Galatianee 2 - Yn Conaant Noa 1810

CAB. II

¹ Eisht kiare bleeaney jeig ny lurg shen, hie mee seose reesht gys Jerusalem, marish Barnabas, as ghow mee Titus myrgeddin mârym.

² As hie mee seose myr ve er ny hoilshaghey dou ayns ashlish, as hirveish mee orroosyn yn sushtal shen ta mee dy phreacheil mastey ny Ashoonyn, agh er‐lheh da ny ard‐gheiney, er‐aggle er aght erbee dy roie‐in, ny dy beign er roie ayns fardail.

³ Agh cha row Titus hene, va mârym, ga ny Ghreek, êginit dy ve er ny ghiarey‐chymmylt.

⁴ As shen kindagh rish braaraghyn foalsey v’er nyn goyrt lhieu gyn‐yss ny vud ain, haink stiagh dy croutagh dy chronnaghey yn reamys t’ain ayns Creest Yeesey, dy voddagh ad shin y choyrt lhieu fo bondiaght:

⁵ Agh daue shoh cha dug shin raad choud as un oor dy ve foue; dy voddagh firrinys y tushtal tannaghtyn mêriu.

⁶ Agh er nyn son ocsyn va lowit dy ve red ennagh (cre‐erbee v’ad, cha vel eh veg dooys: cha vel Jee soiaghey jeh persoon dooinney erbee) dy jarroo er nyn son ocsyn va goit dy ve myr shoh, tra va shin noi‐ry‐hoi, cha dynsee mee veg sodjey voue.

⁷ Agh er y cheu elley, tra honnick ad dy row sushtal yn anghiarey‐chymmylt er ny choyrt er my churrym’s, myr va shen jeh’n ghiarey‐chymmylt gys Peddyr;

⁸ (Son eshyn ren gobbraghey dy breeoil ayns Peddyr son ostyllys yn ghiarey‐chymmylt, v’eh myrgeddin niartal aynym’s son ny Ashoonee)

⁹ As tra hug Jamys, Cephas, as Ean, va goit son pillaryn, tastey da’n ghrayse v’er ny stowal orrym’s, hug ad dooys as da Barnabas yn laue yesh dy choardail, dy ragh shinyn gys ny Ashoonee, as adsyn gys yn giarey‐chymmylt.

¹⁰ Ny lomarcan baillhieu dy gooinagh shin er ny boghtyn; yn red cheddin va mee aggindagh dy yannoo.

¹¹ Agh tra va Peddyr er jeet gys Antioch, hug mee eddin da, er‐yn‐oyr dy row eh foiljagh.

¹² Son roish my daink shiartanse voish Jamys, ren eh gee mârish ny Ashoonee: agh tra v’ad shen er jeet, hie eh dy lhiattee, as ren eh scarrey eh hene voue, ayns aggle rouesyn jeh’n giarey‐chymmylt.

¹³ As ren ny Hewnyn elley foalsaght myrgeddin mârishyn; ayns wheesh dy row Barnabas hene fo shaghrynys, kyndagh rish y volteyrys oc.

¹⁴ Agh tra honnick mee nagh row ad gymmyrkey ad hene dy ynrick, cordail rish firrinys y tushtal, dooyrt mee rish Peddyr kiongoyrt roo ooilley, My t’ou uss, ta dty Hew, gymmyrkey oo hene myr ny Ashoonee, as cha nee myr ny Hewnyn, cre’n‐fa t’ou uss gêginaghey ny Ashoonee dy veaghey myr ny Hewnyn?

¹⁵ Shinyn ta nyn Hewnyn liorish dooghys, as cha nee peccee jeh ny Ashoonee,

¹⁶ As fys ain nagh vel dooinney er ny heyrey liorish obbraghyn y leigh, agh liorish credjue Yeesey Creest, ta shinyn eer er chredjal ayns Yeesey Creest; dy voddagh shinyn v’er ny heyrey liorish credjue Chreest, as cha nee liorish obbraghyn y leigh: son liorish obbraghyn y leigh cha bee dooinney bio er ny heyrey.

¹⁷ Agh choud as ta shin shirrey dy ve seyrit liorish Creest, my ta shin hene er ny gheddyn dy ve peccee, vel Creest er‐y‐fa shen shirveishagh peccah? Ny lhig eh Jee.

¹⁸ Son my ta mee troggal reesht shen ta mee er lhieggal, ta mee jannoo mee‐hene foiljagh.

¹⁹ Son ta mish trooid y leigh marroo gys y leigh, dy voddym ve bio gys Jee.

²⁰ Ta mee er my chrossey marish Creest: Ny‐yeih ta mee bio; foast cha nee mish, agh Creest ta bio aynym: as y vea ta mee nish dy veaghey ’syn eill, ta mee beaghey liorish credjue Mac Yee, va graih echey orrym, as ren eh‐hene y choyrt er my hon.

²¹ Cha vel mee jannoo grayse Yee dyn bree: son my ta seyrsnys cheet liorish y leigh, eisht ta Creest marroo ayns fardail.