1 Corinthianee 2 - Yn Conaant Noa 1810

CAB. II

¹ As tra haink mish hiu, vraaraghyn, cha nee lesh yrjid dy ghlare floaoil haink mee, ny creenaght seihltagh, soilshaghey diu recortys Yee.

² Son va mee kiarit gyn dy hoiggal nhee erbee ny mast’ eu, agh Yeesey Creest, as eshyn er ny chrossey.

³ As va mee nyn mast’ eu ayns annooinid, as ayns lane aggle, as er‐creau.

⁴ As va my ghlare as my phreacheil, cha nee lesh goan vrynneragh dy chreenaght dooinney, agh ayns bree yn Spyrryd, as pooar:

⁵ Nagh beagh yn credjue eu shassoo er creenaght deiney, agh er pooar Yee.

⁶ Agh ta shinyn loayrt creenaght nyn mast’ ocsyn ta slane ynsit, ny‐yeih cha nee creenaght y theihll shoh, ny jeh princeyn y theihll ta lheïe ersooyl:

⁷ Agh ta shin loayrt creenaght Yee ayns folliaght, dy jarroo yn chreenaght follit shen ren Jee goardaghey roish ny seihllyn gys y ghloyr ainyn:

⁸ Shen nagh ren veg jeh princeyn y theihll shoh toiggal; son dy beagh toiggal oc jeh, cha beagh ad er chrossey yn Chiarn dy ghloyr.

⁹ Agh myr te scruit, Cha vel sooill er vakin, ny cleaysh er chlashtyn, chamoo te ayns cree dooinney dy hoiggal ny reddyn ta Jee er chiarail er ny son ocsyn ta graihagh ersyn.

¹⁰ Agh ta Jee er hoilshaghey ad dooinyn liorish e Spyrryd: son ta’n Spyrryd ronsaghey dy chooilley nhee, eer folliaghtyn dowiney Yee.

¹¹ Son quoi’n dooinney ta toiggal ny reddyn ta ayns smooinaghtyn dooinney, agh spyrryd y dooinney hene? er yn aght cheddin ny reddyn ta bentyn gys Jee cha vel dooinney erbee toiggal, agh Spyrryd Yee.

¹² Nish ta shinyn er gheddyn, cha nee spyrryd y theihll, agh y Spyrryd ta veih Jee; dy voddagh shin toiggal ny giootyn graysoil ta dy arryltagh er ny choyrt dooin liorish Jee.

¹³ Ny reddyn cheddin ta shinyn neesht soilshaghey, cha nee ayns ny goan ta creenaght dooinney dy ynsaghey, agh shen ny ta’n Spyrryd Noo dy choyrt roïn; soylaghey reddyn spyrrydoil rish reddyn spyrrydoil.

¹⁴ Agh cha vel y dooinney dooghyssagh goaill rish ny reddyn ta jeh Spyrryd Yee: son t’ad ommijys dasyn; chamoo oddys tushtey ve echey jeu, er yn‐oyr dy vel ad er nyn doiggal ayns aght spyrrydoil.

¹⁵ Agh eshyn ta spyrrydoil, t’eh briwnys dy chooilley nhee, ny yeih cha vel eh hene er ny vriwnys liorish dooinney erbee.

¹⁶ Son quoi t’er hoiggal aigney yn Chiarn, dy jean eh cur roish? agh ta ainyn aigney Chreest.