2 Thessalonianee 3 - Yn Conaant Noa 1810

CAB. III

¹ Ny sodjey, vraaraghyn, gow‐jee padjer er nyn son, dy vod goo’n Chiarn roie dyn lhiettal, as ve er ny ghloyraghey dy jarroo myr te nyn mast’ euish;

² As dy vod shin v’er nyn livrey veih deiney neu‐resoonagh as olkyssagh: son cha vel ec dy chooilley ghooinney credjue.

³ Agh ta’n Chiarn firrinagh, nee shiuish y niartaghey, as y reayll veih olk.

⁴ As ta treishteil ain ayns y Chiarn mychione eu, dy vel shiu, as dy jean shiu, cooilleeney ny reddyn ta shin coyrt ayns currym diu.

⁵ As dy jean y Chiarn ny creeaghyn eu y leeideil ayns graih Yee, as ayns farkiaght surransagh er Creest.

⁶ Nish ta shin cur sarey diu, vraaraghyn, ayns ennym nyn Jiarn Yeesey Creest, dy jean shiu scarrey shiu hene voish dy chooilley vraar ta gymmyrkey eh hene dy mee‐reilltagh, as cha nee cordail rish yn ynsagh hooar eh voïnyn.

⁷ Son ta fys eu hene cre’n aght lhisagh shiu geiyrt orrin: son cha ren shin gymmyrkey shin hene dy mee‐reilltagh nyn mast’ eu,

⁸ Chamoo d’ee shin arran dooinney erbee nastee; agh ren shin gobbraghey lesh deinys as tooilleil oie as laa, son nagh beagh shin costyllagh da veg eu:

⁹ Cha nee son nagh vel pooar ain, agh dy yannoo shin hene sampleyr diuish dy eiyrt orrin.

¹⁰ Son dy jarroo tra va shin mêriu, hug shin yn sarey shoh diu, Fer erbee nagh jinnagh gobbraghey, nagh lhisagh eh gee.

¹¹ Son ta shin clashtyn dy vel nyn lheid ayn ta gymmyrkey ad hene dy lhiastey ny vud eu, nagh vel lhie rish turn y yannoo, agh ta seiy ad hene ayns cooishyn sleih elley.

¹² Nish dauesyn ta nyn lheid ta shin cur sarey, as raaue liorish nyn Jiarn Yeesey Creest, dy jean ad gobbraghey dy feagh, as gee yn arran oc hene.

¹³ Agh shiuish, vraaraghyn, ny bee‐jee liastey ayns jannoo mie.

¹⁴ As my ta dooinney erbee nagh vel coyrt biallys da’n goo ain liorish y screeuyn shoh, gow‐jee baght er‐lheh jeh’n dooinney shen, as ny jean‐jee sheshaght rish, dy vod eh goaill nearey.

¹⁵ Ny‐yeih ny jeeagh‐jee er myr noid, agh coyrlee‐jee eh myr braar.

¹⁶ Nish dy jean y Chiarn hene dy hee, shee ’choyrt diu dy kinjagh, er dy chooilley aght. Dy row yn Chiarn mêriu ooilley.

¹⁷ Bea as slaynt hiu voym’s Paul fo my laue hene, ta’n cowrey ayns dy chooilley screeuyn: shen myr ta mee scrieu;

¹⁸ Grayse nyn Jiarn Yeesey Creest dy row mêriu ooilley. Amen.