Ashlish 10 - Yn Conaant Noa 1810

CAB. X

¹ As honnick mee ainle niartal elley cheet neose veih niau, coamrit lesh bodjal, as goll‐twoaie er e chione, as va’n eddin echey myr y ghrian, as ny cassyn echey goll‐rish pillaryn dy aile.

² As va lioar veg foshlit echey ayns e laue: as hoie eh e chass yesh er yn aarkey, as e chass chiare er y thalloo,

³ As deïe eh lesh ard‐choraa, myr ta lion buirroogh: as tra v’eh er n’yllagh, ren shiaght taarnaghyn fockley‐magh nyn goraaghyn.

⁴ As tra va ny shiaght taarnaghyn erreish fockley magh nyn goraa, va mee kiarit dy scrieu; as cheayll mee coraa veih niau, gra rhym, Seal seose ny reddyn shen ta ny shiaght taarnaghyn er vockley magh, as ny scrieu ad.

⁵ As yn ainle honnick mee ny hassoo er yn aarkey, as er y thalloo, hrog eh seose e laue gys niau,

⁶ As loo eh liorishyn ta bio son dy bragh as dy bragh, chroo niau, as ny reddyn t’ayn, as y thalloo, as ny reddyn t’ayn, as yn aarkey, as ny reddyn t’ayn, nagh beagh traa ny sodjey:

⁷ Agh ayns laghyn coraa yn chiaghtoo ainle, tra nee eh toshiaght dy heidey, dy beagh folliaght Yee er ny chooilleeney, myr t’eh er hoilshaghey da e harvaantyn ny phadeyryn.

⁸ As loayr y coraa cheayll mee veih niau rhym reesht, as dooyrt eh, Immee, as gow yn lioar veg ta foshlit ayns laue yn ainle ta shassoo er yn aarkey, as er y thalloo.

⁹ As hie mee gys yn ainle, as dooyrt mee rish, Cur dou yn lioar veg. As dooyrt eh rhym, Gow eh, as ee eh; as nee eh dty volg sharroo, agh bee eh millish ayns dty veeal myr mill.

¹⁰ As ghow mee yn lioar veg ass laue yn ainle, as d’ee mee eh; as ve ayns my veeal millish myr mill: as cha leah as d’ee mee eh, va my volg sharroo.

¹¹ As dooyrt eh rhym, Shegin dhyt’s phadeyrys y yannoo reesht mychione ymmodee pobble, as ashoonyn, as glaraghyn, as reeaghyn.