Jannoo 12 - Yn Conaant Noa 1810

CAB. XII

¹ Nish mysh y traa shen heeyn Herod yn ree magh e laueyn dy yannoo tranlaase er shiartanse jeh’n agglish.

² As varr eh Jamys braar Ean lesh y chliwe.

³ As er‐y‐fa dy dug eh tastey dy by‐haittyn lesh ny Hewnyn shen, hie eh ny‐sodjey er e hoshiaght dy ghoaill Peddyr neesht. (Va shen rish feailley ny Caisht).

⁴ As tra v’eh er ghoaill eh, hug eh eh ayns pryssoon, as livrey eh eh fo currym kiare fileyn dy hidooryn dy reayll eh, kiarail lurg y Chaisht dy chur lesh eh magh gys y pobble.

⁵ Va Peddyr er‐y‐fa shen er ny reayll ayns pryssoon; agh va padjer kinjagh er ny ghoaill gys Jee er e hon.

⁶ As tra baillish Herod v’er choyrt lesh magh eh, yn oie cheddin va Peddyr ny chadley eddyr daa hidoor kianlt lesh daa gheuley; as dreill y watch ec y dorrys arrey er y phryssoon.

⁷ As cur‐my‐ner, haink ainle y Chiarn huggey, as ren soilshey soilshean ayns y phryssoon: as woaill eh Peddyr er y lhiattee, as ghooisht eh eh, gra, Irree seose dy tappee. As huitt ny geulaghyn jeh e laueyn.

⁸ As dooyrt yn ainle rish, Cur dty chryss ort, as kiangle ort dty vraagyn: As ren eh shen. As dooyrt eh rish, Cur mood dty gharmad, as eiyr orrym’s.

⁹ As hie eh magh as deiyr eh er, as cha row fys echey dy row eh dy jarroo myr va’n ainle er n’yannoo: agh er‐lesh dy nee ashlish v’eh dy akin.

¹⁰ Tra v’ad er gholl shaghey yn chied as yn nah ghard, haink ad gys y ghiat yiarn ta leeideil gys yn ard‐valley, as doshil eh daue jeh hene: as hie ad magh as jimmee ad trooid un straïd, as chelleeragh daag yn ainle eh.

¹¹ As tra va Peddyr er jeet huggey hene, dooyrt eh, Nish ta fys aym son shickyrys dy vel y Chiarn er choyrt e ainle dy my livrey veih laue Herod, as veih ooilley ny va kiarit m’oï liorish pobble ny Hewnyn.

¹² As tra v’eh er smooinaghtyn er y chooish, haink eh gys thie Voirrey moir Ean, va sliennooit Mark, raad va ymmodee er nyn jaglym cooidjagh ec padjer.

¹³ As tra va Peddyr er chronkal ec dorrys y ghiat, haink ben‐aeg va enmyssit Rhoda dy ênaght quoi v’ayn.

¹⁴ As tra hug ee enney er coraa Pheddyr, cha doshil ee yn giat son boggey, agh roie ee stiagh as dinsh ee daue dy row Peddyr ny hassoo ec y ghiat.

¹⁵ Dooyrt adsyn r’ee, T’ou ass dty cheeayl. Agh ren ish dy jeean shickyraghey dy row eh eer myr shen. Eisht dooyrt ad, She yn ainle echey t’ayn.

¹⁶ Agh chum Peddyr cronkal ec y dorrys: as tra v’ad er vosley da, as er vakin dy nee eh v’ayn, ghow ad lane yindys.

¹⁷ Agh chrie eshyn e laue orroo ad dy ve nyn dhost, as hoilshee eh daue kys va’n Chiarn er chur lesh eh ass y phryssoon. As dooyrt eh, Insh‐jee ny reddyn shoh da Jamys, as da ny braaraghyn. As jimmee eh roish, as hie eh gys ynnyd elley.

¹⁸ Nish cha leah as va’n laa ayn, cha nee yn beggan anvea va mastey ny sidooryn cre’n erree v’er jeet er Peddyr.

¹⁹ As tra va Herod er n’yannoo briaght er, as nagh dooar eh skeeal jeh, deysht eh ny sidooryn, as doardee eh ad dy v’er ny choyrt gy‐baase. As hie eh sheese veih Judea gys Cesarea, as duirree eh ayns shen.

²⁰ As va Herod ayns noidys dewil rish cummaltee Tyre as Sidon: agh haink ad lesh un aigney huggey, as hooar ad stiagh rish Blastus, shamyrder y ree, as hir ad shee; er coontey dy row yn cheer oc cummit seose liorish cheer y ree.

²¹ As er laa pointit hug Herod er e choamrey reeoil, as hoie eh er e stoyl‐reeoil, as loayr eh roo ayns glaare mooar floaoil.

²² As dyllee yn pobble, She coraa Yee t’ayn, as cha nee coraa dooinney.

²³ As chelleeragh woaill ainle y Chiarn eh, er‐yn‐oyr nagh dug eh yn gloyr da Jee: as v’eh eeit ec ny crooagyn, as shen myr hooar eh baase.

²⁴ Agh ren goo Yee gaase as bishaghey.

²⁵ As haink Barnabas as Saul back veih Jerusalem, tra v’ad er chooilleeney yn chirveish oc, as hug ad lhieu mâroo Ean va sliennooit Mark.