1 Corintios 13 - Sinia' Jlamtis 1994

¹ 'Wanjliyi ka ts'ajane siuniwa ji'lija' napoka ti 'wena 'lij, siu'neje pi ji'lij napo injlojwajnas poli jlele, siuti laj yimijnayeja' iyoye'ate siunie wikinie ti kijlami, jlam jla'lap jiwekie'e.

² Ent'a ja yama siunie ti iyo'ni jika'niyejayi napo ijia Sinia' jilis ti yameje siupi iyo janak Sinia' jikimet; jla'yi ka ts'ajane paka iyone siunie yiji ni Sinia' jlosik siupi iyo kawoyi; siu'neje ti ts'ajane wikie'eyi niwa wask'i'nelaja; jla'yi ka ijiatayi ka itienkiujnieye poye. Ka ts'ajane paka iyone ka itiajla'nik'i niwa tikijnakiyis siuniwa ji'wetis, 'yina ti ja laja yimijnayeja', siliejk'ipa ti ya'am.

³ 'Wanjliyi ka iyo ka iwijna'm siuniwa isijmatis a'we'en napo p'ijliusis, 'wanjliyi 'neje ka iyo ka iyikial 'ni 'yajwes ka jwat ts'otieje'ni, siuti laj yimijnayeja', ijiate ti lajk'ipa ka ts'esi.

⁴ Siunie ti jlemijnaye po', 'wanjliyi ka poye paka k'iejliyeyi, 'yina 'yakajli ti inilayiti, jla'yi ti takap'ijliuski ni i'nio'. Je jolsijnieta, je iniwunit ni i'nio', jla'yi ti je initonit.

⁵ Laj jiwakie ni i'nio', je jla'am ka int'osijyin'ni jlajap, ka wojyi'n siunie ja 'esieyi. Je jwesie ni i'nio', je iyoyi jitienkiujnieyeja' siunie jikiecha iyont'iyijipi.

⁶ Je ipini'ni pet siuti i'wi'in ni jike' napo ijia, jla'm ijiatayi pet siuti ijiatk'i pa, sekyi'i ti wujwa pet ti ipini'yi.

⁷ Siunie ti jlemijnaye po' 'yakajli ti ijiate ti inilayiti pet wikie'eyi niwa wask'i'nelaja. Je paj ka inleyi siunie iyo ti jitienkiujnieye po', kia'iyojliyi ti jlomas ti jinijijwijie po', jla'yi ti je inip'elisin'ni k'iye paka k'iejliyeyi.

⁸ Siunie inemijnaye ja ke paja jla'am ka ino'we. Jlampet siunapo ti ijwile pijia'm siunie iyo jana Sinia' jikimet ja jlaj japoye; kia'iyojliyi siuniwa inamtis ti je tipe'yak, kia'iyojliyi siuniwa tajle ni Sinia' ti po' ni i'nio' ti 'yije'en.

⁹ Siunie ti po' ni i'nio' ti 'yije'en, siu'neje ni i'nio' ti Sinia' jikimet tamtiyi'ni, jlaj japoye niwaka.

¹⁰ Ka 'nesta siunie ti jlameje, ti ijiate ti 'es, 'yina wikie'eyi niwa wask'i'nelaja jlaj ja poye.

¹¹ Siuti awo kia'leja', siuniwa yamtis t'ipi kia'lis jlamtis. Kia'iyojliyi siunie itienkiujnieye iyo, iyo ni kia'le jitienkiujnieye pet. Kia'iyojliyi siunie isiowe awone, kia'le jikiowe ni yik'i kajeyepa. 'Yina siuti sikijliye, atajlaje siunie jike' iyo pit ni kia'le.

¹² 'Nakayi a'wena ti iyo'ate jana ti'yenaja, ti k'iejliyi pi jipe'el ti yiji, ti je ijiat ka 'nakaj. 'Yina jane'yi japa jlomaye ti ja'winaja pi Sinia' pi k'iejliyi. 'Nakayi netia'n ka 'wanjliye witame siunie ka ijiatayiji ka sitiant'ieje, 'yina japoye siojona jloma ti ja 'wanjliye witame ti ja sitiant'ieje, iyoye'ate ti Sinia' jla'am ti itiant'iek'i.

¹³ Najape siuniwa ti ja ke paja ka inetia'n: niwaka niwa, intankiujnieye ti 'es, inejejwijiye, siu'neje ni inemijnaye. Siu'neje na ti ijiate ti 'yaka'm ape'e niwa ijia naka inemijnaye.