2 Thessalonianee 1 - Yn Conaant Noa 1810

CAB. I

¹ Paul, as Sylvanus, as Timotheus, gys agglish ny Thessalonianee, ayns Jee nyn Ayr, as y Chiarn Yeesey Creest:

² Grayse dy row hiu, as shee voish Jee nyn Ayr, as y Chiarn Yeesey Creest.

³ Ta shin kianlt dy choyrt booise kinjagh gys Jee er nyn son eu, vraaraghyn, myr te cooie, son dy vel y credjue eu cheet er‐ash ny smoo as ny smoo, as graih dagh unnane eu dy cheilley bishaghey.

⁴ Myr shen dy vel shin hene boggyssagh ayns y lieh eu ayns kialteenyn Yee, son y meenid, as credjue eu, ayns ooilley’n tranlaase as y seaghyn ta shiu dy hurranse.

⁵ Ta cowrey cronnal jeh briwnys cairagh Yee, dy vod shiu ve coontit feeu jeh reeriaght Yee, er y hon ta shiu myrgeddin surranse:

⁶ Fakin dy vel eh red cairagh marish Jee dy chooilleeney seaghyn orroosyn ta jannoo tranlaase erriu;

⁷ As diuish ta seaghnit, fea mârin, traa vees y Chiarn Yeesey er ny hoilshaghey veih niau marish e ainleyn niartal.

⁸ Ayns aile loshtee cooilleeney kerraghey orroosyn ooilley nagh vel goaill rish Jee, as nagh vel coyrt biallys da sushtal nyn Jiarn Yeesey Creest:

⁹ Vees er nyn gerraghey lesh toyrt‐mow dy bragh farraghtyn veih fenish y Chiarn, as veih gloyr e phooar.

¹⁰ Tra hig eh dy ve er ny ghloyraghey ayns e nooghyn, as dy ve er y laa shen shilley yindyssagh ayndoosyn ooilley ta credjal (er‐yn‐oyr dy row yn recortys ainyn nyn mast’ eu er ny chredjal):

¹¹ Shen‐y‐fa ta shin myrgeddin dy kinjagh goaill padjer er nyn son eu, dy gooidsave lesh y Jee ain dy choontey shiu feeu jeh’n eam shoh, as dy chooilleeney ooilley aigney‐mie e vieys, as yn obbyr dy chredjue lesh pooar.

¹² Dy vod ennym nyn Jiarn Yeesey Creest v’er ny ghloyraghey ayndiuish, as shiuish aynsyn, cordail rish grayse nyn Yee, as y Chiarn Yeesey Creest.