¹⁴ Siuti ya'am Pablok'i'm ti ajiap ni Saka'niona Jesús, naka ni i'nio' siunie ti lajk'ipa ka t'ojliye ka inejyi ni jlosik. Jlampet ti po' siunie ti ijwi'il pa k'iejliyi ti iyo'ate, “T'ojli naka”, 'yina jlam jla'am jiwek ti 'nachiye.

¹⁵ Siunie jitienkiujnieye je jilisank'i pa akiecha, kajeyepa ti i'wi'in siupa jitiujw, nak 'yakajanit pet ti je jlemi'n ni akiecha. 'Yina je 'esiji ka nakaye ak ka int'emina siunie akiecha ka netia'n ti pajk'i ti Sijwajieti inila'n ape'e.

¹⁶ 'Esiji ka 'otatayiji siunie i'manitie, 'nakayi ti ja lajak'ipa ka wo'ate, “Je 'es siunie jiwoyeyi.”

¹⁷ Kajeyepa siunie jika anechijiayas ni Sinia' je naka ni siunie titiuwa paka k'iejliyeyi, 'yina ni'ne ka nakaye ni siunie ti'yaki. 'Yina jla'm ijiatayi jla'am siunie ti ijniejieti ni i'nio', siu'neje ni jikamankiye ni i'nio', siu'neje ni jinikanitiejeye ni i'nio' ti po'. 'Yina niwaka ni siuniwa tajle pit jana Sinia' jikimet ti 'es.

¹⁸ Jak je iyoyiji siunie i'nio' ti iyoyi niwaka, ti iniuyeje ni Sijwajieti, 'yina 'yakanit'ni ni Sinia', jak je iyoyiji pet siunapo i'nio' iyoyis pet 'ate, “Jla'm ijiate ti 'es.”

¹⁹ Siuti kia'iyo jayokijyin'ni pet niwaka wask'i'nelaja tejeyi ni inkamankiye, 'yina janoyits'e'm pet ka inikelaja siunie awoki ka jlam kia'iwo kanek pet.

²⁰ Ká akajyinajyi siuniwa wask'i'nelaja ni Sinia' jikijmaye. Jlam'ne wikie'eyi siuniwa wask'i'nelaja jitiuwa je tiajlayiji pa aswet'iaye. Jla'm ijiatayi jla'am siunie ti ijiate ti je 'es ti jitiuwa, naka ti jit'iminayi ti jiwet'ia po' ni askiecha.

²¹ Ijiatjliyi, siuti nak it'imina ti iliyi ni jitienkiujnieye ti 'es ni akiecha, 'esiji ka je atojw pa t'isie'n paka k'iejliyeyi, ni'ne ka nakaye ni at'es. 'Esiji ka je k'iejliyeyi paka atojw, ka pakaye ka int'emijne'n.

²² 'Esiji ka lesajne'n siunie atankiujnieye jitieyi'i pa Sinia'. ¡'Es ni i'nio' ti lajk'ipa ka jitiej ineni'ni 'ate ka je 'esie!

²³ Jlampet siunie ti je 'yakaj paka jitienkiujnieye iwone, kawo'ate, “¿'Est'iyiji ka itiujw ni'ne ka jeye?” Jak je iyoyiji siuti itiujwata jitis po', kajeyepa ti je 'yakaj paka iwone pi jitienkiujnieye. Nak ajwe'el ti awo'ate, wikie'eyi siuniwa ti je tajle siunie inkiowe ni 'es, nak inke' pet.