2 Corinthianee 10 - Yn Conaant Noa 1810

CAB. X

¹ Nish ta mish Paul mee hene guee erriu, liorish meenid as meiyghys Chreest, mish ta dy yeeaghyn orrym pene fardalagh nyn mast’ eu, agh dunnal tra ta mee veue.

² Agh ta mee guee erriu, nagh der shiu oyr dou dy ve gyere riu tra hig‐ym kionfenish, lesh y dunnallys shen ta foym dy hoilshaghey noi paart ta gourys orrin myr dy beagh shin gimmeeaght cordail rish yn eill.

³ Son ga dy vel shin gimmeeaght ayns yn eill, cha vel shin caggey lurg yn eill:

⁴ (Son cha vel ny greinyn‐caggee ain jeh stoo foalley, agh niartal trooid Jee dy lhieggal sheese tooryn lajer)

⁵ Tilgey sheese resooney fardalagh, as dagh nhee mooaralagh ta soiaghey seose eh hene noi tushtey Yee, as coyrt lhien ayns cappeeys dy chooilley smooinaghtyn gys biallys Chreest:

⁶ As aarloo dy cherraghey dy chooilley vee‐viallys, tra vees y viallys euish er ny chooilleeney.

⁷ Vel shiu briwnys reddyn lurg y caslys er cheu‐mooie? my ta dooinney erbee treishteil huggey hene, dy vel eh lesh Creest, lhig da shoh neesht ’ghoaill mârish, myr t’eshyn lesh Creest, dy vel shinyn lesh Creest myrgeddin.

⁸ Son ga dy jinnin boggyssagh ny‐sodjey jeh’n phooar ain (ta’n Chiarn er choyrt dooin son y vondeish, as cha nee son yn assee eu) cha beagh nearey orrym.

⁹ Nagh goghe shiu mee myr dy baillym shiu y agglaghey lesh screeunyn.

¹⁰ Son ta ny screeunyn echey (jir adsyn) breeoil as niartal, agh dy yeeaghyn er y dooinney hene t’eh annoon, as e ghlare dyn bree.

¹¹ Lhig dasyn ta smooinaghtyn myr shoh fys v’echey, lheid as ta shinyn ayns goan liorish screeuyn, tra nagh vel shin kionfenish, lheid cheddin bee mayd ayns jannoo, tra vees shin kionfenish.

¹² Son cha lhoys dooin jannoo shin hene jeh’n earroo ocsyn, ny soylaghey shin hene gys paart ta dy voylley ad hene: agh adsyn towse ad hene lioroo hene, as soylaghey ad hene roo hene, cha vel ad creeney.

¹³ Agh cha jean shinyn boggyssagh jeh reddyn ta ass nyn roshtyn, agh cordail rish towse y rule, ta Jee er phointeil dooin, towse dy roshtyn dy jarroo hiuish.

¹⁴ Son cha vel shin sheeyney shin hene harrish nyn dowse, myr nagh beagh shin er roshtyn hiu; son ta shin er jeet choud as hiuish myrgeddin, ayns preacheil sushtal Chreest.

¹⁵ Cha nee boggyssagh jeh reddyn harrish nyn dowse, ta shen, jeh laboraght gheiney elley; agh treishteil, tra vees yn credjue euish er ny vishaghey, dy jean y towse ainyn roshtyn ny sodjey lieriuish dy gholl dy mooar er nyn doshiaght cordail rish y rule ainyn,

¹⁶ Dy phreacheil y sushtal ayns ny cheeraghyn er cheu elley j’iu, as cha nee dy ve boggyssagh ayns rule dooinney elley, jeh reddyn jeant aarloo gys nyn laue.

¹⁷ Agh eshyn ta boggyssagh, lhig da boggyssagh ayns y Chiarn.

¹⁸ Son cha nee eshyn ta dy voylley eh hene, ta soiagh jeant jeh, agh eshyn ta’n Chiarn dy voylley.