2 Tesalonicenses 2 - Sinia' Jlamtis 1994

Pablo 'yakajanitk'i siupi jawo siupuwa jlomas tom jlaja

^1-2 'Nakayi, 'napo i'lijwas, siojona jloma ti ja'nes pi Saka'niona, jla'yi ti janiojokiji wita'm ti sek jane'yi, po' napo i'nio' ijwil ka 'nakaye siu'nie jloma ti awaki. 'Yina awok'iate ti sam pet ti anip'elisina'ase, ti siuti ja ajieyeyi ti japoye pa jajwel ka japakaye Sinia' jikimet ka intajle siupi ijwi'il, ni'ne ka imp'esinikie pa kanjwel ka intalts'e, ká aninenayi 'ate. Ka inwats'ilati niwa asosikis, 'yina ast'otale t'onitie.

³ Ká anikiwalinitie k'iye napoka ti iyo ka ink'emijieta'. Jitieyi'i janak jloma ja ke piniye napo janleyi ni Sinia', jla'yi ti janta'yi ilia'm pi Sinia'. Japakayeyi ti janikajanit naka i'nio' ti ijiuski'la'n, ti laj t'otaliye, ti 'wena ja ke ijno'we ni ijio'we napo jijliak'ali ti laj jlaja.

⁴ Naka'ne ni siunie ti janta'yi ilia'm wikie'eyi siuniwa Sinia' jle' yiyi, siu'neje niwa ijnonitieye tena'a. Ja ke t'ajwejliye pa, ti janejyi'n kiajwe jana Sinia' ji'wuk, ti janijwe'el ka jlama kapakaye Sinia', jawoyena'a 'ate, “Ya'am ti anechiyask'i'm.”

⁵ ¿Ma astaj wujwats'i ti je 'eki aska kiowe'e ti ajwelta'ni niwaka?

⁶ 'Yina 'najanayi siunie na'aja'n ti ijwietanit ijiatjliyijna'a ka netiejeyijna'a siojona jika jlomaye ti janikajanit.

⁷ Siu'niwa jlomas po' niwaka siunie ti ijiate ti je 'es, ti tajle naka i'nio'. Ijiate je ti'wenajata, 'yina yi'i 'ni ajnat. Ijiatjliyijna'a jla'am ka titiajlana jikiowe'e ni siunie it'iunit'i'ni.

⁸ Jiwekie'ejana'a ka 'nakaja nak i'nio', ja ke pajayi ka 'nesana'a pet ni Saka'niona Jesús ti janla'an jankiene ni jiyel, je lajk'ipa siupi jlaj ti a'tiejak'i, pak janetiajnat.

Jawoyi siunie i'nio' laj t'otaliye, siu'neje napo yamk'i

⁹ Siunie jawoyi pit naka i'nio' laj t'otaliye ka 'nesta, ja ke jlasiye ni jijweyeja' pet ni sitiejiejwa ni imosik ti janamik'i, siu'neje niwa jawo ti jankelitk'i napo i'nio' ti jan'wenki'n. 'Yina jlam'ne jlajma jawoyi siunie jawo.

¹⁰ Jankajli ti janwoyi wikie'eyi siuniwa wuj ti je isis ti jawo ka inkamank'iji'n napo i'nio, napo ijioyi pit naka ni jiliaye ti laj jlaja. Napoka ti je isi'me ni siunie ti ijiatk'i, 'wenajliyi ti iwit'ianisi, 'yina it'imintaja ka injwayis.

¹¹ Naka'ne ti it'imina ti Sinia' yine 'ate ni siunie je ijiatk'i ka ink'emijietk'i. Jak je iyoyiji siuti kiak jawo jan'wenis naka ni je ijiatk'i, janjwelayis ka ijiatayiji ka nakaye ni ijiatk'i jlam'ne ja'wenaye.

¹² Wikie'eyi siunapo i'nio' 'yakakiuyis ni siunie ijiatk'i, 'wenajliyi ti inikaniti'n ti iyoyi naka ni je 'es, Sinia' pajk'i ti yi'ne ni jitis jawo.

Sinia' isi'mik'i kanjwa'a

¹³ Je paj ka iliki pet ti awok sinikanitiejayi pi Sinia' astepe'e, i'lijwas ti Saka'niona jlemijna'yase'm, lapakawo ti Sinia' jla'am ti ijniejiet'ase'm ta'a ka asama ka ananayi ka ajwaye. Ka lajak'i ki iyo pet jana jikimet ti 'es ti janak ti inlesana', it'imina ti insisie, jla'yi ni siunie ti ijiatk'i naka pet ti je jikakiuye.

¹⁴ Nak it'imina ti Sinia' ta'nase, jakayi ti ajwe'lase'm kiwak Sinia' jlamtis ti ajwela ki iyo ni injwajieti. 'Yina ka kiak awoyeyi pet ka awayejyi ni iyo pi Saka'niona Jesús ti Sijwajieti jit'iuni ti anechiyas.

¹⁵ Ijiate, i'lijwas, 'esiji ka askio' ke k'asa'a 'nak inka'neyasajnaye ni siunie ajlasat'asepi pet ti ato'niase, siu'neje ti ajlo'wase ni ip'isinik.

¹⁶ 'Nakayi je paj ka iliki pet ti 'ajlana ti ajwela pi Saka'niona Jesús ti Sijwajieti, jla'yi pi Sinia' ti jlam ti wuj ti kassemijne'n, jla'yi ti kasp'elisi'n, ti jlam ti tajle ni sijweye ti jijweye jla'am ti laj jlaja, siu'neje ni anejejwiyejenk'iye ti wuj ti 'es,

¹⁷ ka wujwa ka wo jweyeja' ni asosik, 'nakayeyipe ka 'esie siunie asamtik ti jiwoye, siu'neje pi k'iejliyi pi askijmaye ti potie.