2 Timothy 3 - Yn Conaant Noa 1810

CAB. III

¹ Toig shoh myrgeddin, ayns ny laghyn jerrinagh dy jig traaghyn seaghnagh.

² Son bee ooilley er nyn son oc hene, sayntoilee, boggyssee, mooaralee, oltooanee, mee‐viallagh gys ayraghyn as moiraghyn, neu‐wooisal, mee‐chrauee,

³ Fegooish graih dooghyssagh, brishey conaantyn, casseyderyn foalsey, rouanagh, dewil, dwoaiagh er deiney mie,

⁴ Traitooryn, teaymagh, ard‐aignagh, ny s’graihee er eunyssyn y vea shoh na er Jee;

⁵ Goaill orroo caslys dy chraueeaght, agh jannoo noi’n phooar [vreeoil] echey: veih nyn lheid chyndaa ersooyl.

⁶ Son jeh’n sorch shoh t’adsyn ta dy steetagh goll stiagh ayns thieyn, as leeideil ayns cappeeys mraane eddrym laadit lesh peccaghyn, er nyn goyrt lhieu ersooyl lesh ymmodee yeearreeyn peccoil,

⁷ Kinjagh gynsaghey, as dyn dy bragh abyl cheet gys tushtey jeh’n irriney.

⁸ Nish myr ren Jannes as Jambres girree noi Moses, myr shen t’ad shoh neesht shassoo magh noi’n irriney: deiney jeh aighnaghyn mee‐chrauee, caillit gys y chredjue.

⁹ Agh cha jed ad ny sodjey er nyn doshiaght: son bee’n vee‐cheeayllid oc er ny hoilshaghey da dy chooilley ghooinney, myr va myrgeddin yn vee‐cheeayllid oc shen.

¹⁰ Agh t’ou uss dy slane er hoiggal my ynsagh, my aght‐beaghee, my chiarail, my chredjue, my hurranse‐foddey, my ghraih, my veenid,

¹¹ Yn tranlaase, as y seaghyn haink orrym ec Antioch, ec Iconium, ec Lystra: cre’n tranlaase hie mee ny hrooid; agh assdoo ooilley ren y Chiarn my livrey.

¹² Dy jarroo, as shegin dauesyn ooilley ta shirrey dy veaghey dy crauee ayns Creest Yeesey, tranlaase y hurranse.

¹³ Agh nee drogh gheiney as molteyryn gaase ny smessey as ny smessey, molley, as er nyn molley,

¹⁴ Agh tannee uss ayns ny reddyn t’ou er n’ynsaghey, as er chredjal dy shickyr, toiggal quoi veih t’ou er n’ynsaghey ad;

¹⁵ As neayr’s v’ou dty lhiannoo dy vel oo er ve ynsit ayns ny scriptyryn casherick, oddys oo y yannoo creeney gys saualtys, trooid credjue ayns Creest Yeesey.

¹⁶ Ta ooilley’n scriptyr er ny choyrt liorish bree Spyrryd casherick Yee, as te vondeishagh son ynsagh, son oghsan, son lhiasaghey‐bea, son tushtey ayns ynrickys:

¹⁷ Dy vod y dooinney dy Yee ve slane schleïoil, dy fondagh coamrit son dy chooilley obbyr vie.