1 Peddyr 5 - Yn Conaant Noa 1810

CAB. V

¹ Ny shanstyryn ta ny mast’ eu ta mee coyrlaghey, ta mee hene myrgeddin my hanstyr, as feanish jeh surranseyn Chreest, as myrgeddin parteeas jeh’n ghloyr vees er ny hoilshaghey:

² Cur‐jee beaghey da shioltane Yee ta ny mast’ eu, goaill y currym harrystoo, cha nee myr êginit, agh dy aggindagh; cha nee er coontey cosney naareydagh, agh jeh aigney arryltagh;

³ Chamoo myr chiarnyn harrish eiraght Yee, agh myr sampleyryn da’n chioltane.

⁴ As tra hig yn Ard‐vochilley kionfenish, yiow shiu attey dy ghloyr nagh jean fioghey ersooyl.

⁵ Myrgeddin shiuish sleih aegey bee‐jee arrymagh da’n chenndeeaght: dy jarroo bee‐jee ooilley ayns biallys yn derrey yeh gys y jeh elley, as bee‐jee coamrit lesh injillid aigney: son ta Jee soiaghey eh hene noi’n vooinjer voyrnagh, as t’eh coyrt grayse dauesyn ta imlee.

⁶ Jean‐jee shiu hene er‐y‐fa shen y injillaghey fo laue niartal Yee, dy vod eh shiu y hroggal seose ayns traa cooie;

⁷ Tilgey ooilley yn chiarail eu ersyn; son t’eh kiarail er ny son eu.

⁸ Bee‐jee sheelt, bee‐jee er nyn arrey; er‐yn‐oyr dy vel y noid eu yn drogh‐spyrryd myr lion buirroogh, shooyl mygeayrt, shirrey quoi oddys eh y stroie:

⁹ N’oï shass‐jee dy shickyr ayns y chredjue; myr ta toiggal eu dy vel ny seaghyn cheddin er ny ymmyrkey liorish ny braaraghyn eu t’ayns y theihll.

¹⁰ Agh dy jean y Jee jeh dy chooilley ghrayse, ta er n’eamagh orrin gys e ghloyr dy bragh farraghtyn liorish Creest Yeesey, lurg diu ve er hurranse tammylt beg, dy jean eh shiu y yannoo dy firrinagh mie, dy jean eh shiu y chummal seose, y niartaghey, as y hickyraghey,

¹¹ Huggeysyn dy row gloyr as reill son dy bragh as dy bragh. Amen.

¹² Liorish Sylvanus braar firrinagh diuish (myr ta mee dy ghoaill eh) ta mee er scrieu ayns focklyn giarey, coyrlaghey as gymmyrkey feanish, dy nee shoh grayse firrinagh Yee ayn ta shiu shassoo.

¹³ Ta’n agglish ta ec Babylon, reiht cooidjagh mêriuish, cur bea as slaynt hiu, as myrgeddin Marcus my vac.

¹⁴ Oltee‐jee y cheilley lesh paag dy ghraih [creestee]. Shee dy row mêriu ooilley t’ayns Creest Yeesey. Amen.