Jannoo 23 - Yn Conaant Noa 1810

CAB. XXIII

¹ As yeeagh Paul dy gyere er y choonceil, as dooyrt eh, Gheiney as vraaraghyn, Ta mee er n’ymmyrkey mee‐hene fenish Jee lesh cooinsheanse slane ynrick gys y laa t’ayn jiu.

² As doardee Ananias yn ard‐saggyrt adsyn va nyn shassoo liorish, dy woalley eh er y veeal.

³ Eisht dooyrt Paul rish, Nee Jee uss y woalley, O voalley ghiallit: son vel uss soie dy my vriwnys cordail rish y leigh, as goardaghey mee dy ve bwoailt noi yn leigh?

⁴ As dooyrt y vooinjer va nyn shassoo kionfenish rish, Vel uss goltooaney ard‐saggyrt Yee?

⁵ Eisht dooyrt Paul, Cha smooinee mee, vraaraghyn, dy nee yn ard‐saggyrt v’eh: son te scruit, Cha loayr oo dy olk jeh fer‐reill dty phobble.

⁶ As tra denee Paul dy row yn derrey ayrn jeu nyn Sadduceeyn, as yn ayrn elley nyn Phariseeyn, deïe eh ayns y choonceil, Gheiney as vraaraghyn, ta mish my Pharisee, my vac da Pharisee: son y treishteil as irree‐seose‐reesht ny merriu ta mee er my vriwnys.

⁷ As tra v’eh er ghra shoh, dirree streeu eddyr ny Phariseeyn as ny Sadduceeyn, as va’n chaglym noi‐ry‐hoi.

⁸ Son ta ny Sadduceeyn gobbal yn irree‐seose‐reesht veih ny merriu, as nagh vel ayn edyr ainle ny spyrryd: agh ta ny Phariseeyn goaill roo ny neesht.

⁹ As va argane mooar er ny ghoostey: as dirree ny scrudeyryn va er paart ny Phariseeyn, as streeu ad, gra, Cha vel shinyn geddyn foill erbee ayns y dooinney shoh: agh my ta spyrryd ny ainle er loayrt rish, ny lhig dooin caggey noi Jee.

¹⁰ As myr va’n streeu mooad‐aghey, va’n ard‐chaptan agglagh dy raipagh ad Paul ayns peeshyn, as doardee eh sidooryn dy gholl sheese, as dy ghoaill eh er‐niart veih nyn mast’ oc, as dy chur lhieu eh stiagh ayns y chashtal.

¹¹ As yn oie er‐giyn hass y Chiarn liorish, as dooyrt eh, Bee dy yien mie, Phaul: son myr t’ou er n’ymmyrkey feanish jeem’s ayns Jerusalem, myr shen neesht shegin dhyt feanish y ymmyrkey ec y Raue.

¹² As tra va’n laa rish, haggil shiartanse jeh ny Hewnyn cooidjagh, as chiangle ad ad‐hene fo mollaght, gra, nagh n’ee‐agh ad as nagh n’iu‐agh ad derrey veagh ad er varroo Paul.

¹³ As va erskyn da‐eed jeu fo yn cho‐vollaght shoh.

¹⁴ As haink ad gys ny ard‐saggyrtyn as y chanstyr, as dooyrt ad, Ta shin er chiangley shin hene fo mollaght trome, nagh n’ee mayd veg derrey vees shin er varroo Paul.

¹⁵ Nish er‐y‐fa shen jean‐jee shiuish as y choonceil fys y chur gys yn ard‐chaptan eh dy chur lesh eh fenish euish mairagh, myr dy beagh red ennagh eu dy gheddyn toiggal sodjey jeh mychione echey: as bee mainyn aarloo dy ghoaill e vioys my jig eh nyn vaar.

¹⁶ As tra cheayll mac shayrey Phaul jeh’n lhie farkiaght oc, jimmee eh roish, as hie eh stiagh ayns y chashtal, as dinsh eh ooilley da Paul.

¹⁷ Eisht deïe Paul er fer jeh ny centurionyn huggey, as dooyrt eh, Cur lhiat yn dooinney aeg shoh gys yn ard‐chaptan; son ta red ennagh echey dy insh da.

¹⁸ Myr shen ghow eh eh, as hug eh lesh eh gys yn ard‐chaptan, as dooyrt eh, Deïe Paul yn pryssoonagh orrym huggey, as ghuee eh orrym mee dy chur lhiam yn dooinney aeg shoh hood’s, son dy vel red ennagh echey dy insh dhyt.

¹⁹ Eisht ghow yn ard‐chaptan eh er y laue, as hie eh mârish dy lhiattee gys boayl er‐lheh, as dênee eh jeh, Cre shen t’ayd dy insh dooys?

²⁰ As dooyrt eh, Ta ny Hewnyn er choardail dy hirrey ort’s, oo dy chur Paul sheese mairagh gys y choonceil, myr dy beagh red ennagh sodjey oc dy gheddyn toiggal jeh veih.

²¹ Agh ny jean uss er y raa oc: son ta aarloo dy ghoaill eh erskyn da‐eed dooinney jeu, t’er chiangley ad hene fo mollaght, nagh jean ad gee ny giu derrey vees ad er varroo eh: as nish t’ad aarloo, jerkal rish gialdyn y gheddyn voïds.

²² Myr shen lhig yn ard‐chaptan yn raad da’n dooinney aeg, as hug eh currym er, Jeeagh nagh n’insh oo da dooinney erbee dy vel oo er hoilshaghey ny reddyn shoh dooys.

²³ As deïe eh er daa centurion huggey, gra, Fow‐jee aarloo daa cheead sidoor dy gholl gys Cesarea, as markee three‐feed as jeih, as deiney‐shleiy daa cheead, ec y trass oor jeh’n oie.

²⁴ As kiare‐jee beiyn daue, dy vod Paul markiagh, as dy vod ad y chur lhieu eh dy sauchey gys y kiannoort Felix.

²⁵ As ren eh screeuyn er yn aght shoh:

²⁶ Bea as slaynt veih Claudius Lysias, gys y kiannoort smoo ooasle Felix.

²⁷ Va’n dooinney shoh goit ec ny Hewnyn, as myr v’ad er chee dy varroo eh, haink mish lesh sheshaght dy hidooryn, as haue mee eh voue, tra hoig mee dy nee Romanagh v’eh.

²⁸ As liorish dy row mee booiagh fys y gheddyn er yn oyr v’oc dy phlaiynt er, hug mee lhiam eh fenish y whuaiyl oc:

²⁹ As dennee mee dy row eh er ny chassid mychione cooishyn jeh’n leigh oc hene; agh nagh row nhee erbee currit gys e lieh toilchin baase ny geulaghyn.

³⁰ As tra ve inshit dou dy row ny Hewnyn lhie cooyl‐chlea son bioys y dooinney, hug mee fys chelleeragh hood’s, as doardee mee e phlaiyntee dy chur stiagh kiongoyrt rhyt’s cre‐erbee v’oc dy lhiassaghey n’oï. Slane lhiat.

³¹ Eisht ghow ny sidooryn Paul myr va’d oardrit, as hug ad lhieu eh ayns yn oie gys Antipatris.

³² Laa ny vairagh daag ad ny markee dy gholl mârish, as hie ad back gys y chastal.

³³ As tra haink ny markee gys Cesarea, livrey ad ny screeuyn gys y chiannoort, as hoie ad Paul myrgeddin kiongoyrt rish.

³⁴ As tra va’n kiannoort er lhaih yn screeuyn, dênee eh cre’n cheer v’eh jeh. As tra hoig eh dy row eh jeh Cilicia;

³⁵ Ver‐ym chlashtyn dhyt, as eshyn, tra vees dty phlaiyntee myrgeddin er jeet. As doardee eh eh dy ve freilt ayns halley briwnys Herod.