Ashlish 5 - Yn Conaant Noa 1810

CAB. V

¹ As honnick mee ayns y laue‐yesh echeysyn va soie er y stoyl reeoil, lioar scruit er y cheu‐sthie as er y chooyl, sealit lesh shiaght sealyn.

² As honnick mee ainle niartal fockley magh lesh ard‐choraa, Quoi ta feeu dy osley yn lioar, as dy eaysley ny sealyn eck?

³ As cha yiarg dooinney erbee ayns niau, ny er y thalloo, ny fo’n thalloo, yn lioar y osley, ny dy yeeaghyn ayn.

⁴ As cheayn mee dy mooar, er‐y‐fa nagh row dooinney erbee er ny gheddyn feeu dy osley, as dy lhaih yn lioar, ny dy yeeaghyn ayn.

⁵ As dooyrt fer jeh ny shanstyryn rhym. Ny jean keayney: cur‐my‐ner, ec Lion kynney Yudah, fraue Ghavid, ta pooar dy osley yn lioar, as dy eaysley ny shiaght sealyn eck.

⁶ As yeeagh mee, as cur‐my‐ner, kiongoyrt rish y stoyl‐reeoil, as ny kiare cretooryn, as ayns mean ny shanstyryn, hass Eayn myr dy beagh eh er ny varroo, lesh shiaght eairkyn, as shiaght sooillyn, ta shiaght Spyrrydyn Yee, er nyn goyrt magh trooid ooilley’n seihll.

⁷ As haink eh as ghow eh yn lioar ass y laue‐yesh echeysyn va soie er y stoyl‐reeoil.

⁸ As tra v’eh er ghoaill y lioar, huitt ny kiare cretooryn as ny kiare shanstyryn as feed sheese fenish yn Eayn, as claasaghyn ec dagh unnane oc, as siyn airhey lane dy hoar millish ourallyn, ta padjeryn ny nooghyn.

⁹ As ghow ad arrane noa, gra, T’ou uss feeu dy ghoaill y lioar, as dy eaysley ny sealyn eck: son v’ou er ny choyrt dy baase, as t’ou er chionnaghey shin reesht gys Jee liorish dty uill, ass dy chooilley chynney, as glare, as pobble, as ashoon;

¹⁰ As t’ou er n’yannoo shin da’n Jee ain, reeaghyn as saggyrtyn: as nee mayd reill er y thalloo.

¹¹ As yeeagh mee, as cheayll mee coraa ymmodee ainleyn mygeayrt y stoyl‐reeoil, as ny cretooryn, as ny shanstyryn: as va’n earroo oc jeih thousane keayrt jeih thousaneyn, as thousaneyn dy housaneyn;

¹² Gra lesh ard‐choraa, Feeu ta’n Eayn v’er ny varroo, dy gheddyn pooar, as berchys, as creenaght, as niart, as ooashley, as gloyr, as bannaght.

¹³ As dy chooilley chretoor t’ayns niau, as er y thalloo, as fo’n thalloo, as lheid as ta ayns y cheayn, as ooilley ny t’ayndoo, cheayll mee, gra, Bannaght, as ooashley, as gloyr, as pooar dy row huggeysyn ta soie er y stoyl‐reeoil, as gys yn Eayn son dy bragh as dy bragh.

¹⁴ As dooyrt ny kiare cretooryn, Amen. As huitt ny kiare shanstyryn as feed sheese as hug ad ooashley dasyn ta bio son dy bragh as dy bragh.