Ashlish 6 - Yn Conaant Noa 1810

CAB. VI

¹ As honnick mee, tra doshil yn Eayn yn chied seal as cheayll mee, myr feiyr taarnagh, fer jeh ny kiare cretooryn, gra, Tar, as cur‐my‐ner.

² As yeeagh mee, as cur‐my‐ner, cabbyl bane; as va bow echeysyn va ny hoie er, as va attey er ny choyrt da, as hie eh magh lesh barriaght, as dy gheddyn barriaght.

³ As tra v’eh er vosley yn nah seal, cheayll mee yn nah chretoor gra, Tar, as cur‐my‐ner.

⁴ As hie magh cabbyl elley va jiarg; as va pooar er ny choyrt dasyn va ny hoie er, dy ghoaill shee ersooyl voish y thalloo, as dy jinnagh yn derrey yeh coyrt yn jeh elley dy baase: as va cliwe mooar er ny choyrt da.

⁵ As tra v’eh er vosley yn trass seal, cheayll mee yn trass chretoor gra, Tar, as cur‐my‐ner. As yeeagh mee, as honnick mee cabbyl doo; as v’echeysyn va markiagh er piyr dy veihaghyn ayns e laue.

⁶ As cheayll nee coraa veih mastey ny kiare cretooryn, gra, Towse dy churnaght son ping, as three towseyn dy oarn son ping; as ny jean aggair da’n ooil as y feeyn.

⁷ As tra v’eh er vosley yn chiarroo seal, cheayll mee coraa yn chiarroo chretoor gra, Tar, as cur‐my‐ner.

⁸ As yeeagh mee, as cur‐my‐ner, cabbyl banee; as va ennym yn varkiaght v’er, yn Baase, as yn oaie geiyrt er: as va pooar currit daue harrish y chiarroo ayrn jeh’n thalloo, dy varroo lesh y chliwe, as lesh gortey, as lesh baase, as lesh beiyn feïe y thallooin.

⁹ As tra v’eh er vosley yn wheiggoo seal, honnick mee fo’n altar ny anmeenyn ocsyn v’er ny choyrt dy baase son goo Yee, as son yn eanish dymmyrk ad.

¹⁰ As deïe ad lesh ard‐choraa, gra, Caid, O Hiarn, casherick as firrinagh, nagh vel uss briwnys as goaill cooilleeney son yn uill ain er fir‐vaghee yn thallooin?

¹¹ As va coamraghyn gial er ny choyrt da dagh unnane oc, as ve er ny ghra roo, dy row ad dy ghoaill fea foast son tammylt derrey veagh traa nyn sheshaghyn‐sharvaant myrgeddin, as nyn mraaraghyn va dy hurranse baase myr ren adsyn, cooilleenit.

¹² As honnick mee tra doshil eh yn cheyoo seal, as cur‐my‐ner, va craa mooar thallooin ayn, as haink y ghrian dy ve doo myr aanrit‐sack geyshteenagh, as va’n eayst myr fuill;

¹³ As huit rollageyn yn aer gys y thalloo, myr ta billey‐figgagh tilgey e vess neu‐chooie, tra te criht lesh geay niartal:

¹⁴ As hie’n aer ass shilley myr duillag lioar ta fillit; as va dy chooilley lieau as ellan scughit ass nyn undin:

¹⁵ As ren reeaghyn y thallooin, as ny ard‐gheiney, as ny berchee, as ny ard‐chaptanyn, as ny deiney pooaral, as dy chooilley ghooinney ayns bondiaght, as ooilley ayns seyrsneys, ad hene y ollaghey ayns ooigyn, as fo creggyn ny sleityn.

¹⁶ As dooyrt ad rish ny sleityn as ny creggyn, Tuitt‐jee orrin, as follee shin veih’n eddin echeysyn ta ny hoie er y stoyl‐reeoil, as veih corree yn Eayn:

¹⁷ Son ta laa mooar e yymmoose er jeet, as quoi oddys shassoo?