2 Timothy 1 - Yn Conaant Noa 1810

CAB. I

¹ Paul ostyl Yeesey Creest liorish aigney Yee, cordail rish gialdyn y vea, ayns Creest Yeesey;

² Gys Timothy my vac deyr graihagh: Grayse, myghin, as shee veih Jee yn Ayr, as Chreest Yeesey nyn Jiarn.

³ Ta mee cur booise gys Jee, eh ta mee dy hirveish veih my henn‐ayraghyn lesh cooinsheanse ghlen, dy vel mee cooinaghtyn dy kinjagh ort ayns my phadjeryn oie as laa:

⁴ Dy jeean goaill foddiaght dy dty akin, cooinaghtyn er dty yeir, dy voddym ve er my lhieeney lesh gerjagh:

⁵ Tra ta mee tayrn gys cooinaghtyn yn credjue ynrick t’aynyd’s, va hoshiaght ayns dty warree Lois, as dty voir Eunice; as ta mee dy shickyr credjal dy ve aynyd’s myrgeddin.

⁶ Shen‐y‐fa ta mee coyrt oo ayns cooinaghtyn, dy jean oo greesaghey seose gioot Yee, ta aynyd, liorish coyrt my laueyn ort.

⁷ Son cha vel Jee er choyrt dooin yn spyrryd dy aggle; agh dy phooar, as dy ghraih, as dy chreenaght.

⁸ Ny bee nearey ort er‐y‐fa shen jeh recortys nyn Jiarn, ny jeem’s e phryssoonagh: agh gow uss ayrn mârym’s ayns seaghyn y tushtal, cordail rish pooar Yee;

⁹ Ta er hauail shin, as er n’eamagh orrin lesh eam casherick, cha nee cordail rish ny obbraghyn ain, agh cordail rish e chiarail hene as grayse va er ny choyrt dooin ayns Creest Yeesey, er‐dy hoshiaght y theihll,

¹⁰ Agh ta nish er ny hoilshaghey liorish cheet nyn Saualtagh Yeesey Creest, ta er stroie yn baase, as er choyrt lesh bea as bioys son dy bragh gys soilshey, liorish y sushtal:

¹¹ Gys ta mee er my phointeil ny phreachoor, as ny ostyl, as fer‐ynsee ny Ashoonee.

¹² Er‐yn‐oyr cheddin ta mee myrgeddin surranse ny reddyn shoh, ny‐yeih cha vel nearey orrym: son shione dou eshyn ayn ta mee er credjal, as ta mee feer shickyr dy vel eh abyl dy reayll shen ny ta mee er hymney gys e chiarail gys yn laa shen.

¹³ Cumm shickyr bun ny goan slayntoil, t’ou er chlashtyn voym’s, ayns credjue as graih ta ayns Creest Yeesey.

¹⁴ Yn gioal mie shen v’er ny choyrt fo dty chiarail, freill liorish y Spyrryd Noo ta beaghey aynin.

¹⁵ Shoh ta fys ayd, dy vel adsyn ooilley t’ayns Asia er choyrt cooyl rhym; jeu shoh ta Phygellus as Hermogenes.

¹⁶ Dy der y Chiarn myghin da lught‐thie Onesiphorus; son ren eh dy mennick m’y ooraghey, as cha row nearey er jeh my gheuley.

¹⁷ As tra v’eh ec y Raue, ren eh briaght er my hon dy imneagh, as hooar eh magh mee.

¹⁸ Dy giall y Chiarn da dy vod eh myghin y gheddyn veih’n Chiarn ’sy laa shen: as ayns cre whilleen nhee ren eh shirveish orrym ec Ephesus, ta fys ayd er dy mie.