Galatianee 6 - Yn Conaant Noa 1810

CAB. VI

¹ Vraaraghyn, my ta dooinney taghyrt dy huittym ayns peccah, shiuish ta spyrrydoil, gow‐jee stiagh eh reesht ayns y spyrryd dy veenid; smooinaghtyn ort hene, er‐aggle dy vod uss myrgeddin ve miolit.

² Ymmyrk‐jee erraghyn y cheilley, as myr shoh lhieen‐jee yn leigh.

³ Son my ta dooinney jeeaghyn er hene dy ve red ennagh, tra nagh vel eh monney, t’eh molley eh hene.

⁴ Agh lhig da dy chooilley ghooinney e obbyr hene y phrowal, as eisht vees echey oyr boggey ayn hene ny lomarcan, as cha nee ayns fer elley.

⁵ Son nee dy chooilley ghooinney gymmyrkey e errey hene.

⁶ Lhig dasyn t’er ny ynsaghey ayns y goo, shirveish ersyn ta gynsaghey jeh dy chooilley nhee mie [t’echey.]

⁷ Ny bee‐jee mollit; cha vel craid dy ve jeant mysh Jee: son cre‐erbee ta dooinney dy chuirr, lheid shen nee eh ’vuinn.

⁸ Son eshyn ta cuirr gys yn eill, nee jeh’n eill myrgeddin buinn loauys: agh eshyn ta cuirr gys y Spyrryd, nee jeh’n Spyrryd buinn yn vea dy bragh farraghtyn.

⁹ As ny lhig dooin gaase skee ayns jannoo mie, son ayns imbagh cooie nee mayd buinn, mannagh bee mayd lhiastey.

¹⁰ Myr ta caa ain er‐y‐fa shen, lhig dooin mie ’yannoo da dy chooilley ghooinney, er‐lheh dauesyn ta jeh lught‐thie’n chredjue.

¹¹ Ta shiu fakin cre’n screeuyn liauyr ta mee er scrieu hiuish lesh my laue hene.

¹² Whilleen as ta shirrey dy hoilshaghey ad hene er cheumooie liorish cowrey ny foalley, t’ad gêginaghey shiu dy ve er ny ghiarey‐chymmylt; ny lomarcan son nagh jinnagh ad surranse tranlaase er coontey crosh Chreest.

¹³ Son chamoo t’adsyn hene ta er ny ghiarey‐chymmylt freayll y leigh; agh baillhieu shiuish dy v’er ny ghiarey‐chymmylt, dy vod ad boggyssagh ayns cowrey yn eill eu.

¹⁴ Agh ny lhig eh Jee dy jinnin’s boggyssagh, agh ayns crosh nyn Jiarn Yeesey Creest, liorish ta’n seihll er ny chrossey hym’s, as mish gys y theihll.

¹⁵ Son ayns Creest Yeesey, chamoo ta ghiarey‐chymmylt jeh foays erbee, ny an‐ghiarey‐chymmylt, agh cretoor noa.

¹⁶ As whilleen as ta gimmeeaght cordail rish yn oardagh shoh, shee dy row orroo, as myghin, as er Israel Yee.

¹⁷ Maghey shoh ny lhig da dooinney erbee mish y voirey, son ta mee gymmyrkey ayns my chorp cowraghyn y Chiarn Yeesey.

¹⁸ Vraaraghyn, dy row grayse nyn Jiarn Yeesey Creest marish y spyrryd eu. Amen.