Ashlish 9 - Yn Conaant Noa 1810

CAB. IX

¹ As heid yn wheiggoo ainle, as honnick mee rollage tuittym veih niau gys y thalloo: as dasyn v’er ny choyrt ogher yn diunid gyn‐grunt.

² As doshil eh yn diunid gyn‐grunt, as dirree jaagh ass y diunid myr jaagh coirrey; as va’n ghrian as yn aer ayns dorraghys, kyndagh rish jaagh y diunid.

³ As haink ass y jaagh locustyn er y thalloo; as dauesyn va pooar er ny choyrt, myr ta pooar ec scorpianee y thallooin.

⁴ As v’ad fo harey gyn skielley y yannoo da faiyr y thallooin, ny da red glass erbee, ny billey erbee; agh da ny deiney shen ny lomarcan, nagh row cowrey Yee oc ayns glare nyn eddin.

⁵ As dauesyn ve er ny choyrt gyn dy varroo ad, agh dy beagh ad er nyn dorchaghey queig meeghyn: as va’n torchagh oc myr torchagh scorpion, tra ta dooinney guint liorish.

⁶ As ayns ny laghyn shen, nee deiney shirrey baase, as cha vow ad eh; as bee ad aignagh baase y gheddyn, as nee’n baase chea voue.

⁷ As va cummey ny locustyn goll‐rish cabbyl greït son y chaggey; as er nyn ging va attaghyn goll‐rish airh, as va ny eddinyn oc goll‐rish eddinyn deiney.

⁸ As va folt oc goll‐rish folt mraane, as va nyn veeacklyn goll‐rish feeacklyn lionyn.

⁹ As va oc eïlley‐vroggil myr yiarn; as va sheean nyn skianyn myr feiyr fainee ymmodee cabbil roie gys y chaggey.

¹⁰ As va farbyllyn orroo myr scorpionee, as va gah ayns nyn arbyl: as va pooar oc dy ghortaghey deiney queig meeghyn.

¹¹ As va oc ree harrystoo, ainle y diunid gyn‐grunt, ta’n ennym echey ayns glare ny Hebrewnee Abaddon, agh ayns glare ny Grecianee ta e ennym Apollyon.

¹² T’an chied cherraghey trome harrish, as cur‐my‐ner, ta daa cherraghey trome elley dy heet ny lurg oc shoh.

¹³ As heid yn cheyoo ainle, as cheayll mee coraa veih kiare corneilyn yn altar airhey, ta kiongoyrt rish Jee,

¹⁴ Gra rish y cheyoo ainle echey va’n cayrn, Feayshil ny kiare ainleyn ta kianlt ayns awin vooar Euphrates.

¹⁵ As va ny kiare ainleyn er nyn veaysley, va kiarit son oor, as laa, as mee, as blein, dy stroie yn trass ayrn jeh sheelnaue.

¹⁶ As va earroo sheshaght‐caggee ny markee daa cheead thousane dy housaneyn: as cheayll mee yn earroo oc.

¹⁷ As myr shoh honnick mee ny cabbil ayns yn ashlish, as adsyn v’er nyn mooin, va eïlley‐vroggil orroo myr aile, as myr hyacinth, as myr brimstone: as va king ny cabbil myr king lionyn; ass as nyn meeal haink aile, as jaagh, as brimstone.

¹⁸ Lioroo shoh nyn droor va’n trass ayrn dy gheiney er ny stroie, liorish yn aile, as liorish y jaagh, as liorish y brimstone, haink as nyn meeal.

¹⁹ Son ta’n phooar oc ayns nyn meeal, as ayns nyn abyl: son va ny farbyllyn oc goll‐rish ard‐nieughyn, as va king oc, as lioroo t’ad jannoo skielley.

²⁰ As y chooid elley jeh ny deiney nagh row er nyn stroie liorish ny kerraghyn agglagh shoh, cha ghow ad foast arrys son obbraghyn nyn laueyn, ayns gyn coyrt ooash, ley da jouyil, as jallooyn dy airh‐dy argid, as prash, as clagh, as fuygh: nagh vod fakin, ny clashtyn, ny shooyl:

²¹ Chamoo ghow ad arrys jeh’n dunverys oc, ny jeh’n obbeeys oc, ny jeh nyn maarderys, ny jeh nyn maarlys.