Ashlish 4 - Yn Conaant Noa 1810

CAB. IV

¹ Lurg shoh yeeagh mee, as cur‐my‐ner, va dorrys er ny osley ayns niau: as va’n chied choraa cheayll mee, myr dy beagh eh cayrn taggloo rhym; dooyrt rhym, Tar seose gys shoh, as jeeagh‐ym dhyt reddyn shegin ve ny lurg shoh.

² As chelleeragh va mee ayns y Spyrryd; as cur‐my‐ner, va stoyl‐reeoill soit ayns niau, as hoie fer er y stoyl‐reeoil.

³ As v’eshyn ren soie, dy yeeaghyn er, clasley rish jasper, as clagh sardine; as va goll twoaie runt mygeayrt y stoyl‐reeoil, ayns shilley myr emerald.

⁴ As runt mygeayrt y stoyl‐reeoil va kiare stuill as feed; as er ny stuill honnick mee kiare shanstyryn as feed nyn soie, coamrit ayns coamrey gial; as v’oc er nyn ging attaghyn dy airh.

⁵ As magh ass y stoyl‐reeoil haink tendreilyn, as taarnaghyn, as coraaghyn. As va shiaght lampyn dy aile, lossey kiongoyrt rish y stoyl‐reeoil, shen ta shiaght spyrrydyn Yee.

⁶ As kiongoyrt rish y stoyl‐reeoil va faarkey dy ghless, goll‐rish crystal: as ayns mean y stoyl‐reeoil as cruin mygeayrt y stoyl‐reeoill, va kiare beiyn lane dy hooillyn cheu‐veealloo as cheu‐chooylloo.

⁷ As va’n chied chretoor casley rish lion, as va’n nah chretoor goll‐rish lheiy, as va eddin ec y trass chretoor goll‐rish dooinney, as va’n chiarroo chretoor myr urley ta getlagh.

⁸ As v’ec dagh fer jeh ny kiare cretooryn shey skianyn mygeayrt‐y‐mysh, as v’ad lane dy hooillyn cheu‐sthie; as cha vel ad scuirr laa ny oie, gra, Casherick, casherick, casherick, Hiarn Yee Ooilley‐niartal, va, as ta, as ta ry‐heet.

⁹ As choud as ta ny cretooryn shen coyrt gloyr, as ooashley, as booise dasyn va ny hoie er y stoyl reeoil, ta bio son dy bragh as dy bragh.

¹⁰ Ta ny kiare shanstyryn as feed tuittym sheese kiongoyrt rishyn va ny hoie er y stoyl‐reeoil, as coyrt ooashley dasyn ta bio son dy bragh as dy bragh, as t’ad ceau sheese ny attaghyn oc kiongoyrt rish y stoyl‐reeoil, gra,

¹¹ T’ou feeu, O Hiarn, dy gheddyn gloyr, as ooashley, as pooar; son t’ou er chroo dy chooilley nhee, as son dty aigney hene t’ad, as v’ad er nyn groo.