Noo Luke 18 - Yn Conaant Noa 1810

CAB. XVIII

¹ As loayr eh coraa‐dorraghey roo, dy lhisagh deiney kinjagh padjer y ghoaill, as gyn ad y ve lhiastey;

² Gra, Va ayns ard‐valley dy row briw nagh row ayns aggle roish Jee, ny soiaghey jeh deiney.

³ As va ben‐treoghe ayns yn ard‐valley cheddin, haink huggey, gra, Jean cairys dou er my noid.

⁴ As son tammylt cha dug eh geill jee: agh ny lurg shen dooyrt eh rish hene, Ga nagh vel mee goaill aggle roish Jee, ny jannoo soiaghey jeh dooinney:

⁵ Ny‐yeih er‐y‐fa dy vel y ven‐treoghe shoh dy my voirey, ver‐ym cairys jee, er‐aggle liorish cheet cha kinjagh dy jean ee skee jee’m.

⁶ As dooyrt y Chiarn, Clasht‐jee cre ta’n briw neu‐chairagh dy ghra.

⁷ As nagh jean Jee cooilleeney ass lieh e chloan reiht hene, ta geamagh huggey oie as laa, ga dy vel eh foddey lhiggey shaghey?

⁸ Ta mee ginsh diu dy jean eh dy tappee goaill cooilleeney er nyn son. Ny‐yeih tra hig Mac y dooinney, vow eh credjue er y thalloo?

⁹ As loayr eh yn oraa‐dorraghey shoh rish shiartanse va treishteil ayndoo hene dy row ad cairagh, agh soiaghey beg jeh feallagh elley:

¹⁰ Hie da ghooinney seose gys y chiamble dy ghoaill padjer; va’n derrey yeh ny Pharisee, as y jeh elley ny Phublican.

¹¹ Hass y Pharisee as ghow eh padjer myr shoh rish hene, Yee, ta mee cur booise dhyt, nagh vel mish myr deiney elley, tranlaasee, neu‐chairagh, brishey‐poosey, ny foast myr y publican shoh.

¹² Ta mee trostey daa cheayrt ’sy chiaghtin, ta mee cur jaghee jeh ooilley ny t’ayn’s my chummal.

¹³ As hass y publican foddey veih, as cha b’lhoys da wheesh as e hooillyn y hroggal seose gys niau, agh woaill eh er e chleeau, gra, Dy row Jee myghinagh dooys ta my ghooinney peccoil.

¹⁴ Ta mee ginsh diu, dy jagh y dooinney shoh sheese gys e hie er ny heyrey roish y jeh elley: son bee dy chooilley er ta dy hoiaghey eh hene seose, er ny injillaghey; as bee eshyn ta dy injillaghey eh hene, er ny hoiaghey seose.

¹⁵ As hug ad lhieu huggey, myrgeddin cloan aegey, dy ventyn roo: agh tra honnick e ostyllyn shoh, hooar ad foill.

¹⁶ Agh deïe Yeesey orroo huggey, as dooyrt eh, Lhig‐jee da ny paitchyn cheet hym’s as ny jean‐jee ad y lhiettal: son jeh nyn lheid ta reeriaght Yee.

¹⁷ Dy firrinagh ta mee gra riu, Quoi‐erbee nagh jean goaill‐rish reeriaght Yee myr lhiannoo beg, cha jed eh er aght erbee stiagh ayn.

¹⁸ As dênee fer‐reill dy row jeh, gra, Vainshter vie, cre t’orrym dy yannoo dy vod eiraght y ve aym ayns y vea veayn?

¹⁹ As dooyrt Yeesey rish, Cre’n‐fa t’ou genmys mish mie? cha vel ayn ny ta mie, agh unnane, ynrycan Jee.

²⁰ Shione dhyt ny annaghyn Ny jean poosey y vrishey, Ny jean dunverys, Ny jean geid, Ny jean feanish foalsey y ymmyrkey, Cur arrym da dty ayr as da dty voir.

²¹ As dooyrt eh, Ooilley shoh ta mee er vreayl veih my aegid.

²² Nish tra cheayll Yeesey shoh, dooyrt eh rish, Ta foast ort un red y yannoo: creck as rheynn ooilley ny t’ayd er ny boghtyn, as bee berchys ayd ayns niau: as tar, as eiyr orrym’s.

²³ As tra cheayll eh shoh, daase eh feer trimshagh, son v’eh feer verchagh.

²⁴ As tra honnick Yeesey dy row eh feer trimshagh, dooyrt eh, Cre cha doillee as te dauesyn ta berchys oc, goll stiagh ayns reeriaght Yee!

²⁵ Son te ny sassey da camel goll trooid croae snaidey, na da dooinney berchagh dy gholl stiagh ayns reeriaght Yee.

²⁶ As dooyrt adsyn cheayll eh, Quoi eisht oddys v’er ny hauail?

²⁷ As dooyrt eh, Ta ny reddyn shoh neu‐phossible da deiney, agh t’ad possible da Jee.

²⁸ Eisht dooyrt Peddyr, Cur‐my‐ner, ta shinyn er dreigeil ooilley, as er n’eirt ort’s.

²⁹ As dooyrt eh roo, Dy firrinagh ta mee gra riu, Nagh vel dooinney erbee t’er dreigeil thie, ny ayr ny moir, ny braaraghyn, ny ben, ny cloan, er gaaih reeriaght Yee,

³⁰ Nagh vow ymmodee filley smoo ’sy traa t’ayn nish, as ayns y theihll ra ry‐heet yn vea dy bragh farraghtyn.

³¹ Eisht ghow eh huggey yn daa ostyl yeig, as dooyrt eh roo, Cur‐my‐ner ta shin goll seose gys Jerusalem, as bee dy chooilley nhee ta scruit liorish ny phadeyryn, mychione yn Mac dooinney, er ny chooilleeney.

³² Son bee eh er ny vrah gys ny Ashoonee, as nee ad craidey mysh, as dellal dy roonagh rish, as ceau shellaghyn er;

³³ As scuitchee ad eh, as ver ad eh gy baase; as y trass laa nee eh girree reesht.

³⁴ As cha hoig ad veg jeh ny reddyn shoh: as va’n raa shoh keillit voue, chamoo va fys oc er ny reddyn va loayrit.

³⁵ As haink eh gy‐kione, tra v’eh er jeet er‐gerrey da Jericho, dy row dooinney doal dy row ny hoie rish lhiattee yn raad, shirrey jeirk.

³⁶ As tra cheayll eh yn pobble goll shaghey, dênee eh cre v’ayn.

³⁷ As dinsh ad da, dy row Yeesey dy Nazareth goll shaghey.

³⁸ As dyllee eh, gra, Yeesey, vac Ghavid, jean myghin orrym.

³⁹ As hug y vooinjer hie roish oghsan da dy ve ny host: agh dyllee eshyn wheesh shen smoo, Vac Ghavid, jean myghin orrym.

⁴⁰ As hass Yeesey, as doardee eh yn dooinney dy ve er ny choyrt lesh huggey: as tra v’eh er jeet er‐gerrey, dênee eh jeh,

⁴¹ Gra, Cre bailt mee dy yannoo er dty hon? As dooyrt eh, Hiarn, dy voddym my hoilshey y gheddyn.

⁴² As dooyrt Yeesey rish, Dty hoilshey dy row ayd: ta dty chredjue er dty hauail.

⁴³ As chelleeragh hooar eh e hoilshey, as deiyr eh er, cur gloyr da Jee: as ooilley yn pobble, tra honnick ad eh, hug ad moylley da Jee.