Ephesianee 2 - Yn Conaant Noa 1810

CAB. II

¹ As shiuish t’eh er vioghey va marroo ayns loghtyn as peccah.

² Ayndoo ren shiu gimmeeaght ayns y traa t’er n’gholl shaghey cordail rish cliaghtey yn theihll shoh, cordail rish prince pooar yn aer, yn spyrryd ta nish gobbraghey ayns y chloan dy vee‐viallys:

³ Ayndoo shoh ren shin ooilley myrgeddin beaghey roish nish, ayns sayntyn ny foalley, cooilleeney yeearreeyn yn eill, as yn aigney: as va shin liorish dooghys nyn gloan dy yymmoose, dy jarroo myr feallagh elley.

⁴ Agh Jee, ta berchagh ayns myghin, er e ghraih vooar liorish bynney lesh shin,

⁵ Dy jarroo tra va shin marroo ayns peccaghyn, t’eh er vioghey shin cooidjagh marish Creest (liorish grayse ta shiu er nyn sauail)

⁶ As t’eh er hroggal shin seose cooidjagh, as er hoiaghey shin cooidjagh ayns ynnydyn flaunyssagh ayns Creest Yeesey.

⁷ Ayns ny earishyn ta ry heet dy voddagh eh soilshaghey berchys erskyn‐towse e ghrayse, ayns e chenjallys dooinyn, trooid Creest Yeesey.

⁸ Son liorish grayse ta shiu er nyn sauail, trooid credjue; as shen cha nee j’iu hene: shen gioot Yee eh:

⁹ Cha nee liorish obbraghyn, nagh jinnagh dooinney erbee boggyssagh:

¹⁰ Son ta shin yn obbyr echeysyn, er nyn groo ayns Creest Yeesey gys obbraghyn mie, ta Jee er n’oardaghey ro‐laue dy jinnagh shin gimmeeaght ayndoo.

¹¹ Shen‐y‐fa cooinee‐jee myr va shiu ayns traa dy row Ashoonee ayns yn eill, ta enmyssit an‐ghiarey‐chymmylt, liorish shen ta enmyssit giarey‐chymmylt ayns yn eill jeant liorish laueyn;

¹² Dy row shiu ec y traa shen fegooish Creest, fegooish cairys gys vondeishyn lught‐thie Israel, as joarreeyn da conaantyn y ghialdyn, gyn veg y treishteil, as fegooish Jee ayns y theihll:

¹³ Agh nish ayns Creest Yeesey, shiuish va keayrt dy row foddey jeh, ta shiu nish er‐gerrey liorish, fuill Chreest.

¹⁴ Son eshyn nyn shee, t’er n’yannoo shin ny‐neesht unnane, as er lhieggal sheese yn voalley‐vean va eddyr shin;

¹⁵ Coyrt naardey ayns yn eill echey hene yn noidys, dy jarroo leigh ny saraghyn, va shassoo ayns oardaghyn, son dy yannoo ayn hene jeh jees, un dooinney noa, myr shen jannoo shee;

¹⁶ As dy voddagh eh ad ny‐neesht y hayrn gys shee rish Jee ayns un chorp liorish y chrosh, liorish shoh stroie yn noidys:

¹⁷ As haink eh, as ren eh preacheil shee diuish va foddey jeh, as dauesyn va er‐gerrey.

¹⁸ Son ny hrooidsyn ta kied ain ny‐neesht dy hayrn er‐gerrey gys yn Ayr liorish un Spyrryd.

¹⁹ Cha vel shin nish er‐y‐fa shen ny sodjey nyn yoarreeyn as jeh cheer whaagh, agh sheshey‐cummaltee marish ny nooghyn, as jeh lught‐thie Yee;

²⁰ As troggit er undin ny ostyllyn as phadeyryn, Yeesey Creest hene yn ard chlagh‐chorneilagh;

²¹ Ersyn ta’n slane troggal, dy stoamey er ny choyrt cooidjagh, gaase dy ve ny hiamble casherick son y Chiarn;

²² Aynsyn ta shiuish myrgeddin troggit son ynnyd‐vaghee dy Yee trooid y Spyrryd.